អាជ្ញាធរអេហ្ស៊ីបកាលពីថ្ងៃទី១៧ ឧសភា បានដោះលែងលោកស្រីស៊ូហ្សាន មូបារ៉ាក់ ភរិយាប្រធានាធិបតីអេហ្ស៊ីប ដែលត្រូវទម្លាក់ចេញពីតំណែងលោកហូស្នី មូបារ៉ាក់ តាមរយៈការបង់ប្រាក់ធានាក្រោយពីលោកស្រីបានសម្រេចផ្តល់ទ្រព្យសម្បត្តិមួយផ្នែករបស់លោកស្រីឱ្យទៅរដ្ឋ។ អ្នកនាំពាក្យនាយកដ្ឋានត្រួតពិនិត្យការស៊ើបអង្កេតអំពើពុករលួយអេហ្ស៊ីប លោក Aly Hassan និយាយឱ្យដឹងថា លោកស្រីស៊ូហ្សាន មូបារ៉ាក់ អាយុ៧០ឆ្នាំ បានផ្តល់គណនីធនាគារដែលមានទឹកប្រាក់៣,៤លានដុល្លារអាមេរិកទៅឱ្យរដ្ឋ។ លោកស៊ូហ្សាន និងស្វាមីរបស់លោកស្រីដែលត្រូវទម្លាក់ចេញពីតំណែងកាលពីថ្ងៃទី១១ កុម្ភៈ កន្លងមក ក្រោយពីមានការបះបោរប្រឆាំងរយៈពេល១៨ថ្ងៃជាប់ៗគ្នា ប្រឈមមុខនឹងការចោទប្រកាន់ពីបទទទួលទ្រព្យសម្បត្តិដោយខុសច្បាប់។
លោកហូស្នី មូបារ៉ាក់ ក៏កំពុងត្រូវស៊ើបអង្កេតផងដែរ ទាក់ទងនឹងការស្លាប់បាតុករជាច្រើននាក់ក្នុងអំឡុងពេលនៃការធ្វើបាតុកម្មប្រឆាំងលោក ហើយបច្ចុប្បន្នកំពុងជាប់ឃុំឃាំងនៅឡើយ ។ លោកមូបារ៉ាក់ ថ្លែងថា ការស៊ើបអង្កេតលើរូបលោកដោយរដ្ឋគឺធ្វើឡើងសំដៅធ្វើឱ្យខូចដល់កេរ្តិ៍ឈ្មោះរបស់លោក និងកេរ្តិ៍ឈ្មោះគ្រួសារលោកប៉ុណ្ណោះ។
ចំណែកលោកមូបារ៉ាក់ ក៏នឹងត្រៀមប្រគល់ទ្រព្យសម្បត្តិរបស់លោកឱ្យរដ្ឋ និងត្រៀមសុំទោស ដើម្បីឱ្យទទួលបានការលើកលែងទោសដែរ៕
ចែករំលែកព័តមាននេះ