ក្រុងហ្សេរុយសាឡឹម ៖ ក្រុមសកម្មប្រយុទ្ធហាម៉ាសដែលកំពុងកាន់អំណាចនៅតំបន់ហ្គាហ្សាស្ទ្រីបបានធ្វើការវាយប្រហារទ្រង់ទ្រាយធំ ដែលការវាយប្រហារនេះ មិនធ្លាប់មានពីមុនទេ ដោយបាញ់រ៉ុក្កែតរាប់ពាន់គ្រាប់ ខណៈដែលយុទ្ធជនហាម៉ាស់រាប់សិបនាក់ បានជ្រៀតចូល និងវាយប្រហារនៅក្នុងទីតាំងជាច្រើនរបស់ប្រទេសអ៊ីស្រាអែល ។
គ្រាប់រ៉ុក្កែត ចាប់ផ្តើមបាញ់នៅម៉ោងប្រហែល ០៦និង៣០នាទីព្រឹកថ្ងៃសៅរ៍ ទី០៧ ខែតុលានេះ។ ការវាយលុយរបស់ក្រុមសកម្មប្រយុទ្ធហាម៉ាស នៅតែកំពុងប្រយុទ្ធគ្នាដោយកាំភ្លើង នៅក្នុងដែនដីរបស់អ៊ីស្រាអែលជាច្រើនទីតាំង ។
នាយករដ្ឋមន្ត្រីអ៊ីស្រាអែលលោក Benjamin Netanyahu បានប្រកាសថា ៖ «អ៊ីស្រាអែលកំពុងមានសង្គ្រាម» ហើយបានអំពាវនាវឲ្យមានការចល័តទ័ពបម្រុងជាច្រើននាក់មកបន្ថែមទៀត ។
ក្រុមសង្គ្រោះជាតិរបស់អ៊ីស្រាអែល បាននិយាយថា មនុស្សយ៉ាងតិច ៤០នាក់ ត្រូវបានសម្លា.ប់នៅក្នុងការវាយលុកទ្រង់ទ្រាយធំរបស់ក្រុមហាម៉ាស ចូលទៅក្នុងប្រទេសអ៊ីស្រាអែល ខណៈដែលការប្រយុទ្ធនៅតែបន្តកើតមាន នៅថ្ងៃសៅរ៍នេះ ។
មន្ទីរពេទ្យក្នុងប្រទេសអ៊ីស្រាអែល បាននិងកំពុងព្យាបាលអ្នករបួសរាប់រយនាក់ រួមទាំងមនុស្សរាប់សិបនាក់ ស្ថិតក្នុងស្ថានភាពធ្ងន់ធ្ងរ៕
ចែករំលែកព័តមាននេះ