ខេត្តសៀមរាប ៖ ក្នុងសង្គមរស់នៅមានមនុស្សជាច្រើន មិនថា ពលរដ្ឋខ្មែរ ឬក៏បរទេសទេ សុទ្ធតែបានចាប់យកជំនាញដើម្បីធ្វើការងារស្វែងរកកម្រៃចិញ្ចឹមជិវិតរៀងៗខ្លួន ។ ដោយឡែក នៅឯខេត្តសៀមរាបឯណេះវិញ…
ខេត្តសៀមរាប ៖ ក្នុងសង្គមរស់នៅមានមនុស្សជាច្រើន មិនថា ពលរដ្ឋខ្មែរ ឬក៏បរទេសទេ សុទ្ធតែបានចាប់យកជំនាញដើម្បីធ្វើការងារស្វែងរកកម្រៃចិញ្ចឹមជិវិតរៀងៗខ្លួន ។ ដោយឡែក នៅឯខេត្តសៀមរាបឯណេះវិញ នៅស្របពេលដែលមនុស្សជាច្រើន បានចាប់យកជំនាញផ្សេងៗដើម្បីធ្វើការរកកម្រៃចិញ្ចឹមជីវិត គឺមនុស្សមួយក្រុមបែរជាសុខចិត្ត យកកម្លាំងកាយ និងកម្លាំងចិត្តព្រមទាំងពេលវេលាផង ទៅធ្វើការងារជាអ្នកជួសជុលប្រាសាទបុរាណ ជាច្រើននៅក្នុងតំបន់រមណីយដ្ឋានអង្គរ ។
បើទោះបីជាការងារជាអ្នកជួសជុលប្រាសាទបុរាណ មានការលំបាកជាច្រើន ដោយនៅហាលភ្លៀង ហាលថ្ងៃ ហាលខ្យល់ ព្រមទាំងប្រើកម្លាំងដាប់ថ្មដោយដៃ និងលើកថ្មធំៗ ជាច្រើនម៉ោងក្នុង១ថ្ងៃៗក៏ដោយ ក៏ក្រុមអ្នកជួសជុលទាំងនោះ ហាក់មិននឿយហត់ហើយមានបំណងចង់បោះបង់ចោលការងារនោះទេ ។
ក្នុងឱកាសនោះដែរ លោកមិន ឡូ រស់នៅក្នុងស្រុកអង្គរធំ បានប្រាប់នៅថ្ងៃទី៦ ខែតុលា ឆ្នាំ២០២៣នេះថា លោកគឺជាអ្នកជួសជុលប្រាសាទបុរាណម្នាក់ ក្នុងចំណោមអ្នករួមការងារជាច្រើនទៀត ដែលកំពុងតែធ្វើការងារនៅខ្លោងទ្វារខាង កើតរបស់ប្រាសាទតាព្រហ្ម ។ លោកមានប្រសាសន៍ថា រូបគាត់បានចូលបំរើការងារជាអ្នកជួសជុលប្រាសាទបុរាណតាំងតែពីអំឡុងឆ្នាំ២០០៧មក។
លោក មិន ឡូ បានឱ្យដឹងទៀតថា.កាលពីមុនគាត់គ្មានការងារអ្វីធ្វើទេ ក្រៅតែពីដើររកការងារជាកម្មករសំណង់នៅតាមកន្លែងផ្សេងៗ។ ប៉ុន្តែពេលមួយគាត់មានអារម្មណ៍នៅក្នុងចិត្តថា ចង់ធ្វើការងារជាអ្នកជួសជុលប្រាសាទបុរាណ។ នៅក្នុងរាត្រីមួយគាត់បានដេកយល់សប្តិថា មានអ្នកមកប្រាប់ឱ្យរូបគាត់ទៅសុំការងារធ្វើជាអ្នកជួសជុលប្រាសាទតាព្រហ្ម ។
លុះព្រឹកឡើងរូបគាត់ ក៏បានធ្វើដំណើរទៅដល់ការដ្ឋានជួសជុលប្រាសាទតាព្រហ្ម ក៏បានសុំគេធ្វើការងារទីនោះ ហើយធ្វើជាអ្នកជួសជុលប្រាសាទ តាព្រហ្មរហូតមកដល់បច្ចុប្បន្ន ។ លោក មិន ឡូ បញ្ជាក់ទៀតថា មនុស្សជំនាន់មុន របស់គាត់មិនមានអ្នកណាធ្វើការជាអ្នកជួសជុលប្រាសាទទេ គឺរូបគាត់តែម្នាក់គត់ ដែលហាក់ដូចជាមាន វាសនា បានធ្វើជាអ្នកជួសជុលប្រាសាទបុរាណ។
ជារៀងរាល់ថ្ងៃ លោកទទួលបន្ទុកជាអ្នកដាប់ថ្មភក់ផ្ទាំងធំៗ ឱ្យត្រូវខ្នាតរង្វាស់ ព្រមទាំងដាប់រំលីងថ្មទាំងនោះ ដើម្បីយកទៅដាក់នៅតាមកន្លែងដែលខូចខាតវិញ។ លោក មិន ឡូ សប្បាយចិត្តនិងការងាររបស់គាត់ ដោយគាត់បង្ហាញមោទភាពថា ជាង១០ឆ្នាំមកហើយ ដែល លោកចំណាយពេលសម្រាប់ការថែរក្សាអង្គរ ហើយមួយជីវិតរបស់លោកប្រសិនបើការងារជួសជុលប្រាសាទបុរាណនៅតែមាន គឺលោកនៅតែធ្វើការនេះរហូតដល់អស់ជីវិត ។
ចំណែកលោក ភន ផាត មានទីលំនៅបច្ចុប្បន្ន រស់នៅ ភូមិឃុំ ព្រះដាក់ ស្រុកបន្ទាយស្រី ខេត្តសៀមរាប គឺជាមេក្រុមផ្នែកជួសជុលរូបចម្លាក់និងក្បាច់នៅតាមជញ្ជាំងប្រាសាទបុរាណ មានប្រសាសន៍ថា លោកបានចូលបំរើការងារជាអ្នកជួស ជុលប្រាសាទបុរាណតាំងតែពីអំឡុងឆ្នាំ ១៩៩៧មកម្ល៉េះ។ លោក ភន ផាត ធ្លាប់បានចូលរួមការងារជួសជុលប្រាសាទ បុរាណ នៅក្នុងខេត្តសៀមរាប ជាច្រើនកន្លែង ដូចជាជួសជុលនៅកន្លែងស្ដេចគំលង់ លានជល់ដំរី របស់ក្រុងអង្គរធំ ជួស ជុលរូបចម្លាក់សេះក្បាល៥ ជួសជុលប្រាសាទចៅសាយទេវតាជាមួយក្រុមការ ងារបុរាណវិទ្យារបស់ចិន និងជួសជុលប្រាសាទតាព្រហ្ម ជាមួយក្រុមការងារឥណ្ឌាជាដើម។
លោក ភន ផាត ដែលបច្ចុប្បន្នមានអាយុ៥៥ឆ្នាំ ទៅហើយ បានឱ្យដឹងថា រូបគាត់បានបំរើការងារជាអ្នកជួសជុលប្រាសាទបុរាណតាំងតែពីរូបលោក មានអាយុ២១ឆ្នាំមកម្ល៉េះ ហើយប្រហែលជាមួយជីវិតរបស់ លោក គឺត្រូវលះបង់ ដើម្បីជួសជុលប្រាសាទបុរាណ។ លោកបានប្រើពេលចំនួន២៦ឆ្នាំមកហើយសម្រាប់ការជួសជុលប្រាសាទបុរាណ ក៏ប៉ុន្តរហូតមកដល់បច្ចុប្បន្ននេះ រូបលោកហាក់ដូចជាមិននឿយណាយនិងការងារនេះទេ។
កម្រៃដែលបានពីការងារជួសជុលប្រាសាទបុរាណ គឺមានភាពប្រហាក់ប្រហែលគ្នានិងមនុស្សដែលធ្វើការងារផ្សេងៗ ដើម្បីរកកម្រៃចិញ្ចឹមជីវិតដែរ ក៏ ប៉ុន្តែចំពោះស្ថានភាពការងារវិញគឺមាន ការលំបាកយ៉ាងខ្លាំង លើសពីការងារដែលមនុស្សជាច្រើនកំពុងធ្វើដើម្បីចិញ្ចឹមជីវិត។
បើទោះបីជាយ៉ាងណាក្តី ក្រុមអ្នកជួសជុលប្រាសាទបុរាណ ជាច្រើនបានបង្ហាញឆន្ទៈថា ពួកគេនឹងមិនបោះបង់ចោលការងារជួសជុលប្រាសាទបុរាណទេ ពីព្រោះការងារនេះក្រៅតែពីធ្វើឱ្យគេបានកម្រៃយកទៅចិញ្ចឹមជីវិតនិងគ្រួសារ គឺពួកគេក៏មានមោទនភាពមួយទៀត ដែលមនុស្ស ជាច្រើនពុំមាន គឺការបានចូលរួមចំណែកជួយថែរក្សា ការពារស្នាដៃនិងកេរ្តិ៍ដំណែលរបស់ដូនតាខ្មែរ ដ៏មានតម្លៃបំផុត ឱ្យបាននៅគង់វង្សយូរអង្វែងតទៅមុខទៀត ដើម្បីទុកឱ្យកូនខ្មែរជំនាន់ក្រោយបានឃើញ និង ឱ្យជនបរទេសដែលបានមកទស្សនាប្រាង្គប្រាសាទបុរាណខ្មែរ បានកោត ស្ញប់ស្ញែងលើមត៌កដ៏មានតម្លៃមហាសាលនេះផងដែរ៕
ចែករំលែកព័តមាននេះ