ខេត្តសៀមរាប ៖ លោកឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរាបានបញ្ជាក់នៅមុខអ្នកយកព័ត៌មាន កាលពីរសៀលថ្ងៃទី០៥ តុលា ស្ថិតក្នុងបរិវេណនាយកដ្ឋានសណ្ដាប់ធ្នាប់ និងប្រតិបត្តិការនៃអាជ្ញាធរជាតិអប្សរា…
ខេត្តសៀមរាប ៖ លោកឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរាបានបញ្ជាក់នៅមុខអ្នកយកព័ត៌មាន កាលពីរសៀលថ្ងៃទី០៥ តុលា ស្ថិតក្នុងបរិវេណនាយកដ្ឋានសណ្ដាប់ធ្នាប់ និងប្រតិបត្តិការនៃអាជ្ញាធរជាតិអប្សរា ជិតសួនរុក្ខជាតិអង្គរនោះថា ការចូលថតផ្តិតរូបភាពនិងវីដេអូជាអនុស្សាវរីយ៍ផ្ទាល់ខ្លួន គឺពុំមានតម្រូវឲ្យសុំការអនុញ្ញាតជាមុននោះទេ ។
លោក បន្តថា ដោយឡែក ចំពោះការថតនូវសម្លៀកបំពាក់ប្រពៃណី ការថតរូបភាពមុនអាពាហ៍ពិពាហ៍ថត YouTube ការថតផ្សាយផ្ទាល់ជាលក្ខណៈមគ្គុទ្ទេសក៍ ការថតខ្សែភាពយន្ត ការថតចម្រៀងកាយវិការ និងការថត រូបក្នុងគោលបំណងអាជីវកម្មផ្សេងៗ គឺចាំបាច់ត្រូវតែមានការអនុញ្ញាតជាមុន ។
លោកថា ភាពចាំបាច់នៃការតម្រូវឱ្យមានការអនុញ្ញាតជាមុន ពីព្រោះត្រូវប្រតិបត្តិនូវគោលការណ៍គតិយុត្តដែលមានជាធរមានផង និងដើម្បីឲ្យផ្នែកជំនាញរបស់ក្រសួងវប្បធម៌ និងវិចិត្រសិល្បៈ ក៏ដូចជាអាជ្ញាធរជាតិអប្សរាអាចជួយកែតម្រូវ ឬផ្តល់យោបល់កែលំអនូវខ្លឹមសារផ្សេងៗ ដូចជាប្រវត្តិសាស្ត្រ ទម្រង់សិល្បៈ ឱ្យបានត្រឹមត្រូវ ព្រមទាំងចៀសវាងនូវមតិរិះគន់ពីសាធារណៈជន នៅពេលរូបភាព ឬខ្លឹមសាររឿងទាំងនោះចេញផ្សាយជាសាធារណៈ ។
អ្នកប្រាជ្ញលើកឡើងថា «អង្គរវត្ត ជាមេមាន់ពងមាស»។ យោងតាមអនុក្រឹត្យលេខ២៣៤ អនក្រ.បក ចុះថ្ងៃទី៨ ខែវិច្ឆិកា ឆ្នាំ២០១៦ ស្តីពីការគ្រប់គ្រងឧស្សាហកម្មភាព យន្ត បានតម្រូវឱ្យផលិតករ សុំការអនុញ្ញាតទៅក្រសួង វប្បធម៌និងវិចិត្រសិល្បៈជាមុន។ លក្ខខណ្ឌសំខាន់ក្នុងការស្នើសុំ គឺការផ្តល់អត្ថបទនិពន្ធនៃស្នាដៃដើម្បីផ្តល់លទ្ធភាពឱ្យអ្នកជំនាញពិនិត្យលើខ្លឹមសារ។
ដោយឡែក អាជ្ញាធរជាតិអប្សរាក៏បានផ្សព្វផ្សាយអំពីគោលការណ៍នៃការប្រើប្រាស់រូបភាពអង្គរតាំងពីឆ្នាំ២០១៦ រហូតមកដល់បច្ចុប្បន្ន ដើម្បីចូលរួមចំណែកក្នុងការជំរុញសេដ្ឋកិច្ចសង្គម ព្រមទាំងថែរក្សា ការពារ លើកតម្កើង និងអភិវឌ្ឍន៍វប្បធម៌ជាតិ ជាពិសេស បញ្ចៀសនូវផលប៉ះពាល់ខ្លាំងដល់តម្លៃបេតិកភណ្ឌវប្បធម៌ជាតិ ។
លោកអគ្គនាយករង និងជាអ្នកនាំពាក្យអាជ្ញាធរជាតិអប្សរាបានបន្ថែមថា សម្រាប់យើងជាខ្មែរអត្ថន័យរបស់អង្គរពិតជាធំធេងណាស់ លើសពីអាយុជីវិតទៅទៀត ពីព្រោះអង្គរជាដួងព្រលឹង និងវប្បធម៌ជាតិ។ ដូច្នេះ ប្រសិនបើមាន ការប្រើប្រាស់រូបភាពអង្គរមិនត្រឹមត្រូវ ឬក៏ការប្រព្រឹត្តនូវកាយវិការមិនស្របណាមួយ ដែលធ្វើឱ្យប៉ះពាល់ដល់តម្លៃនៃរមណីយដ្ឋានអង្គរនោះសាធារណជនពិតជាមិនអាចទទួលយកបាននោះទេ ។
ក្នុងន័យដើម្បីបញ្ចៀសឱ្យបាននូវកំហុសឆ្គងអចេតនាណាមួយដែលបណ្តាលមកពីការប្រើប្រាស់រូបភាពអង្គរ អាជ្ញាធរជាតិអប្សរា និងក្រសួងវប្បធម៌ និងវិចិត្រសិល្បៈ មានភាពចាំបាច់ត្រូវការត្រួតពិនិត្យជាមុន នូវគោលបំណងនៃការប្រើប្រាស់រូបភាពអង្គរជាសាធារណៈទាំងអស់ ។
ដូច្នេះ សូមសាធារណជន ជាលក្ខណៈក្រុមហ៊ុន ឬឯកជន ដែលជាម្ចាស់ផលិតកម្ម ឬអាជីវកម្មនានា យោគយល់និងចូលរួមប្រតិបត្តិស្របតាមគោលការណ៍ច្បាប់ដែលមានជាធរមាន ។
ជាមួយគ្នានេះដែរ លោកក៏បញ្ជាក់បន្ថែមទៀតដែរថា អាជ្ញាធរជាតិអប្សរានឹងធ្វើការកែសម្រួលអំពី យន្តការពាក់ព័ន្ធនឹងការកាត់បន្ថយពេលវេលានៃការស្នើសុំកាត់បន្ថយដំណើរការនីតិវិធីស្នើសុំ ដើម្បីធ្វើយ៉ាងណាឱ្យសាធារណជនមានការងាយស្រួល និងបង្កើនប្រសិទ្ធភាពការងារបានកាន់តែងាយស្រួល និងរលូនជាងមុន។ អាជ្ញាធរជាតិអប្សរាក៏នឹងរៀបចំឱ្យមាន Call Center និងបង្កើតប្រព័ន្ធស្នើសុំ Online ដើម្បីសាធារណជនអាចស្នើសុំតាមប្រព័ន្ធបច្ចេកវិទ្យាបានយ៉ាងឆាប់រហ័ស និងចំណេញពេលវេលា ។
ចែករំលែកព័តមាននេះ