ត្រៀមវិធានការដោះស្រាយផលប៉ះពាល់ដោយសារជំនន់ទឹកភ្លៀងនៅក្នុងស្រុកជីក្រែង
ខេត្តសៀមរាប ៖ នៅរសៀលថ្ងៃទី០៤ តុលា ឆ្នាំ២០២៣ ក្រុមការងារគណៈកម្មាធិការគ្រប់គ្រងគ្រោះមហន្តរាយខេត្តសៀមរាប ដឹកនាំដោយលោក អ៊ឹង គឹមលាង អភិបាលរងខេត្ត…
ខេត្តសៀមរាប ៖ នៅរសៀលថ្ងៃទី០៤ តុលា ឆ្នាំ២០២៣ ក្រុមការងារគណៈកម្មាធិការគ្រប់គ្រងគ្រោះមហន្តរាយខេត្តសៀមរាប ដឹកនាំដោយលោក អ៊ឹង គឹមលាង អភិបាលរងខេត្ត និងជាអនុប្រធានគណៈកម្មាធិការគ្រប់គ្រងគ្រោះមហន្តរាយខេត្ត មានមន្ទីរអង្គភាពពាក់ព័ន្ធ និងអាជ្ញាធរមូលដ្ឋានចុះពិនិត្យវាយតម្លៃ និងត្រៀមវិធានការផ្សេងៗ ដើម្បីឆ្លើយតបចំពោះផលប៉ះពាល់ដោយសារជំនន់ទឹកភ្លៀងនៅស្រុកជីក្រែង ។
ក្នុងរយៈពេលមួយសប្តាហ៍មកនេះ ខេត្តសៀមរាបទទួលរងនូវសម្ពាធទាប និងមានភ្លៀងធ្លាក់ជាបន្តបន្ទាប់ បានបណ្តាលឱ្យរងផលប៉ះពាល់លើហេដ្ឋារចនាសម្ព័ន្ឋខូចដំណាំ និងសន្ទូង ផ្ទះសម្បែងរបស់បងប្អូនប្រជាពលរដ្ឋមួយចំនួនផងដែរ ។
យោងតាមរបាយការណ៍របស់លេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្តគិតចាប់ពីថ្ងៃទី០២ ដល់រសៀលថ្ងៃទី០៤ តុលា ឆ្នាំ២០២៣ ស្ថានភាពភ្លៀងធ្លាក់បានប៉ះពាល់ដល់ភូមិចំនួន១៩២នៃឃុំ-សង្កាត់ចំនួន៣៦ ក្នុងចំនួន១០ ក្រុង-ស្រុកនៃចំណោម១២ ក្រុង-ស្រុក លើកលែងតែស្រុកក្រឡាញ់ និងស្រុកស្រីស្នំ ខេត្តសៀមរាបប៉ុណ្ណោះ ។
ក្នុងនោះ បានប៉ះពាល់ស្រូវចំនួន៧ពាន់៩២៥ហិកតា ស្មើនឹង៥៣១៩គ្រួសារ និងប្រជាពលរដ្ឋជួបផលប៉ះពាល់ចំនួន៦១៤៦គ្រួសារ ក្នុងនេះ ប៉ះពាល់លំនៅឋានកម្រិតស្រាល៣៨០៣គ្រួសារ និងធ្ងន់៣គ្រួសារ ជម្លៀសទៅនៅផ្ទះបងប្អូន ។ បានខូចខាតផ្លូវកៅស៊ូ បេតុង ដីស ដីក្រហមជាង៥ពាន់ម៉ែត្រ ខូចទំនប់ប្រឡាយជាង១២ពាន់ម៉ែត្រ និងលិចទំនប់ប្រឡាយជាង២៤ពាន់ម៉ែត្រ ច្រោះនិងលិចដាច់ស្ពាន១៦កន្លែង លិចបរិវេណវត្ត៩ លិចអគាររដ្ឋបាល៩ លិចបរិវេណមន្ទីរពេទ្យ២ លិចទីធ្លាសាលារៀន៣៤ ។
លោក អ៊ឹង គឹមលាង មានប្រសាសន៍ថា ក្នុងនាម គណៈកម្មាធិការគ្រប់គ្រងគ្រោះមហន្តរាយខេត្តក្រុង ស្រុក បានចុះពិនិត្យ និងវាយតម្លៃទៅលើស្ថានការនៃផលប៉ះពាល់ និងខូចខាតទាំងនេះ ដើម្បីស្នើសុំស្បៀងបម្រុងទុកជាមួយគ្នានេះដែរ ក្រុមការងារគណៈកម្មាធិការគ្រប់គ្រងគ្រោះ មហន្តរាយខេត្ត ក្រុងស្រុក និងបានត្រៀមកម្លាំងថ្នាំសង្កូវ ព្រមទាំងសម្ភារបរិក្ខាមួយចំនួន ទុកសម្រាប់ជួយសង្គ្រោះដល់ប្រជាពលរដ្ឋសំដៅឆ្លើយតបបានទាន់ពេលវេលានូវហានិភ័យ និងឧបទ្ទវហេតុ ដោយជំនន់ទឹកភ្លៀង ។
លោកអ៊ឹង គឹមលាង បញ្ជាក់ច្បាស់ថា មកដល់ពេលនេះ ពុំមានហេតុការណ៍ ឬបញ្ហាអ្វីកើតឡើងប៉ះពាល់ដល់អាយុជីវិតប្រជាពលរដ្ឋនោះទេ ។ លោកក៏បានអំពាវនាវដល់ប្រជាពលរដ្ឋទូទាំងខេត្តសៀមរាប ឱ្យ មានការប្រុងប្រយ័ត្ន នាំគ្នាតាមដ្ឋានស្ថានភាពទឹកភ្លៀងតាមតំបន់របស់ខ្លួនឱ្យបានជាប្រចាំ ដើម្បីបញ្ចៀសបានពីក្តីអន្តរាយដែលកើតឡើងជាយថាហេតុ នាំគ្នាថែរក្សាសុខភាព ជាពិសេស ប្រយ័ត្នប្រយែងចំពោះកុមារតូចៗ កុំបណ្តែតបណ្តោយឱ្យពួកគាត់ចុះលេងទឹកផ្តេសផ្តាស ចៀសវាងនូវប្រការអាក្រក់ណាមួយកើតឡើង និងនាំគ្នាថែទាំសត្វពាហនៈឱ្យបានល្អ សំខាន់រកទីទួលសុវត្ថិភាពសម្រាប់សត្វពាហនៈជ្រកនៅប្រកបដោយសុវត្ថិភាព ព្រមទាំងត្រៀម លក្ខណៈក្នុងការចាក់វ៉ាក់សាំងការពារបង្កាជម្ងឺដល់គោ ក្របី នៅពេលទឹកស្រកផងដែរ ។
សូមបញ្ជាក់ថា ក្រុមការងារគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានត្រៀមបម្រុងសម្រាប់ឆ្លើយតបទៅនឹងគ្រោះមហន្តរាយ ដូចជាពូជស្រូវចំនួន២ពាន់៧០០គ.ក្រ, ពូជបន្លែ១០០កញ្ចប់, ថ្នាំសម្លាប់សត្វល្អិត១៥០ដប, ថ្នាំសម្លាប់សត្វកណ្តុរ៥៤គ.ក្រ និងបន្តត្រៀមលក្ខណៈ ដើម្បីតាមដាននិងត្រៀមបម្រុងសម្រាប់ជួយសង្គ្រោះ ក្នុងករណីមានគ្រោះមហន្តរាយឬឧបទ្ទវហេតុផ្សេងៗ ជាពិសេស បានចេញសារជូន ដំណឹងដល់អាជ្ញាធរមានសមត្ថកិច្ច បងប្អូនប្រជាពលរដ្ឋនិងសាធារណៈជនជាពិសេសតំបន់ទំនាបជាប់ផ្លូវទឹកឱ្យបង្កើនការយកចិត្តទុកដាក់បង្ការ ត្រៀមបម្រុងចំពោះហានិភ័យនៃជំនន់ទឹកភ្លៀងដែលអាចកើតឡើងជាយថាហេតុ ។
ចែករំលែកព័តមាននេះ