រាជធានីភ្នំពេញ ៖ លោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ បានជំរុញឲ្យកងកម្លាំងមានសមត្ថកិច្ចទាំងអស់ និងអាជ្ញាធរខណ្ឌទាំង១៤ បង្កើតគណៈកម្មការមួយ ចុះត្រួតពិនិត្យទីតាំងស្នាក់នៅ រួមនឹងក្លិបកម្សាន្តទាំងអស់ នៅក្នុងរាជធានីភ្នំពេញ ដើម្បីពង្រឹងសន្តិសុខ ឲ្យបានរឹងមាំ ទប់ស្កាត់បទល្មើសផ្សេងៗ ពិសេសគ្រឿងញៀន និងការជួញដូរមនុស្សគ្រប់ទម្រង់ ។
ការជំរុញបែបនេះរបស់លោក ឃួង ស្រេង បានធ្វើឡើងក្នុងកិច្ច ប្រជុំគណៈបញ្ជាការឯកភាពរាជធានីភ្នំពេញ នារសៀលថ្ងៃទី០៤ ខែតុលា ឆ្នាំ២០២៣នេះ នៅសាលារាជធានីភ្នំពេញ ។
លោក ឃួង ស្រេង បានមានប្រសាសន៍លើកឡើងថា គណៈកម្មការនេះ ត្រូវតែចេញដំណើរជាបន្ទាន់ ហើយការចុះត្រួតពិនិត្យនោះ ដាច់ខាត ត្រូវធ្វើកំណត់ហេតុ និងចុះហត្ថលេខាពីម្ចាស់ទីតាំង ដែលមានភាគហ៊ុនធំជាងគេ មិនអនុញ្ញាតឲ្យមេការគ្រប់គ្រងមកទទួលខុសត្រូវ ចុះហត្ថលេខាជំនួសនោះទេ។ ការងារនេះ ត្រូវតែក្តាប់ឲ្យបាន បើយើងក្តាប់ស្ថិតិនេះ មិនបាន តើយើងធ្វើអី្វកើត ។
លោកបញ្ជាក់ថា ចំពោះការគ្រប់គ្រងអាវុធជាតិផ្ទុះ ជារឿងសំខាន់ ដែលយើងត្រូវពង្រឹង និងគ្រប់គ្រងឲ្យបាន ដើម្បីកុំឲ្យក្រុមសង្គមងងឹតធ្វើសកម្មភាពបាន។ គណៈបញ្ជាការឯកភាពរាជធានីភ្នំពេញ ត្រូវតែគ្រប់គ្រងមនុស្សចេញ-ចូលរាជធានីភ្នំពេញ ឲ្យបាន។ ការរឹតបណ្តឹងខ្លាំង វាមិនប៉ះពាល់ដល់វិស័យទេសចរណ៍នោះទេ បើរាជធានីភ្នំពេញ មានសន្តិសុខល្អប្រសើរនោះ អ្នកទេសចរបរទេសគេនឹងមកលេងរាជធានីភ្នំពេញ កាន់តែច្រើន ហើយការរឹតបណ្តឹងខាងលើនេះ ត្រូវអនុវត្តចាប់ពីពេលនេះតទៅ រហូតដល់បុណ្យភ្ជុំបិណ្ឌ បន្តដល់បុណ្យអ៊ុំទូក និងបន្តរហូតទៅ ។
លោក ឃួង ស្រេង បានបន្ថែមទៀតថា ក្រៅពីវិធានការខាងលើហើយនោះ ការដាក់កម្លាំងពិនិត្យអាវុធជាតិផ្ទុះ ការទប់ស្កាត់ក្មេងទំនើងនៅតាមសាលារៀន ការបង្ក្រាបល្បែងស៊ីសងនៅតាមមូលដ្ឋាន ក៏ជារឿងសំខាន់ ដែលត្រូវតែអនុវត្តឱ្យមានប្រសិទ្ធភាព ជាមួយនឹងការចុះពង្រឹងសន្តិសុខ បង្ការទប់ស្កាត់បទល្មើសគ្រប់ប្រភេទ នៅតំបន់ស្មុគស្មាញឲ្យបាន២៤ម៉ោង លើ២៤ម៉ោង ដើម្បីឱ្យប្រជាពលរដ្ឋទទួលបានភាពកក់ក្តៅ ៕
ចែករំលែកព័តមាននេះ