ខេត្តសៀមរាប ៖ អនុលោមតាមអនុក្រឹត្យ ស្តីពីការគ្រប់គ្រងឧស្សាហកម្មភាពយន្ត ការផលិតភាពយន្ត ភាពយន្តភាគតាមទូរទស្សន៍ ភាពយន្តឯកសារ ចម្រៀងកាយវិការ ចាំបាច់ត្រូវសុំការអនុញ្ញាតពីក្រសួងវប្បធម៌ និងវិចិត្រសិល្បៈ…
ខេត្តសៀមរាប ៖ អនុលោមតាមអនុក្រឹត្យ ស្តីពីការគ្រប់គ្រងឧស្សាហកម្មភាពយន្ត ការផលិតភាពយន្ត ភាពយន្តភាគតាមទូរទស្សន៍ ភាពយន្តឯកសារ ចម្រៀងកាយវិការ ចាំបាច់ត្រូវសុំការអនុញ្ញាតពីក្រសួងវប្បធម៌ និងវិចិត្រសិល្បៈ នេះបើតាមហ្វេសប៊ុកផេកផ្លូវការរបស់អាជ្ញាធរជាតិអប្សរា នៅថ្ងៃទី០៤ ខែតុលា ឆ្នាំ២០២៣នេះ ។
អាជ្ញាធរជាតិអប្សរា បានបញ្ជាក់យ៉ាងដូច្នេះថា ៖ «រាល់ការស្នើសុំ ផលិតករត្រូវភ្ជាប់ពាក្យស្នើសុំ និងអត្ថបទនិពន្ធរឿង (ភាពយន្ត) និងអត្ថបទចម្រៀង (ចម្រៀងកាយវិការ) ចំពោះការផ្តល់លិខិតអនុញ្ញាត នឹងផ្តល់ជូនរយៈពេល១៥ថ្ងៃ នៃថ្ងៃធ្វើការ (សម្រាប់ភាពយន្ត) និងរយៈពេល ៥ថ្ងៃ (សម្រាប់ចម្រៀងកាយវិការ)» និង «ពេលទទួលបានលិខិតអនុញ្ញាត ផលិតករ ត្រូវយកលិខិតអនុញ្ញាតថតនោះ ជូនទៅអាជ្ញាធរជាតិអប្សរា (ករណីថតនៅក្នុងបរិវេណរមណីយដ្ឋានអង្គរ) ដោយបញ្ជាក់ពីទីកន្លែង ដែលត្រូវថត ពេលវេលាថត និងសមាសភាពក្រុមការងារ ដើម្បីអាជ្ញាធរជួយសម្របសម្រួល» ។
ម្យ៉ាងទៀត អាជ្ញាធរជាតិអប្សរា ក៏ទើបបានចេញសេចក្តីជូនដំណឹង ស្តីពីការថតរូបភាព ឬវីដេអូ នៅតាមប្រាសាទនានា ក្នុងរមណីយដ្ឋានអង្គរ កាលពីថ្ងៃទី២៦ ខែកញ្ញា ឆ្នាំ២០២៣ នេះដែរថា “រាល់ការថតរូប ចងក្រងជាអនុស្សាវរីយ៍ សម្រាប់គ្រួសារ សម្រាប់បង្ហោះតាម Facebook, TikTok ដើម្បីផ្សព្វផ្សាយពីវប្បធម៌ ប្រពៃណី ភាពអស្ចារ្យទៅលើស្នាដៃសិល្បៈ វិស្វកម្ម សំណង់របស់ប្រាសាទ របស់បុព្វបុរសខ្មែរយើង មិនមានការហាមឃាត់ទេ។ អាជ្ញារជាតិអប្សរា មិនដែលតម្រូវឱ្យគាត់ធ្វើការស្នើសុំទេ” ។
អាជ្ញាធរជាតិអប្សរា សូមឲ្យម្ចាស់ផលិតករ ជាក្រុមហ៊ុន ឬឯកជន ចូលរួមប្រតិបត្តិឲ្យបានខ្ជាប់ខ្ជួន នូវខ្លឹមសារអនុក្រឹត្យ និងសេចក្តីជូនដំណឹងខាងលើ ៕
ចែករំលែកព័តមាននេះ