ទីក្រុងបាងកក ៖ មន្ត្រីប៉ូលិស បានចាប់ខ្លួនខ្មាន់កាំភ្លើងម្នាក់ អាយុ១៤ឆ្នាំ បន្ទាប់ពីធ្វើការបាញ់ប្រហារនៅក្នុងមជ្ឈមណ្ឌលផ្សារទំនើប ផារ៉ាហ្គន (Siam Paragon) ដោយបានសម្លា.ប់មនុស្ស៣នាក់…
ទីក្រុងបាងកក ៖ មន្ត្រីប៉ូលិស បានចាប់ខ្លួនខ្មាន់កាំភ្លើងម្នាក់ អាយុ១៤ឆ្នាំ បន្ទាប់ពីធ្វើការបាញ់ប្រហារនៅក្នុងមជ្ឈមណ្ឌលផ្សារទំនើប ផារ៉ាហ្គន (Siam Paragon) ដោយបានសម្លា.ប់មនុស្ស៣នាក់ និង០៤នាក់ទៀតរងរបួសធ្ងន់ស្រាល នេះបើយោងតាមកាសែតថៃ បាងកកប៉ុស្តិ៍ ។
ហេតុការណ៍នេះ បានកើតឡើងនៅម៉ោងប្រហែល០៤និង២០នាទីរសៀលថ្ងៃអង្គារ ទី០៣ ខែតុលា ឆ្នាំ២០២៣ បានធ្វើឲ្យមនុស្សរាប់រយនាក់ រត់ភៀសខ្លួនចេញពីផ្សារទំនើប ក្នុងសង្កាត់ Pathum Wan នៅកណ្តាលក្រុងបាងកក ។
សាក្សីបាននិយាយថា ឮស្នូរកាំភ្លើង ជាង១០គ្រាប់។ ក្នុងចំណោមអ្នករងរបួស មានជនបរទេស០៣នាក់ ត្រូវបានបញ្ជូនទៅព្យាបាលនៅមន្ទីរពេទ្យ King Chulalongkorn Memorial ។
ក្រុមអន្តរាគមន៍ពិសេស បានបញ្ជូនទៅកាន់កន្លែងកើតហេតុ ដើម្បីតាមចាប់ជនដៃដល់។
ប្រភពវីដេអូពីកាមេរ៉ាសុវត្ថិភាព បង្ហាញពីប៉ូលិសបានចាប់ខ្លួនជនសង្ស័យជាខ្មាន់កាំភ្លើងខាងលើ នៅជាន់ទី៣ នៃសណ្ឋាគារ Siam Kempinski Hotel Bangkok ជាប់ផ្សារទំនើប Siam Paragon ប្រហែលម៉ោង០៥និង១០នាទីល្ងាច ថ្ងៃដដែលនេះ ដោយជនសង្ស័យបានដាក់អាវុធចុះចាញ់ ។
យោងតាមរបាយការណ៍ក្នុងស្រុក បានឱ្យដឹងថា ច្រកចូល និងច្រកចេញ នៃផ្សារទំនើប ត្រូវបានបិទ។ ស្ថានីយ៍រថភ្លើង Skyway ក៏ត្រូវបានបិទដែរ ។
រូបភាពពីវីដេអូ ដែលបង្ហោះនៅលើប្រព័ន្ធផ្សព្វផ្សាយសង្គម បង្ហាញពីអ្នកដើរទិញឥវ៉ាន់ នាំគ្នារត់គេចចេញពីផ្សារ បន្ទាប់ពីមានសេចក្តីរាយការណ៍ពីករណីបាញ់ប្រហារ នៅខាងក្នុងផ្សារទំនើប ៕
ចែករំលែកព័តមាននេះ