រាជធានីភ្នំពេញ ៖ មាស សុជាតិ អ្នកប្រដាល់មកពីក្លឹបរាជសីហ៍ខេត្តបន្ទាយមានជ័យ ចង់ប្រកួតសាកកម្លាំងជាមួយថៃ ប៊ុនហាន មកពីក្លឹបបុរីនាគរាជ នៅលើសង្វៀនស្ថានីយទូរទស្សន៍ CTN នាថ្ងៃសៅរ៍ទី២១ ឧសភា ខាងមុខនេះ ។មាស សុជាតិ បានបាត់មុខពីលើសង្វៀនជាយូរណាស់មកហើយ ឯការលេចមុខរបស់គេលើកនេះគឺបានជ្រើសរើសថៃ ប៊ុនហាន ដើម្បីល្បងកម្លាំងគ្នា ព្រោះថា កន្លងមកគេមិនធ្លាប់ប៉ះគ្នាម្តងណាឡើយ ។
សុជាតិ ធ្លាប់ទទួលបានតំណែងជាម្ចាស់ជើងឯកគុនខ្មែរវគ្គ១ រីឯប៊ុនហានមិនធ្លាប់ទទួលបានតំណែងអ្វីនឹងគេម្តងណាទេ ប៉ុន្តែទោះជាយ៉ាងណា ល្បិចប្រយុទ្ធនៅលើសង្វៀនរបស់គេទាំង២នាក់មិនលើសមិនខ្វះគ្នាឡើយ ។ សុជាតិគេមានភាពអំណត់ជាង របៀបវាយលុកទៅលើគូប្រកួតមានភាពច្បាស់លាស់ជាង ស្នៀតកណ្តាប់ដៃនិងស្នៀតជើងគឺខ្លាំងដូចគ្នា ថ្វីដ្បិតតែរាល់ការវាយចេញមានភាពយឺតយ៉ាវបន្តិចមែន តែមិនសូវជាឥតប្រយោជន៍ឡើយ ។ មិនដូចប៊ុនហាននោះទេ ដែលរាល់ការវាយចេញរបស់គេអាងកម្លាំងបាយច្រើនជាង ទាំងស្នៀតដៃនិងស្នៀតជើង រាល់ការទាត់និងវាយចេញម្តងៗទាំងកំរោលតែម្តង ។ ស្នៀតកែងរបស់ប៊ុនហានក៏អាចប្រើការបានដែរតែមិនសូវជាមានប្រសិទ្ធភាពប៉ុន្មានឡើយ ។
សំអ៊ួន លួង មកពីក្លឹបបាក់ខែងកីឡា ជួបមាស សារិទ្ធ មកពីក្លឹបស៊ីម៉ាក់ ។ សំអ៊ួន លួង ក៏បានបាត់មុខពីលើសង្វៀនជាយូរមកហើយដែរ និងទើបតែលេចមុខនៅលើសង្វៀនលើកនេះប៉ុណ្ណោះ ហើយជាមួយមាស សារិទ្ធ ក៏មិនធ្លាប់ជួបគ្នាទៀត ។ រវាងគូនេះបើនិយាយពីកម្លាំងកាយ ប្រហាក់ប្រហែលគ្នា តែបើនិយាយពីចិត្ត វិញ គឺសារិទ្ធចិត្តសឿងជាង ។ សំអ៊ួន លួង មានស្នៀតជើងល្អជាង ឯស្នៀតដៃនិងស្នៀតកែងក៏មិនជាអន់ខ្សោយណាស់ណាដែរ គ្រាន់តែការវាយចេញរបស់គេមានសភាពយឺតយ៉ាវបន្តិច។ មាស សារិទ្ធ បើផ្លែកែងនិងជង្គង់របស់គេមិនអាចមានការធ្វេសប្រហែសបានឡើយ ម្យ៉ាងវិញទៀត ស្នៀតជើងនិងស្នៀតដៃរបស់គេក៏រឹតតែមិនអាចមើលស្រាលថែមទៀត ។ តាមការវាយតម្លៃជាទូទៅ ទាំងសងខាងសុទ្ធតែជាអ្នកខ្លាំងដូចគ្នា ប៉ុន្តែត្រង់ថាអ្នកណាឈ្នះឬចាញ់នោះមានតែរង់ចាំអ៊ុតមើលការប្រកួតថ្ងៃនោះមកដល់សិនទើបអាចដឹងបាន ។
សុខ ចិន្តា មកពីក្លឹបឃ្លាំងមឿងកីឡា ជួប ខុម ពិសិដ្ឋ មកពីក្លឹបអូដឹមកីឡា ។ រាជសីហ៍ ចៅក្តៀប មកពីក្លឹបសម្រែករាជសីហ៍បង្ក្រាបគ្រឿងញៀន ជួបម៉ាត់ ឆ្វេង មកពីក្លឹបកីឡាប្រដាល់ក្រសួងកសិកម្ម ។ ញឹម វិចិត្រ មកពីក្លឹបកងរាជអាវុធហត្ថរាជធានីភ្នំពេញ ជួប សែម សារ៉ូ មកពីក្លឹបអេភូថងកីឡា ៕
ចែករំលែកព័តមាននេះ