ខេត្តកណ្តាល ៖ នៅលើសង្វៀនប្រដាល់ស្ថានីយទូរទស្សន៍ប៉ុស្តិ៍លេខ៥ ស្រុកស្អាង ខេត្តកណ្តាល សម្រាប់ល្ងាចថ្ងៃសុក្រ ទី២០ ឧសភា ខាងមុខនេះរឿង សោភ័ណ្ឌ អ្នកប្រដាល់មកពីក្លឹបខេមរកីឡា ត្រូវបានផ្គូផ្គងឱ្យជួបប្រកួតជាមួយង៉ែត រដ្ឋា មកពីក្លឹបក្រសួងមហាផ្ទៃ ។ យោងតាមប្រវត្តិប្រកួតរបស់អ្នកទាំង២ គឺសោភ័ណ្ឌ ជាសិស្សប្អូន ហើយពួកគេមិនធ្លាប់មានប្រវត្តិប្រកួត គ្នាពីមុនមកទេ ។
សោភ័ណ្ឌ ពិតណាស់ដែលគេជាអ្នកប្រដាល់រលកក្រោយ ប៉ុន្តែចាប់តាំងពីបានចាប់យកអាជីពជាអ្នកប្រដាល់មកគេបានសាងកេរ្តិ៍ឈ្មោះល្អណាស់ ពិសេសនៅលើសង្វៀនប៉ុស្តិ៍លេខ៥ នេះ តែម្តង ។ ក្នុងចំណោមស្ថិតិនៃការប្រកួតប្រមាណចំនួន៣០លើកកន្លងមក តួ លេខចាញ់តែ២លើកប៉ុណ្ណោះ ។ អ្វីដែលអស្ចារ្យសម្រាប់ការឈ្នះរបស់សោភ័ណ្ឌកន្លងមក គឺ គេបានបំបាក់រៀមច្បងអស់ជាច្រើនរូប ។ ថ្ងៃនេះង៉ែត រដ្ឋា ក៏ត្រូវបានចាត់ទុកថា ជារៀមច្បងដែរ ហើយបានចេញមុខមកតតាំងជាមួយសោភ័ណ្ឌ តែមិនដឹងថា ទទួលបានវាសនាបែបណាទេ ។ រឿងសោភ័ណ្ឌ មានមាឌមិនជាធំប៉ុន្មានទេ កម្ពស់ក៏មិនខ្ពស់បុន្មានដែរ ប៉ុន្តែដោយសារការខិតខំហ្វឹកហាត់នាំឱ្យវិជ្ជាគុនរបស់គេឈានដល់កម្រិតកំពូលទាំងថាមពល និងបច្ចេកទេស គឺគេអាចធានាបានទោះបី ប៉ះជាមួយជើងខ្លាំងកម្រិតណាក៏ដោយ ។ រីឯង៉ែត រដ្ឋា ក៏ជាអ្នកប្រដាល់ដែលស្ថិតក្នុងលំដាប់ខ្លាំងម្នាក់ដែរសម្រាប់បច្ចុប្បន្ន ពេលនេះគេត្រូវប៉ះជាមួយសិស្សប្អូន ដែលល្បីតើអាចបំបាក់សោភ័ណ្ឌបានឬអត់?
រឿម វណ្ណៈ មកពីក្លឹបរស្មីភូមិគាប ខេត្តបន្ទាយមានជ័យត្រូវបានផ្គូផ្គងឱ្យប៉ះជាមួយចន្ថា សារីម មកពី ក្លឹបយុវកីឡាខេត្តកណ្តាល ។ វណ្ណៈ និងសារីម ជាជើងចាស់ធ្លាប់មានបទពិសោធន៍លើសង្វៀនចាស់វស្សាដូចគ្នា ។ រឿម វណ្ណៈ ស្កាត់មកពីឆ្ងាយ ទោះបីជាយូរៗគេបង្ហាញមុខម្តង តែអ្នកប្រដាល់រូបនេះទទួលបានការគាំទ្រខ្លាំងណាស់ពីសំណាក់អ្នកទស្សនា ។ រឿំម វណ្ណៈ ចេះប្រើគ្រប់ក្បាច់ គ្រប់ស្នៀត ហើយការប្រកួតរបស់គេមានរបៀប មានប្លង់ត្រឹមត្រូវមិនមែនប្រកួតរបៀបច្រង៉េងច្រង៉ាង ទេ ។ ចំណែកចន្ថា សារីមវិញ ក៏ មិនធម្មតាដែរ បើគិតពីបទពិសោធន៍នៃការប្រកួតវិញ អ្នកប្រដាល់រូបនេះធ្លាប់មានប្រវត្តិប្រកួតមិនក្រោម១០០លើកទេ ។ ទោះបីជាយ៉ាងណាគ្មាននរណាហ៊ានទស្សន៍ទាយ ពីលទ្ធផលទុកជាមុនសម្រាប់អ្នកទាំង២នេះឡើយ គេគ្រាន់តែដឹងថា គូនេះពិតជាបង្កការជក់ចិត្ត និងពិតជាឈឺសាច់ទាំងសងខាង ។
ឡុង ប៊ុនយីម មកពីក្លឹបសាលវ័ន្តកីឡា ត្រូវប្រកួតជាមួយយឹម ចំរ៉ុង មកពីក្លឹបអាជ្ញាធរជាតិអាវុធគីមី ។ រីឯជ័យ ប៊ុនសង់ មកពីក្លឹបខេមរិន្ទមានឫទ្ធិ ត្រូវប្រកួតជាមួយឈិន ធារ៉ា មកពីក្លឹបប្រដាល់ស្រុកអន្លង់វែង ។ ទាំង២គូនេះ លើកលែងតែឈិន ធារា៉ គឺសុទ្ធតែអ្នកប្រដាល់រលកក្រោយ ប៉ុន្តែវិជ្ជាគុនរបស់ពួកគេមិនអន់ទេ ។ ចំពោះការប្រកួតជាលក្ខណៈសាកលជាការជួបប្រកួតរវាងកីឡាករស្វាយ រដ្ឋា មកពីក្លឹបប៉េអឹមរាជធានីភ្នំពេញ ជាមួយវី សាវុធ មកពីក្លឹបឥន្ទ្រីកីឡា៕
ចែករំលែកព័តមាននេះ