ភ្នំពេញ៖ អគ្គនាយកដ្ឋាន​អត្តសញ្ញាណកម្ម របស់​ក្រសួងមហាផ្ទៃ បានប្រកាស ក្នុងសេចក្តីបំភ្លឺ ថា សព្វថ្ងៃនេះ ការកែតម្រូវបញ្ជីអត្រានុកូលដ្ឋាន ឬការកែតម្រូវ​សំបុត្រកំណើត និងអត្តសញ្ញាណ​ប័ណ្ណ​សញ្ជាតិខ្មែរ គឺក្រៅតែពីស្នើសុំកែតម្រូវនៅអគ្គនាយកដ្ឋា​នអត្តសញ្ញាណកម្ម ដែលស្ថិត​នៅបឹងស្នោរ តាមផ្លូវជាតិលេខ២ ក្នុងខណ្ឌច្បារអំពៅ រាជធានីភ្នំពេញ គឺក៏មានកែតម្រូវ នៅសាលាក្រុង ស្រុក និងសាលាខណ្ឌ ផងដែរ។

សេចក្តីប្រកាស លើកឡើងថា ប្រជាពលរដ្ឋ ដែលមានកំហុសឆ្គងទិន្នន័យ អាចដាក់ពាក្យស្នើសុំ​កែតម្រូវ​ទិន្នន័យ ឬមោឃភាពទិន្នន័យ នៃបញ្ជី​អត្រានុកូលដ្ឋាន តាមរយៈ​រដ្ឋបាល​ក្រុងស្រុកខណ្ឌ នៃឃុំសង្កាត់ ដែលបងប្អូនបានចុះបញ្ជីអត្រានុកូលដ្ឋាន ឬជម្រើសមួយទៀត ប្រជាពលរដ្ឋ អាចមកដាក់ពាក្យដោយផ្ទាល់នៅនាយកដ្ឋាន​អត្រានុកូលដ្ឋាន អគ្គនាយកដ្ឋានអត្តសញ្ញាណកម្ម​។

សេចក្តីបំភ្លឺដដែល លើកឡើងថា កំហុសទិន្នន័យនៃឯកសារអត្រានុកូលដ្ឋានរបស់​បងប្អូន​ប្រជាពលរដ្ឋ មានលក្ខណៈចម្រុះ និងស្មុគស្មាញ។ កំហុសមួយចំនួន បានកើតឡើងដោយអចេតនា កំហុសមួយចំនួន បានកើតឡើងដោយ​កង្វះការប្រុងប្រយ័ត្នរបស់មន្ត្រីជំនាញ និងកំហុសមួយចំនួនទៀត បានកើតឡើង ដោយសារបងប្អូន​ប្រជាពលរដ្ឋខ្លះ បានផ្តល់ទិន្នន័យមិនត្រឹមត្រូវ​ ក្នុងគោលបំណង​ដំឡើង​អាយុ ឬកែទិន្នន័យ​ផ្សេងទៀត ដើម្បីបំពេញបែបបទទៅបម្រើ​ការងារ ឬបំពេញតម្រូវ​ការផ្សេងៗ។

ទោះជាយ៉ាងណា អគ្គនាយកដ្ឋាន​អត្តសញ្ញាណកម្ម កំពុងបន្ត​ប្រឹងប្រែង​សហការជាមួយភាគីពាក់ព័ន្ធទាំងអស់ សំដៅដោះស្រាយបញ្ហាផងទាំងពួង ឱ្យបានសមស្រប​ជូនប្រជាពលរដ្ឋ ស្របតាមទស្សនៈវិស័យ​ ដែលបានកំណត់នៅក្នុងផែនការ​យុទ្ធសាស្ត្រជាតិ ស្តីពី អត្តសញ្ញាណកម្ម ឆ្នាំ២០១៧-២០២៦ គឺ «មនុស្សគ្រប់រូប ត្រូវបានកំណត់អត្តសញ្ញាណ» និង «មនុស្សម្នាក់ មានអត្តសញ្ញាណតែមួយ»៕