ជុំវិញការលើកលែងទិដ្ឋាការរបស់ថៃ ចំពោះអ្នកទេសចរចិន
ប្រទេសថៃ ៖ ចាប់តាំងពីថ្ងៃទី២៥កញ្ញាទៅ ពលរដ្ឋចិនដែលមកកាន់ប្រទេសថៃគឺមិនចាំបាច់មាន
ប្រទេសថៃ ៖ ចាប់តាំងពីថ្ងៃទី២៥កញ្ញាទៅ ពលរដ្ឋចិនដែលមកកាន់ប្រទេសថៃគឺមិនចាំបាច់មានទិដ្ឋាការឡើយ ដែលបែបនេះជាការទាក់ទាញអ្នកទេសចរមកកាន់ថៃ ដែលតាមធម្មតាច្រើនបំផុតគឺជនជាតិចិន។
តាំងពីបញ្ចប់ការឆ្លងរាលដាលនៃកូវីដមក និងការងើបឡើងវិញនៃទេសចរណ៍ ថៃមានគោលដៅទាក់ទាញអ្នកទេសចរមកពីចិនឲ្យបានច្រើនបំផុត ព្រោះតាំងពីដើមរៀងមកអ្នកទេសចរចិនមកកាន់ប្រទេសនេះមានច្រើនជាងគេ។ នាយករដ្ឋមន្ត្រីថៃលោកសេដ្ឋាថាវីស៊ីន បានមកកាន់ព្រលានយន្តហោះទទួលអ្នកទេសចរចិនដំបូងៗ ដែលសម្រុកមកកាន់ប្រទេសលោក ដែលចាប់ពីពេលនេះទៅពួកគេទទួលបានកម្មវិធីសាកល្បងលើកលែងទិដ្ឋាការ ដើម្បីជម្រុញទេសចរណ៍ថៃ។ កម្មវិធីសាកល្បងនោះ ចាប់អនុវត្តពីពាក់កណ្ដាលខែកញ្ញាទៅ និងមានសុពលភាពរហូតដល់ថ្ងៃទី២៩កុម្ភៈឆ្នាំ២០២៤។
លើសពីនេះទៀតពលរដ្ឋចិនមកកាន់ថៃ អាចស្នាក់នៅយូរដល់១ខែក្នុងប្រទេសថៃ ដោយមិនចាំបាច់មានទិដ្ឋាការ ដូចគ្នានឹងភ្ញៀវមកពីអឹរ៉ុបដែរ។ នេះបើតាមសេចក្ដីរាយការណ៍របស់វិទ្យុបារាំងអន្តរជាតិ។ ទិសដៅចម្បងនៃកម្មវិធីនេះគឹទាក់ទាញស្រូបយកអ្នកទេសចរចិន ដែលតែងមានច្រើនតាំងពីមុនមានការឆ្លងរាលដាលនៃកូវីដ។ ចំនួនអ្នកទេសចរចិនមកថៃក្នុងឆ្នាំ២០១៩មានដល់១១លាននាក់ ទល់នឹង៣០០.០០០នាក់ប៉ុណ្ណោះក្នុងឆ្នាំ២០២២។
អាជ្ញាធរថៃពេលនេះសាកល្បងស្រូបទាញអ្នកទេសចរចិនឲ្យបានច្រើនលើកស្ទួយឡើងវិញវិស័យទេសចរណ៍ ជាវីស័យសំខាន់បំផុតនៃសេដ្ឋកិច្ចជាតិដោយតំណាងឲ្យ២០%នៃផលទុនជាតិសរុប។ ក្រៅពីអ្នកទេសចរចិន អ្នកទេសចរកាហ្សាក់ស្ថានក៏ទទួលបានការលើកលែងទិដ្ឋាការដែរ។ ចាប់តាំងពីការប្រកាសកម្មវីធីនោះមក អ្នកកក់ទុកសម្រាប់ការមកលេងថៃ កំពុងមានការកើនខ្ពស់ខ្លាំងបំផុតដល់គុណនឹង១០។ នេះជាការអះអាងរបស់មេដឹកនាំថៃនៅព្រលានយន្តហោះសុវណ្ណភូមិក្រុងបាងកក។
ទោះបីយ៉ាងណា បើតាមអ្នកកាសែតចិនម្នាក់ប្រចាំការនៅក្រុងបាងកកថា ការលើកលែងទិដ្ឋាការ នៅមិនទាន់គ្រប់គ្រាន់ឡើយសម្រាប់ការហូរចូលយ៉ាងគំហុកនៃអ្នកទេសចរចិន។ ការស្រុតចុះនៃកំណើនសេដ្ឋកិច្ចចិន ការកើនឡើងនៃតម្លៃសំបុត្រយន្តហោះនិងតម្លៃបន្ទប់សណ្ឋាគារនៅថៃ នឹងបន្តរារាំងជនជាតិចិនមួយចំនួនក្នុងការធ្វើដំណើរដើរលេងនៅបរទេស។
លើសពីនេះទៀតមានពាក្យចចាមអារ៉ាមនានា តាមបណ្ដាញសង្គមចិនដែលថា ពួកអ្នកធ្វើដំណើរមកកាន់អាស៊ីអាគ្នេយ៍ អាចជួបប្រទះការចាប់ពង្រត់ ដើម្បីយកទៅឲ្យធ្វើការដោយចាប់បង្ខំនៅមីយ៉ាន់ម៉ាឬកម្ពុជា។ មានរហូតដល់ពាក្យចចាមអារ៉ាមពីការរត់ពន្ធសេរីរាងមនុស្សទៀតផង។ ពាក្យចចាមអារ៉ាមទាំងអស់នោះហើយទើបបណ្ដាលឲ្យមានការប៉ះពាល់ ដល់ការសម្រេចចិត្តរបស់បណ្ដាពលរដ្ឋចិនដែលពុំសូវមានទម្លាប់ធ្វើដំណើរចេញក្រៅប្រទេស៕
ចែករំលែកព័តមាននេះ