ខេត្តសៀមរាប៖ កម្មករក្រុមហ៊ុនខ្សែកាបអនឡាញចំនួន៣នាក់កំពុងឡើងតខ្សែកាប ក៏ភ្លាត់ស្នៀតបណ្តាលឱ្យឆក់ស្លាប់២នាក់ធ្លាក់ចូលទៅក្នុងដីឡូត៍មួយកន្លែង ខណៈយកកាំជណ្តើរឡើងបំពាក់ខ្សែកាបនៅលើបង្គោលភ្លើង ។ ហេតុការណ៍ឆក់ស្លាប់បុគ្គលិកក្រុមហ៊ុនខ្សែកាបអនឡាញនេះបានកើតឡើងនៅថ្ងៃទី២៧ កញ្ញា ឆ្នាំ២០២៣ វេលាម៉ោង១០និង៣០នាទីព្រឹក ស្ថិតនៅចំណុចបង្គោលខ្សែភ្លើងមុខដីទំនេរមួយកន្លែង…
ខេត្តសៀមរាប៖ កម្មករក្រុមហ៊ុនខ្សែកាបអនឡាញចំនួន៣នាក់កំពុងឡើងតខ្សែកាប ក៏ភ្លាត់ស្នៀតបណ្តាលឱ្យឆក់ស្លាប់២នាក់ធ្លាក់ចូលទៅក្នុងដីឡូត៍មួយកន្លែង ខណៈយកកាំជណ្តើរឡើងបំពាក់ខ្សែកាបនៅលើបង្គោលភ្លើង ។ ហេតុការណ៍ឆក់ស្លាប់បុគ្គលិកក្រុមហ៊ុនខ្សែកាបអនឡាញនេះបានកើតឡើងនៅថ្ងៃទី២៧ កញ្ញា ឆ្នាំ២០២៣ វេលាម៉ោង១០និង៣០នាទីព្រឹក ស្ថិតនៅចំណុចបង្គោលខ្សែភ្លើងមុខដីទំនេរមួយកន្លែង ស្ថិតក្នុងភូមិដូនហុង ឃុំដំដែក ស្រុកសូទ្រនិគម ខេត្តសៀមរាប ។
លោកវរសេនីយ៍ឯក ឃឹម ផល្លា អធិការនគរបាលស្រុកសូទ្រនិគមបានប្រាប់ថា ជនរងគ្រោះដែលត្រូវខ្សែភ្លើងឆក់ស្លាប់ចំនួន២នាក់ ១-ឈ្មោះធា បុណ្យ ហៅប៊ួក ភេទប្រុស អាយុ១៨ឆ្នាំ ជាកម្មករខ្សែកាបអនឡាញ រស់នៅភូមិទ្រា ឃុំស្វាយជ្រុំ ស្រុកមេសាង ខេត្តព្រៃវែង ។ ២-ឈ្មោះអាន យូ ភេទប្រុស អាយុ៣៦ឆ្នាំ ជាកម្មករខ្សែកាបអនឡាញ រស់នៅភូមិព្រៃព្រះអណ្តូង ឃុំស្វាយជ្រុំ ស្រុកមេសាង ខេត្តព្រៃវែង ។
យោងតាមការបំភ្លឺរបស់សាក្សីដែលជាក្រុមការងារធ្វើការជាមួយសពនៅកន្លែងកើតហេតុបានឱ្យដឹងថា ក្រុមការងារខ្លួនបានចុះធ្វើការអូសខ្សែកាបចំនួន១២នាក់មកពីខេត្តព្រៃវែង ហើយបានចុះមកអូសខ្សែកាបនៅក្នុងខេត្តសៀមរាប តាំងពីថ្ងៃទី២០ កញ្ញា ២០២៣ ។ ពួកខ្លួនបានសុំចៅអធិការវត្តខ្សាច់ ដើម្បីស្នាក់នៅបណ្ដោះអាសន្ន ស្ថិតក្នុងស្រុកប្រាសាទបាគង ជាប់ព្រំប្រទល់ស្រុកសូទ្រនិគម ។ លុះដល់ថ្ងៃទី២៧ ខែកញ្ញា ឆ្នាំ ២០២៣ ក្រុមការងារខ្លួនបានចុះមកអូសខ្សែកាបនៅក្នុងឃុំដំដែក ស្រុកសូទ្រនិគម ដោយបែងចែកជា០២ក្រុម ។ ក្រុមទី១មានគ្នាចំនួន០៧នាក់ អូសនៅមុខផ្សារដំដែក និងមួយក្រុមទៀត(ពួកខ្លួន)មានគ្នា ចំនួន០៥នាក់ ១-ឈ្មោះយូ (សព) ។ ២-ឈ្មោះ បុណ្យ ហៅប៊ួក (សព) ។ ៣-ឈ្មោះ ស្រស់ ៤-ឈ្មោះ អ៊ឹម ។ ៥-ឈ្មោះ ហៃ ទៅអូសខ្សែកាប ក្នុងភូមិដូនហុង នៅទិសខាងលិច ។
លុះដល់ម៉ោង១០ និង៣០នាទីព្រឹកថ្ងៃទី២៧ កញ្ញា ឆ្នាំ២០២៣ ក្រុមខ្លួនដែលមានគ្នា០៥នាក់ បានអូសខ្សែកាបដល់បង្គោលភ្លើងមួយនៅក្នុងទឹកមុខដីទំនេរមួយកន្លែង ពេលនោះឈ្មោះធា បុណ្យ ហៅប៊ួក និង ឈ្មោះអាន យូ បានយកជណ្តើរដែកទៅដាក់ផ្អែកនឹងបង្គោលភ្លើងដែលនៅក្នុងទឹក រួចឈ្មោះធា បុណ្យ ហៅប៊ួក ជាអ្នកឡើងជណ្តើរ ហើយឈ្មោះអាន យូ ជាអ្នកទប់ជណ្តើរខាងក្រោម ។ ស្រាប់តែពេលនោះ ជណ្តើរបានរអិលទៅប៉ះប្រអប់គីឡូភ្លើងបណ្តាលឱ្យឆក់ទាំង០២នាក់ស្លាប់តែម្តង ។
ភ្លាមៗនោះ ពួកខ្លួនមានគ្នា០៣នាក់ បានព្យាយាមរកកំណាត់ឈើមកទាញជណ្តើរទំលាក់ចេញពីបង្គោលភ្លើង ហើយបានយកជនរងគ្រោះទាំង០២នាក់ មកធ្វើចលនាបេះដូង តែនៅតែមិនដឹងខ្លួន ។ បន្ទាប់មក ពួកខ្លួនបានកាក់ម៉ូតូតាមផ្លូវ ជិះមកហៅឡានពេទ្យដឹកទៅមន្ទីរពេទ្យបង្អែកស្រុកសូទ្រនិគម និងរាយការណ៍ជូនសមត្ថកិច្ច ។ ពេលដឹកមកដល់ ក្រុមគ្រូពេទ្យបានជួយពិនិត្យ ហើយប្រាប់ថាជនរងគ្រោះទាំង ០២នាក់ បានស្លាប់បាត់បង់ជីវិតទៅហើយ ។
តាមរយៈការពិនិត្យវិភាគកន្លែងកើតហេតុ និងការបំភ្លឺសាក្សី ព្រមទាំងការបញ្ជាក់របស់ក្រុមគ្រូពេទ្យ យើងសន្និដ្ឋានថា សពទាំង២នាក់ពិតជាបានស្លាប់ដោយសារឆក់ខ្សែភ្លើងប្រាកដមែន ។ បច្ចុប្បន្ន សមត្ថកិច្ចយើងបានធ្វើកំណត់ ហេតុប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី ។
ចែករំលែកព័តមាននេះ