ខេត្តកំពង់ឆ្នាំង ៖ ប្រជាកសិករភូមិអណ្ដូងរនុក ឃុំត្រងិល ស្រុកកំពង់លែង ប្រមាណជាង៩០ភាគរយបានបន្តមរតកពីដូនតា គឺត្បាញកន្ទេលក្រហម ដើម្បីទ្រទ្រង់ជីវភាពប្រចាំថ្ងៃក្រៅពីការងារស្រែចម្ការ ។ មុខរបរមួយនេះបានធ្វើឱ្យពួកគាត់មានជីវភាពសមរម្យ…
ខេត្តកំពង់ឆ្នាំង ៖ ប្រជាកសិករភូមិអណ្ដូងរនុក ឃុំត្រងិល ស្រុកកំពង់លែង ប្រមាណជាង៩០ភាគរយបានបន្តមរតកពីដូនតា គឺត្បាញកន្ទេលក្រហម ដើម្បីទ្រទ្រង់ជីវភាពប្រចាំថ្ងៃក្រៅពីការងារស្រែចម្ការ ។ មុខរបរមួយនេះបានធ្វើឱ្យពួកគាត់មានជីវភាពសមរម្យ ព្រោះយ៉ាងហោចណាស់ ក្នុង១គ្រួសារអាចរកចំណូលបានពី៦ទៅ៨លានរៀល ក្នុងមួយឆ្នាំដែរ ដោយមិនសូវចំណាយទុនប៉ុន្មានឡើយ ។
ស្ត្រីឈ្មោះ ប៉ាង ស៊ីម អាយុ៤៨ឆ្នាំ ជាកសិក ររស់នៅភូមិអណ្ដូងរនុក បានឲ្យដឹងថា ៖ ក្រៅពីការងារស្រែចម្ការផ្ទះណាក៏ដូចជា ផ្ទះណាដែរ សុទ្ធតែចាប់មុខរបរត្បាញកន្ទេលក្រហម ។ ការត្បាញកន្ទេលក្រហមនេះ គឺចំណាយតែលើថ្លៃទិញល័ក្ខតែមួយមុខប៉ុណ្ណោះ ចំណែកឯវត្ថុធាតុដើមមានកក់ និងក្រចៅ គឺដាំដុះដោយខ្លួនឯង រួមទាំងអុស សម្រាប់ស្ងោទឹកល័ក្ខក៏ត្រូវទៅរកទុកដុតដោយខ្លួនឯងដែរ ។
ក្នុងមួយរដូវផ្ទះខ្លះត្បាញបាន១០០កន្ទេល និងខ្លះច្រើនជាងនេះតាម កក់បានតិច ឬច្រើន និងតាមសមាជិកគ្រួសារដែលជួយត្បាញគ្នា ហើយបើគិតជាមធ្យមក្នុងមួយគ្រួសារអាចរកចំណូលបានពី៦ទៅ៨លានរៀលក្នុង១ឆ្នាំ ។ សម្រាប់ថ្លៃល័ក្ខដែលទិញយកមកជ្រលក់កក់ អោយក្លាយជាពណ៌ខៀវ ក្រហម ឬលឿងតាមតម្រូវការក្នុងមួយរដូវចំណាយអស់ប្រមាណជាង១៥ទៅ២០ម៉ឺនរៀលប៉ុណ្ណោះ ។
ដោយឡែក កក់សម្រាប់យកមកត្បាញជាកន្ទេល គឺរាល់ឆ្នាំពួកគាត់តែងទុកគ្រាប់ជាប្រចាំ ហើយពេលដល់ខែពួកគាត់ចាប់ផ្តើមសាបគ្រាប់កក់ រួមទាំងគ្រាប់ដើមក្រចៅដែលត្រូវយកមកវេញជាខ្សែសម្រាប់ត្បាញ ក៏ត្រូវសាបគ្រាប់ដែរ រយៈពេល២ខែកន្លះ និងច្រូតកាត់យករឹតវាអោយសំប៉ែត ចំណែកក្រចៅត្រូវកាប់ដើមយកមកបកយកសំបកវេញជាខ្សែដែរ ។
ស្ត្រីជាកសិកររូបនោះបានបន្តថា ៖ ពេលជ្រលក់កក់អោយក្លាយជាពណ៌តាមតម្រូវការ និងវេញខ្សែក្រចៅ ហើយពួកគាត់ចាប់ផ្តើមត្បាញជាកន្ទេលហើយ ក្នុងមួយផ្ទះយ៉ាងហោចណាស់ ក៏ត្បាញបានកន្ទេលមួយដែរក្នុង១ថ្ងៃ បើផ្ទះខ្លះមានមានមនុស្សច្រើនអាចបានកន្ទេល២ក្នុងមួយថ្ងៃ ។ ចំណែកកន្ទេលមួយលក់ថ្លៃពី៦ទៅ១០ម៉ឺនរៀលតាមតូចតាមធំ ហើយកន្ទេលទាំងនោះមានម៉ូយមកយកដល់ផ្ទះ តែពេលខ្លះក៏មានអ្នកប្រើប្រាស់មកទិញដោយផ្ទាល់ដែរ ។
ជាចុងក្រោយពួកគាត់សំណូមពរដល់អតិថិជនដែលប្រើប្រាស់កន្ទេលក្រហម សូមជួយទិញកន្ទេលក្រហមអ្នកភូមិអណ្ដូងរនុកនេះផងព្រោះមានគុណភាពទាំងជាប់ និងពណ៌បានយូរដល់ទៅ៥-៦ ឆ្នាំឯណោះលើកលែងតែកណ្ដុរកាត់ ។
តាមអាជ្ញាធរមូលដ្ឋានបានបញ្ជាក់ថា អ្នកភូមិអណ្ដូងមានប្រមាណ ៩០% បានឈ្លាតប្រកបរបរត្បាញកន្ទេល ក្រៅពីការងារស្រែចម្ការ និង នេសាទ ។ រដូវត្បាញកន្ទេលមានរយៈពេលតែជាង២ទៅ៣ខែប៉ុណ្ណោះ គឺចាប់ពីសីហា ដល់ខែតុលា តែខ្លះក៏ដល់ខែវិច្ឆិកាដែរ ដោយសារតែសល់កក់ត្បាញមិនទាន់ផុតខែនឹងពួកគាត់បញ្ចប់មុខរបរនេះហើយ និយាយជារួមមួយរដូវ ចាប់ពីសាបគ្រាប់កក់គ្រាប់ដើមក្រចៅរហូតដល់ផលិតផលសម្រេច និងត្រូវបញ្ចប់មានរយៈពេល៦ខែ ។
ប្រជាពលរដ្ឋក្នុងភូមិអណ្តូងរនុកមាន១៩៥គ្រួសារ មានអ្នកត្បាញកន្ទេលប្រមាណ៩៥% ដោយសារមុខរបរបន្ថែមនេះធ្វើឱ្យពួកគាត់មានជីវភាពសមរម្យ៕
ចែករំលែកព័តមាននេះ