ADផ្ទាំងផ្សព្វផ្សាយពាណិជ្ជកម្ម

Picture

ចិន​ចាប់ជំរិត​វៀតណាម អាវុធហត្ថ​រាជធានី​ភ្នំពេញ បង្ក្រាប​បាន​ម្នាក់ រត់គេច​២​នាក់ រំដោះ​ជន​រង​គ្រោះ​២​នាក់​ឪពុក ​និង​កូនស្រី

6 ខែ មុន

រាជធានី​ភ្នំពេញ ៖ កម្លាំង​កង​អាវុធហត្ថ​រាជធានី​ភ្នំពេញ បាន​ប្រដេញ​បង្ក្រាប​ឧក្រិដ្ឋជន​១​ក្រុម ដែល​បាន​ធ្វើ​សកម្មភាព​ចាប់​ឪពុក និង​កូនស្រី ដែល​ជា​ជនជាតិ​វៀតណាម ដើម្បី​ជំរិត​ទារប្រាក់ ហើយ​នៅ​ក្នុង​ប្រតិបត្តិការ​ដេញ​បង្ក្រាប​នោះ ក្រុម​ឧក្រិដ្ឋជន​បាន​បាញ់…

រាជធានី​ភ្នំពេញ ៖ កម្លាំង​កង​អាវុធហត្ថ​រាជធានី​ភ្នំពេញ បាន​ប្រដេញ​បង្ក្រាប​ឧក្រិដ្ឋជន​១​ក្រុម ដែល​បាន​ធ្វើ​សកម្មភាព​ចាប់​ឪពុក និង​កូនស្រី ដែល​ជា​ជនជាតិ​វៀតណាម ដើម្បី​ជំរិត​ទារប្រាក់ ហើយ​នៅ​ក្នុង​ប្រតិបត្តិការ​ដេញ​បង្ក្រាប​នោះ ក្រុម​ឧក្រិដ្ឋជន​បាន​បាញ់ និង​បើករថយន្ត​បំ​បុក​រថយន្ត​កងរាជអាវុធហត្ថ រហូត​ធ្វើ​ឲ្យ​កងកម្លាំង​អាវុធហត្ថ ផ្ទុះអាវុធ​ជា​ច្រើន​គ្រាប់ តបត​វិញ ដោយ​បាន​បាញ់​បំបែក​កង់​រថយន្ត​ក្រុម​ជនសង្ស័យ ទើប​ឃាត់ខ្លួន​បាន​ម្នាក់ និង​រត់​រួច ២​នាក់ ហើយ​កងកម្លាំង ក៏​បាន​រំដោះ​បាន​ជន​រង​គ្រោះ​២​នាក់ ឪពុក​និង​កូនស្រី មក​វិញ​ផង​ដែរ ។

ហេតុការណ៍​ចាប់ជំរិត​នេះ បាន​បង្ក​ឲ្យ​មានការ​ភ្ញាក់ផ្អើល​ឡើង នៅ​វេលា​ម៉ោង​០៦​និង​១០​នាទី​ល្ងាច​ថ្ងៃ​ទី​២២ ខែកញ្ញា ឆ្នាំ​២០២៣​នេះ នៅ​តាម​ផ្លូវ​ក្រ​វ៉ា​ត់​ក្រុង​ទី​៣ ត្រង់​ចំណុច​ភ្លើងស្តុប ភូមិ​ភូម​ត្រាំ​ស្លឹក សង្កាត់​កន្ទោក ខណ្ឌ​កំ​បូល រាជធានី​ភ្នំពេញ ។

តាម​ប្រភព​ព័ត៌មាន បាន​ឲ្យ​ដឹង​ថា ក្រុម​ឧក្រិដ្ឋជន គឺជា​ជនជាតិ​ចិន មាន​គ្នា​០៣​នាក់ បាន​ចាប់​បុរស​ជនជាតិ​វៀតណាម​ម្នាក់ រួម​ជាមួយ​កូនស្រី​ម្នាក់ ដឹក​តាម​រថយន្ត​មួយ​គ្រឿង ម៉ាក ALPHARD ពណ៌​ស ពាក់​ស្លាក​លេខ ភ្នំពេញ 2BX-2282 ដើម្បី​ជំរិត​ទារប្រាក់ ប៉ុន្តែ​ពុំ​ទាន់​មាន​ប្រភព​ណាមួយ​អះអាង​ពី​ចំនួន​ទឹកប្រាក់ ដែល​ត្រូវ​ជំរិត​ទារ​យក នោះ​នៅឡើយ​ទេ ។

ប្រភព​ព័ត៌មាន បាន​បន្ត​ថា សកម្មភាព​ជំរិត​ទារប្រាក់​នោះ បាន​បែកធ្លាយ​ដល់​មន្ត្រី​កងរាជអាវុធហត្ថ ហើយ​កម្លាំង​កងរាជអាវុធហត្ថ​រាជធានី​ភ្នំពេញ បាន​តាម​ជាប់​រហូត ដោយ​មុន​ដំបូង ក្រុម​ឧក្រិដ្ឋជន បាន​បើករថយន្ត ដឹក​ជន​រង​គ្រោះ ២​នាក់​ឪពុក និង​កូនស្រី នាំ​ទៅ​ឈប់​ចត នៅ​តាម​មហាវិថី​សហព័ន្ធ​រុ​ស្ស៊ី​ត្រង់​ចំណុច​មុខ​អាកាសយានដ្ឋាន​អន្តរជាតិ​ភ្នំពេញ សង្កាត់​កា​កាប​ទី​១ ក្នុង​ខណ្ឌ​ពោធិ៍​សែន​ជ័យ ។

ប្រភព​ដដែល បាន​ប្រាប់​ឲ្យ​ដឹង​ទៀត​ថា ពេល​នោះ ក្រុម​ឧក្រិដ្ឋជន បានដឹង​ខ្លួន​ថា មាន​កម្លាំង​កងរាជអាវុធហត្ថ តាម​ពីក្រោយ ក៏​បាន​បើករថយន្ត​ដឹក​ជន​រង​គ្រោះ រត់គេច​ខ្លួន ទើប​កម្លាំង​ជំនាញ​ប្រដេញ​តាម រហូត​ដល់​ផ្លូវ​ក្រវាត់ក្រុង​ទី​៣ ត្រង់​ចំណុច​ដូច​ខាងលើ ខណៈនោះ ក្រុម​ឧក្រិដ្ឋជន ដក​កាំភ្លើងខ្លី​បាញ់​មក​លើ​កម្លាំង​កងរាជអាវុធហត្ថ ព្រមទាំង​បើករថយន្ត​បំ​បុក​រថយន្ត​កងកម្លាំង បណ្ដាល​ឲ្យ​រង​ការ​ខូចខាត​រថយន្ត​១​គ្រឿង ម៉ាក​ហា​យ​ឡែ​ន​ឌ័​រ ពណ៌​ស្ករ ពាក់​ស្លាក​លេខ ភ្នំពេញ 2BP-0343 ហើយ​រថយន្ត​ម៉ាក ALPHARD របស់​ក្រុម​ឧក្រិដ្ឋជន ក៏​រង​ការ​ខូចខាត ផង​ដែរ ។

ប្រភព​ខាងលើ បាន​ប្រាប់​បន្ថែម​ថា ខណៈនោះ កម្លាំង​កងរាជអាវុធហត្ថ ក៏​បាន​ផ្ទុះអាវុធ​ជា​ច្រើន​គ្រាប់ តបត​វិញ ដោយ​បាន​បាញ់​បំបែក​កង់​រថយន្ត​ក្រុម​ជនសង្ស័យ ហើយ​ឃាត់ខ្លួន​ម្នាក់ រីឯ ២​នាក់​ទៀត​រត់​រួចខ្លួន​ពី​កន្លែង​កើតហេតុ ចំណែក​ជន​រង​គ្រោះ​២​នាក់​ឪពុក និង​កូនស្រី ដែល​ជា​ជនជាតិ​វៀតណាម ត្រូវ​បាន​កងកម្លាំង​កងរាជអាវុធហត្ថ រំដោះ​បាន​មក​វិញ ដោយ​សុវត្ថិភាព ផង​ដែរ ។

បន្ទាប់​មក កម្លាំង​កងរាជអាវុធហត្ថ បាន​នាំ​ខ្លួន​ជនសង្ស័យ​ទៅ​កាន់​ទីបញ្ជាការ​ការ​អាវុធហត្ថ​រាជធានី​ភ្នំពេញ ដើម្បី​សួរនាំ និង​តាម​ឃាត់ខ្លួន​បក្ខពួក​ដែល​កំពុង​រត់គេច​ខ្លួន​បន្ត​ទៀត ៕

អត្ថបទសរសេរ ដោយ

កែសម្រួលដោយ