ស្នងការដ្ឋាននគរបាលរាជធានីបំភ្លឺជុំវិញការឃាត់ខ្លួនអ្នកលក់ផ្លែត្របែក បញ្ជូនទៅតុលាការ
- ភ្នំពេញ
រាជធានីភ្នំពេញ ៖ បន្ទាប់ពីមានការផ្សព្វផ្សាយតាមបណ្តាញសង្គម និងសារព័ត៌មានមួយចំនួន ជុំវិញ
រាជធានីភ្នំពេញ ៖ បន្ទាប់ពីមានការផ្សព្វផ្សាយតាមបណ្តាញសង្គម និងសារព័ត៌មានមួយចំនួន ជុំវិញការឃាត់ខ្លួនអ្នកលក់ផ្លែត្របែក និងផ្លែពុទ្រា នៅខណ្ឌសែនសុខ បញ្ជូនទៅកាន់សាលាដំបូងរាជធានីភ្នំពេញ នៅរសៀលថ្ងៃទី២២ ខែ កញ្ញា ឆ្នាំ ២០២៣នេះ ក្រុមការងារព័ត៌មាន និងប្រតិកម្មរហ័ស នៃ ស្នងការដ្ឋាននគរបាលរាជធានីភ្នំពេញ ក៏បានបកស្រាយ និងបំភ្លឺជូនសាធារណជនឱ្យបានជ្រាបថា៖
មន្ត្រីនៃអធិការដ្ឋាននគរបាលខណ្ឌសែនសុខ ចាប់ឃាត់ខ្លួនអ្នកលក់ផ្លែត្របែក ផ្លែពុទ្រា អ្នកសុំទាន ជនពិការ កុមារ និងអ្នកពាក់ព័ន្ធសរុបចំនួន១៤នាក់ នៅចំណុចភ្លើងស្តុបណូគា និងស្តុបណតប្រ៊ីដ ខណ្ឌសែនសុខ រាជធានីភ្នំពេញ កាលពីយប់ថ្ងៃទី១៩ ខែកញ្ញា ឆ្នាំ២០២៣។
ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក៏បានបញ្ជាទៅលោកអធិការនគរបាលខណ្ឌសែនសុខ លោកវរសេនីយ៍ឯក ហួរ ម៉េង វ៉ាង ដើម្បីធ្វើការបំភ្លឺបកស្រាយជុំវិញការចោទប្រកាន់ខាងលើ។
បើយោងតាមរបាយការណ៍របស់អធិការដ្ឋាននគរបាលខណ្ឌសែនសុខ បំភ្លឺឱ្យដឹងថា នៅយប់ថ្ងៃទី១៩ ខែកញ្ញា ឆ្នាំ២០២៣ ដោយមានការអនុញ្ញាតពីគណៈបញ្ជាការឯកភាពខណ្ឌសែនសុខ ដឹកនាំដោយលោក ញាណ ចន្ថាវេរ៉ា អភិបាលរងខណ្ឌ បានចុះប្រមូលជនអនាថា ជនពិការភាពដើរសុំលុយ និងអ្នកលក់ផ្លែឈើ នៅតំបន់ស្តុបណតប្រ៊ីដ ផ្លូវលេខ២០០៤ សង្កាត់អូរបែកក្អម ខណ្ឌសែនសុខ រាជធានីភ្នំពេញ សរុបចំនួន១៤នាក់ (ស្រីចំនួន៥នាក់) ក្នុងនោះមាន ជនមានពិការភាព ចំនួន៥នាក់ ស្រី១នាក់ (អាយុពី៣២ឆ្នាំ ដល់អាយុ៦២ឆ្នាំ) ច្រៀងសុំលុយតាមស្តុប, កុមារចំនួន៥នាក់ កុមារីចំនួន២នាក់ (អាយុ០២ឆ្នាំ ដល់អាយុ១៣ឆ្នាំ) លក់ផ្លែពុទ្រាតាមស្តុប, មនុស្សពេញវ័យ និងមានកាយសម្បទាមាំមួន ចំនួន៤នាក់ (ស្រី២នាក់) ដើរលក់ផ្លែពុទ្រាតាមស្តុប។
ចំពោះអ្នកទាំង១៤ខាងលើនេះ រដ្ឋបាលខណ្ឌសែនសុខ បានបញ្ជូន ទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ចំនួន១១នាក់ (ស្រី៤នាក់) ដោយឡែករដ្ឋបាលខណ្ឌសែនសុខ មានការសង្ស័យ ចំពោះមុខសញ្ញាបុគ្គល ចំនួន០៣នាក់ (ស្រី១នាក់) ត្រូវបានសង្ស័យញុះញង់ និងជួញដូរកម្លាំងពលកម្មលើកុមារ និងជនពិការ ដោយមានការឯកភាពពីលោក សេង ពុទ្ធី ព្រះរាជអាជ្ញារង អមសាលាដំបូងរាជធានីភ្នំពេញ ហើយក៏បានបញ្ជូនជនសង្ស័យទាំង០៣នាក់ ទៅប៉ុស្តិ៍នគរបាលរដ្ឋបាលអូរបែកក្អម ដើម្បីសាកសួរ និងអនុវត្តតាមនីតិវិធី។
ជនសង្ស័យ ទាំង៣នាក់រួមមាន១-ឈ្មោះ យិន សុផន ភេទប្រុស អាយុ៦២ឆ្នាំ , ២-ឈ្មោះ សំ សុជុន ភេទប្រុស អាយុ៣៧ឆ្នាំ និង៣-ឈ្មោះ ចេង ឆេងហឿន ភេទស្រី អាយុ៣៧ឆ្នាំ។ ជនសង្ស័យទាំង៣នាក់នេះក៏ ត្រូវបានបញ្ជូនមកអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី។
ដោយផ្អែកតាមចម្លើយសារភាពរបស់ជនសង្ស័យទាំង៣នាក់ និងតាមការបំភ្លឺរបស់ជនជាប់ពាក់ព័ន្ធខាងលើ ក៏ធ្វើការឃាត់ខ្លួនបណ្តោះអាសន្នជនសង្ស័យទាំង០៣នាក់ បញ្ជូនសំណុំរឿងទៅអយ្យការអមសាលាដំបូងរាជធានីភ្នំពេញ នៅថ្ងៃទី២០ ខែកញ្ញា ឆ្នាំ២០២៣ ដើម្បីអនុវត្តតាមនីតិវិធី។
ក្រោយពីបញ្ជូនជនសង្ស័យទាំង៣នាក់នោះទៅដល់អយ្យការអមសាលាដំបូងរាជធានីភ្នំពេញ ដោយធ្វើការសាកសួរពួកគេទាំងបីនាក់នោះហើយ។
ជនសង្ស័យទាំង០៣នាក់ នៅថ្ងៃទី២១ ខែកញ្ញា ឆ្នាំ២០២៣ ដោយមានចំណារពីលោក ឆាយ ហុង ព្រះរាជអាជ្ញារង អមសាលាដំបូងរាជធានីភ្នំពេញ អនុញ្ញាតឱ្យជនសង្ស័យខាងលើត្រឡប់ទៅលំនៅឋានវិញ។ អាស្រ័យដូចបានជម្រាបជូនខាងលើ សូមសាធារណជនមេត្តាជ្រាបជាព័ត៌មាន។
ទន្ទឹមនោះ នៅក្នុងបណ្តាញសង្គម ក៍មានការរិះគន់ ថា គ្រាន់តែលក់ត្របែកតាមស្តុបសោះចាប់ប្រពន្ធនិងកូន របស់គាត់ទៅតុលាការដែរ និងខ្លះទៀតស្រែកថា អយុត្តិធម៌ ។ ចំណែក រដ្ឋបាលខណ្ឌសែនសុខ ក៍បានចាត់ទុកថា ជនអាណាថា អ្នកដើរសុំលុយតាមស្តុប និងក្រោមស្ពានអាកាសក្នុងភូមិ សាស្ត្រខណ្ឌសែនសុខ ដែលធ្វើអោយប៉ះពាល់ដល់សណ្តាប់ធ្នាប់សាធារណៈ សោភ័ណ្ឌភាពទីក្រុងនិងបង្កភាពរញ៉េរញ៉ៃតាមដងផ្លូវ ហើយកន្លងមកអាជ្ញាធរតែងចុះប្រមូលជាបន្តបន្ទាប់៕
គួរបញ្ជាក់ថា នាប៉ុន្មានថ្ងៃនេះ នៅក្នុងបណ្តាញសង្គម មានការស៊ែរតៗគ្នា ពីបុរសម្នាក់ ដែលជាប្តី បានស្រែកទ្រហោយំ និងប្រុងគិតខ្លី បន្ទាប់ពីប្រពន្ធនិងកូនរបស់ខ្លួន ដែលជាអ្នកលក់ត្របែក ត្រូវបានចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ។
ចែករំលែកព័តមាននេះ