បរទេស ៖ យោងតាមរយៈសារព័ត៌មានបរទេសដែលមានឈ្មោះថា «South China Morning Post» បានរាយការណ៍ប្រាប់ឱ្យដឹងអំពីការរិះគន់របស់អ្នកលេង Internet ចំពោះសម្លៀកបំពាក់នៃការបិទបាំងរបស់ទេពធីតាចិន ព្រមទាំងរូបរាង គឺហាក់បីដូចជាមិនត្រឹមត្រូវទាល់តែសោះ គឺមិនដូចគំរូដើមឡើយ។
តាមសេចក្តីការណ៍បានបញ្ជាក់ប្រាប់ឱ្យដឹងថា «រូបសំណាកទេពធីតា Peony នេះ ត្រូវបានគេបង្កើតឡើងនៅជនបទ ដែលមានទេសភាពដ៏ស្រស់ស្អាតមួយកន្លែង និងមានកម្ពស់៥,៨ម៉ែត្រ ដើម្បីធ្វើជាកន្លែងសម្គាល់ថ្មីនៅទីជនបទ នៃភូមិ Nansong ខេត្ត Henan ភាគកណ្តាលនៃប្រទេសចិន។ ហើយរូបសំណាកទេពធីតា Peony មួយនេះ ត្រូវសាងសង់ក្នុងរយៈពេល១ខែតែប៉ុណ្ណោះ ដោយស្នាដៃសិប្បករក្នុងស្រុកចំនួន២នាក់ និងចំណាយថវិការអស់ 80,000 យន់ (ស្មើនឹង 11,000 ដុល្លារអាមេរិក) ដែលបង់ដោយគណៈកម្មាធិការភូមិ»។
សេចក្តីរាយការណ៍បញ្ជាក់បន្តថា «បន្ទាប់មកឧទ្យានមួយនេះ ត្រូវបានគេសម្រេចបើកដំណើរការនៅក្នុងខែមេសា ឆ្នាំ២០២១ និងមានមន្ត្រីភូមិជាច្រើននាក់នាំគ្នាថតរូបជាមួយនឹងរូបសំណាកទេពធីតាចិននោះ ក្នុងពិធីដាក់បង្ហាញផងដែរ»។
សូមជំរាបផងដែរថា កាលពី១ខែមុន អ្នកភូមិបានណែនាំសិប្បករ២នាក់ដែលមាននាមត្រកូល Song និង Wang ដើម្បីធ្វើរូបសំណាក។ អ្នកទាំង២ ធ្វើដំណើរទៅសិក្សានៅសួន Wangcheng ស្ថិតក្នុងទីក្រុង Luoyang ដែលជាទីក្រុងធំមួយនៅក្នុងខេត្តល្បីល្បាញខាងការតាំងផ្កា peony ហើយក៏ថតរូបចម្លាក់ Peony Fairy ទុកជាឯកសារយោង សម្រាប់រូបចម្លាក់ដែលពួកគេគ្រោងនឹងបង្កើត។ បន្ទាប់មក អ្នកស្រុក អ្នកភូមិ និងគណៈកម្មាធិការ ក៏នាំគ្នាចេញមុខមកនិយាយ ដោយស្នើឱ្យសិប្បករក្នុងស្រុកទាំង២នាក់រូបនោះ មកសាងសង់រូបសំណាក់ទេពធីតាចិននេះ»។
សូមជំរាបបន្តថា ហើយក្នុងចំណោមសិល្បករទាំង២រូបដែលទទួលខុសត្រូវលើរូបចម្លាក់ ក៏បាននាំគ្នាសាងសង់រួចរាល់ជាស្ថាពរ និងប្រកាសបើកក្នុងពេលឆាប់ៗនេះតែម្ដង។ ប៉ុន្តែអ្វីដែលធ្វើឱ្យគ្រប់គ្នាសម្ដែងការហួសចិត្ត ផ្ទុះសំណើច និងនឹកស្មានពុំដល់ ហើយនិយាយលែងចេញទៅវិញនោះ គឺឃើញថា បន្ទាប់ពីរូបចម្លាក់ទេពធីតាចិនសាងសង់រួចរាល់នេះ ត្រូវគេមើលឃើញថា រូបមួយនេះ ដូចជាមានរូបរាងអាក្រក់ ពិបាកមើលខ្លាំងណាស់ ហើយបើនិយាយអំពីរូបរាងរូបសំណាកវិញ គឺខុសគ្នាដាច់ស្រឡះពីគំរូដើមតែម្ដង។ អាចនិយាយបានថា ទាំងការតុបតែង លាបពណ៌ គឺមិនត្រូវគ្នានឹងការបិទបាំង នៃរាងកាយទាល់តែសោះ រហូតធ្វើឱ្យរឿងមួយនេះ ក្លាយទៅជាប្រធានបទមួយ ផ្ទុះការរិះគន់ដូចទឹកបាក់ទំនប់ពាសពេញបណ្ដាញទំនាក់ទំនងសង្គមតែម្ដង។
ដោយមានមតិមួយចំនួន បានបញ្ចេញមតិរិះគន់ផង សើចចំអកពេបជ្រាយផងថា «រូបចម្លាក់ស្អីមិនដឹងទេ មើលទៅនាងហាក់ដូចជា មានរូបរាងមិនធម្មតាទាល់តែសោះ និងមិនសមស្របទៅតាមទម្រង់អញ្ចឹង អ្នកណាជាអ្នកសាងសង់រូបមួយនឹង»។ អ្នកខ្លះទៀតលើកឡើងថា «ទាំងចង្កេះមើលមិនចូលភ្នែក ដូចរាងវែង និងជើងខ្លីយ៉ាងម៉េចមិនដឹងទេ ពិតជាអាក្រក់មើលខ្លាំងណាស់ ខ្ញុំគិតថា អ្នករចនាច្បាស់ជាមានបញ្ហាសោភ័ណភាពហើយ តើអ្នកគិតថាទេវតានេះមានបញ្ហាក្រពេញទីរ៉ូអ៊ីតទេ? សូម្បីតែបំពង់.ករបស់នាង ក៏ពួកគេសាងសង់ហើមខ្លាំងដែរ ដូចមនុស្សពក.កអញ្ចឹង»។
ខណៈពេលដែលឃើញនៅការរិះគន់មិនឈប់ពីពុកម៉ែបងប្អូនរួចមក មន្ត្រីនៅក្នុងតំបន់ជនបទនោះ ក៏បានបើកចំហនៅចំណុចទាំងនោះ ដោយលោកធ្វើការអត្ថាធិប្បាយប្រាប់ចំពោះការលើកឡើងមិនល្អ និងការធ្វើឱ្យបងប្អូនរំពឹងទុកថានឹងល្អស្អាត តែផ្ទុយទៅវិញបែរជាអាក្រក់មើលនោះ គឺដោយសារតែជំនាញវិជ្ជាជីវៈនៅមានកម្រិតរបស់សិប្បករជនបទរបស់យើង។ ទើបធ្វើឱ្យកើតមានបញ្ហាដ៏ធំមួយ រវាងរូបរាងបច្ចុប្បន្ននៃរូបសំណាក និងការរចនាដែលមានបំណងចង់ឱ្យដូចរូបដើម។
មន្ត្រីនៅក្នុងតំបន់ជនបទដដែលបានប្រាប់បន្តថា ហើយយើងនឹងយកចំណុចទាំងនេះទៅពិចារណា និងពង្រឹងការត្រួតពិនិត្យការងារបែបនេះ នៅពេលអនាគត។ ជំហានបន្ទាប់ គឺយើងត្រូវជួសជុល និងកែលម្អរូបសំណាកទេពធីតាចិន Peony នេះ ដើម្បីឱ្យវាមើលទៅស្រស់ស្អាតឡើងវិញ៕ ដោយ ៖ សុភា ដានេត
ចែករំលែកព័តមាននេះ