សន្តិសុខម្នាក់លួ.ចកាត់ខ្សែភ្លើង តាមបង្គោលភ្លើងបំភ្លឺផ្លូវសាធារណៈ ត្រូវឃាត់ខ្លួន
- សៀមរាប
ខេត្តសៀមរាប ៖ បើតាមប្រសាសន៍របស់លោកវរសេនីយ៍ឯក ដា ចំរើន អធិការក្រុងសៀមរាប បាន
ខេត្តសៀមរាប ៖ បើតាមប្រសាសន៍របស់លោកវរសេនីយ៍ឯក ដា ចំរើន អធិការក្រុងសៀមរាប បានឱ្យដឹងកាលពីរសៀលថ្ងៃទី២១ ខែកញ្ញា ឆ្នាំ២០២៣ នេះថា ដោយមានការចង្អុលបង្ហាញពីសំណាក់លោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្ត និងលោកវរសេនីយ៍ឯក នួន ស័ក្តិចំរើនរិទ្ធ ស្នងការរងទទួលផែនការងារនគរបាលព្រហ្មទណ្ឌ ក្រោមការដឹកនាំបញ្ជាផ្ទាល់ដោយលោក ឱ្យកម្លាំងផ្នែកនគរបាលយុត្តិធម៌ ចូលរួមសហការណ៍ពីកម្លាំងប៉ុស្តិ៍នគរបាលរដ្ឋបាលស្រង៉ែ ព្រមទាំងប្រជាការពារសង្កាត់ស្រង៉ែ បានឃាត់ខ្លួនជនសង្ស័យចំនួន១នាក់ ពាក់ព័ន្ធនឹងករណីអំពើប៉ុនប៉ងលួច និងអំពើលួច (កាត់ខ្សែភ្លើង ) រួចរៀបចំកសាងសំណុំរឿងបញ្ជូនទៅការិយាល័យនគរបាលជំនាញនៃស្នងការនគរបាលខេត្តសៀមរាប។
លោកបានបន្ថែមថា មុនពេលកើតហេតុ កាលពីវេលាម៉ោង១និង៣០នាទីឈានចូលព្រឹកថ្ងៃទី២០ ខែកញ្ញា ឆ្នាំ២០២៣ ស្ថិតនៅតាមផ្លូវក្រវ៉ាត់ក្រុង ក្នុងភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប មានករណីប៉ុនប៉ងលួច (កាត់ខ្សែភ្លើង) បង្កឡើងដោយជនសង្ស័យម្នាក់បានធ្វើសកម្មភាពបម្រុងលួចកាត់ខ្សែភ្លើង តាមបង្គោលបំភ្លឺផ្លូវសាធារណៈ ក៏ត្រូវសមត្ថកិច្ច និងប្រជាការពារ ដែលយាមតាមគោលដៅប្រទះឃើញ ខណៈពេលនោះជនសង្ស័យបានព្យាយាមរត់គេច ក៏ត្រូវសមត្ថកិច្ចតាមប្រម៉ាញ់ឃាត់ខ្លួនបាន ព្រមទាំងដកហូតបានឧបករណ៍សម្ភារៈមួយចំនួនសម្រាប់ធ្វើសកម្មភាពកាត់ខ្សែភ្លើង ដើម្បីយកមកសួរនាំភ្លាមៗតែម្តង។
ក្រោយពីធ្វើការសួរនាំ ជនសង្ស័យបានឆ្លើយសារភាពថា កន្លងមក ខ្លួនបានធ្វើសកម្មភាពលួចកាត់ខ្សែភ្លើងតាមបង្គោលតាមផ្លូវក្រវ៉ាត់ក្រុង ក្នុងភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប បានចំនួន៥លើក ដោយយកទៅដុ.តរំលាយជាស្ពាន់ ដើម្បីលក់ឱ្យទៅអ្នកទិញ-លក់អេតចាយ។
លោកបញ្ជាក់ទៀតថា ជនសង្ស័យឈ្មោះ ហោ ហ៊ាន ភេទប្រុស អាយុ៤៩ឆ្នាំ មុខរបរសន្តិសុខ មានស្រុកកំណើតនៅភូមិតាមាឃ ឃុំចុងដោយ ស្រុកដំបែ ខេត្តកំពង់ចាម និងទីលំនៅបច្ចុប្បន្ននៅភូមិគោកដូង សង្កាត់ទឹកវិល ក្រុងខេត្តសៀមរាប ។
វត្ថុតាងដកហូតបានរួមមានកូនសោកែច្នៃសម្រាប់ដោះប្រអប់ភ្លើងមួយចំនួន តួណឺវីសចំនួន១ កន្ត្រៃដងក្រហមចំនួន១ កូនកាំបិ.តកាត់ខ្សែភ្លើង ប៉ិចវាស់ភ្លើងចំនួន១ ការ៉ុងចំនួន១ ម៉ូតូចំនួន១គ្រឿង ។
បច្ចុប្បន្ន ជនសង្ស័យ និងវត្ថុតាងខាងលើ ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅកាន់ការិយាល័យជំនាញ ដើម្បីបញ្ជូនបន្តទៅតុលាការដើម្បីចាត់ការច្បាប់ ៕
ចែករំលែកព័តមាននេះ