តារាសម្តែងអ្នកស្រី គង់ ប៊ុនសុន បានអំពាវនាវឱ្យផលិតករ ក៏ដូចបណ្តាផលិតកម្មនានា មេត្តាហៅអ្នកស្រីថតផង ដើម្បីបានប្រាក់ចិញ្ចឹមជីវិត ត្បិតរបរលក់នំតាមដងផ្លូវរបស់អ្នកស្រីមិនសូវដាច់នោះឡើយ
រាជធានីភ្នំពេញ ៖ តារាសម្តែងអ្នកស្រី គង់ ប៊ុនសុន បានអំពាវនាវឱ្យផលិតករ ក៏ដូចបណ្តាផលិតកម្មនានា មេត្តាហៅអ្នកស្រីថតផង ដើម្បីបានប្រាក់ចិញ្ចឹមជីវិត ត្បិតរបរលក់នំតាមដងផ្លូវរបស់អ្នកស្រីមិនសូវដាច់នោះឡើយ។
ក្នុងស្ថានភាពតែលតោលជាស្ត្រីមេម៉ាយអស់រយៈពេលជាច្រើនឆ្នាំ រស់នៅក្នុងផ្ទះជួល អ្នកស្រី គង់ ប៊ុនសុន កំពុងតែមានភាពលំបាកយ៉ាងខ្លាំងក្នុងជីវភាពរស់នៅ ដោយអ្នកស្រីត្រូវពឹងតែទៅលើរបរលក់នំ និងការងារសិល្បៈតិចតួចតែប៉ុណ្ណោះ។ យ៉ាងណា ដោយធ្លាប់ចូលរួមការសម្តែងនានាកន្លងមកនោះ អ្នកស្រី គង់ ប៊ុនសុន ក៏ធ្វើការអំពាវនាវដល់ផលិតករនានា ជួយហៅអ្នកស្រីថតផង ត្បិតមួយរយៈនេះការងារសិល្បៈរបស់អ្នកស្រីហាក់ស្ងប់ស្ងាត់ខ្លាំង។
តារាសម្តែងអ្នកស្រី ប៊ុនសុន បានបង្ហោះសារនៅលើបណ្តាញសង្គមថា «សូមបងប្អូន មេត្តាជួយហៅខ្ញុំថតផង ដើម្បីបានថវិការចិញ្ចឹមជីវិត ព្រោះរាល់ថ្ងៃនេះ ខ្ញុំលក់នំមិនសូវដាច់ទេ ពេលខ្លះខ្ញុំបាំងឆ័ត្រអង្គុយលក់នំពេលមេឃកំពុងតែរលឹម។ ទាំងអស់នេះ ជារូបថតអនុស្សាវរីយ៍ដែលខ្ញុំបានចូលរួមសម្ដែងជាមួយតារាល្បីៗជាច្រើន និងបានចូលរួមសម្ដែងភាពយន្តជាច្រើនរឿង និងរឿងអប់រំខ្លីៗ»។
អ្នកស្រីបញ្ជាក់ថា «ខ្ញុំបានចូលរួមថតស្ពត ថតបទចម្រៀងជាមួយផលិតកម្មហង្សមាស, ថោន, សាន់ដេរ និងបានចូលរួមសម្ដែងក្នុងកម្មវិធីផ្សេងៗជាច្រើន។ លេខទូរស័ព្ទ 098 444 858 សូមអរគុណ»។
ជាការកត់សម្គាល់ ទស្សនិកជនច្បាស់ជាបានស្គាល់ហើយថា តារាសម្តែងជើងចាស់អ្នកស្រី គង់ ប៊ុនសុន គឺជាតារាសម្តែងម្នាក់ដែលតែងតែដើរតួជាម្ដាយអ្នកក្រ ក្នុងខ្សែភាពយន្ត ក៏ដូចជា វីដេអូខ្សែវីដេអូផ្សេងៗជាច្រើនទៀត ហើយបើយើងក្រឡេកទៅមើលពីជីវភាពរបស់អ្នកស្រីនៅខាងក្រៅឆាកវិញ គឺវាមិនខុសគ្នាពីក្នុងសាច់រឿងឡើយ គឺលំបាកខ្លាំងណាស់។
ជីវិតនៅក្រៅពីសិល្បៈ គឺអ្នកស្រី គង់ ប៊ុនសុន ត្រូវឆ្លៀតលក់នំកាត់យប់ កាត់អធ្រាត្រ ដើម្បីដោះស្រាយជីវភាព និងបង់ថ្លៃផ្ទះដែលជួលគេ។ អ្នកស្រី គង់ ប៊ុនសុន ប្រកបរបរលក់នំនេះជាង១ឆ្នាំមកហើយ ដោយលក់នៅលើផ្លូវ២៧១ ក្រោយធនាគារ ANZ ។ ចំណែកថ្លៃផ្ទះជួល ស្ត្រីមេម៉ាយកូន៣ វ័យ៦៥រូបនេះ គាត់បានជួលគេក្នុង១ខែតម្លៃ៩០ដុល្លារ។ បើក្រឡេកមកមើលការងារសិល្បៈរបស់អ្នកស្រីវិញ តម្លៃខ្លួនអ្នកស្រីមិនបានថ្លៃឡើយ ពោលគឺក្នុង១ថ្ងៃទទួលបានត្រឹមតែ១៥ដុល្លារទៅ៥០ដុល្លារតែប៉ុណ្ណោះ៕
ចែករំលែកព័តមាននេះ