ខេត្តស្វាយរៀង៖ ​ភ្លៀងមួយមេធំ លាយឡំផ្លេកបន្ទោ ផ្គររន្ទះគ្រហ៊ឹម គួរឲ្យខ្លាច ខណៈជនរងគ្រោះពីរនាក់ប្តីប្រពន្ធកំពុងច្រូតស្មៅ នៅកណ្តាលវាលស្រែ។ រន្ទះកំណាច បានបាញ់ពីរនាក់ប្តីប្រពន្ធ បណ្ដាលឲ្យរបួសធ្ងន់ធ្ងរ ដេកសន្លប់ស្តូកស្តឹងទាំងពីរនាក់ ​គួរឲ្យសង្វេគ។

បើតាមសមត្ថកិច្ច ​ករណីនេះ បានកើតឡើង កាលពៅវេលាម៉ោង ១២ និង០០នាទី ថ្ងៃត្រង់ ថ្ងៃទី១៧កញ្ញា២០២៣ នៅកណ្តាលវាលស្រែ ស្ថិតក្នុងភូមិទួលសាលា ឃុំជ្រុងពពេល ស្រុករំដួល។

ជនរងគ្រោះ ជាប្តី ឈ្មោះ ពៀម រ៉ា អាយុ ៣២ឆ្នាំ រស់នៅភូមិទួលសាលា ឃុំជ្រុងពពេល ស្រុករំដួល ខេត្តស្វាយរៀង រងរបួ..សធ្ងន់។ រីប្រពន្ធ ឈ្មោះ ជូ សុវណ្ណដារ៉ា អាយុ ៣៥ឆ្នាំ រស់នៅភូមិឃុំ​ជាមួយគ្នា បណ្ដាលឱ្យស្លា..ប់ ពេលបញ្ជូនទៅដល់មន្ទីរពេទ្យបង្អែកស្រុករំដួល។ អ្នកទាំងពីរ បានច្រូតស្មៅ នៅឯវាលស្រែខាងក្រោយផ្ទះ ចម្ងាយប្រហែល ២០០ម៉ែត្រ។

ជនរងគ្រោះ ជាប្តី ត្រូវបានបញ្ជូនបន្ត ទៅព្យាបាល​នៅមន្ទីរពេទ្យខេត្តស្វាយរៀង ចំណែកសព​ប្រពន្ធ ត្រូវបានសមត្ថកិច្ច ប្រគល់ឲ្យក្រុមគ្រួសារ យកមកធ្វើបុណ្យតាមប្រពៃណី។

លោក ហែម ស៊ីណា អភិបាលនៃគណៈអភិបាលស្រុករំដួល ក៏ដូចជា អាជ្ញាធរស្រុក បានចូលរួមរំលែកទុក្ខដល់គ្រួសារ..ស..ព..​និងបានសំណូមពរដល់បងប្អូនប្រជាពលរដ្ឋ​ទាំងអស់ សូមមេត្តាប្រុងប្រយ័ត្នទាំងអស់គ្នា ជាពិសេសនៅពេល​មេឃរកកល ចង់ធ្លាក់ភ្លៀង ឬខ្យល់ សូមប្រញាប់រកកន្លែងសុវត្ថិភាព មិនត្រូវជ្រកក្រោមដើមឈើ ឬនៅវាលឡើយ ដើម្បីសេចក្តីសុខ និងបញ្ជៀសឲ្យបាននូវហានិភ័យ៕ វ៉ាន់ ប៊ុនធឿន