ភ្នំពេញ៖ ក្នុងដំណើរទស្សនកិច្ចផ្លូវការ លើកដំបូង របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលទើបបិទបញ្ចប់ នៅថ្ងៃទី១៧ ខែកញ្ញានេះ…
ភ្នំពេញ៖ ក្នុងដំណើរទស្សនកិច្ចផ្លូវការ លើកដំបូង របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលទើបបិទបញ្ចប់ នៅថ្ងៃទី១៧ ខែកញ្ញានេះ ភាគីកម្ពុជា និងចិន បានចុះហត្ថលេខាលើឯកសារ ចំនួន ១៥។ នេះបើតាមលោក តាន់ ហ្សង់ ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី។
ក្នុងពេលសម្តេចធិបតី ហ៊ុន ម៉ាណែត បានដឹកនាំប្រតិភូ វិលត្រឡប់ពីប្រទេសចិន មកដល់អាកាសយានដ្ឋានអន្តរជាតិភ្នំពេញ នាយប់ថ្ងៃអាទិត្យ ទី១៧ ខែកញ្ញានេះ លោក តាន់ ហ្សង់ ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស មានភារកិច្ច ត្រូវធ្វើសន្និសីទកាសែត។
អតីតអ្នកកាសែតខ្មែរ-បារាំង អស់ពេលប្រមាណ ៣០ឆ្នាំ បានថ្លែងទៅកាន់ក្រុមអ្នកកាសែត ដោយមិនភ្លេចមើលនូវឯកសារ ដែលបានត្រៀមទុក កាន់ជាប់នៅនឹងដៃផង លោក ហ្សង់ ហ្វ្រង់ស័រ តាន់ លើកឡើងថា «កម្ពុជា និងចិន ឯកភាពគ្នា បន្តធ្វើឱ្យស៊ីជម្រៅការបញ្ស៊ីចូលគ្នានូវយុទ្ធសាស្ត្របញ្ចកោណរបស់ប្រទេសកម្ពុជា និង BRI គំនិតផ្តួចផ្តើមក្រវាត់ និងផ្លូវរបស់ចិន ជាអាទិ៍ នៅលើវិស័យកសិកម្ម ថាមពល និងនៅលើវិស័យការផ្លាស់ប្តូរប្រជាជន និងប្រជាជន។ ក្នុងនោះ ភាគីកម្ពុជា និងភាគីចិន បានចុះហត្ថលេខាលើឯកសារចំនួន ១៥ រួមមានដូចជា ឯកសារផែនការសកម្មភាពក្នុងការកសាងសហគមន៍វាសនារួមកម្ពុជា-ចិន សម្រាប់ ២០២៤-២០២៨។ ជារួម សុទ្ធសឹងតែជាគោលការណ៍ ដែលត្រូវផ្តល់សម្ទុះ ដល់ទំនាក់ទំនងរវាងប្រទេសទាំងពីរ ឱ្យក្លាយទៅជាត្បូងពេជ្រពិតប្រាកដ»។
សូមរម្លឹកថា សម្តេចធិបតី ហ៊ុន ម៉ាណែត បានអញ្ជើញទៅបំពេញទស្សនកិច្ចផ្លូវការ នៅប្រទេសចិន និងចូលរួមពិព័រណ៍ អាស៊ាន-ចិន ចាប់ពីថ្ងៃទី១៤ ដល់ថ្ងៃទី១៧ ខែកញ្ញា ឆ្នាំ២០២៣។ នៅអំឡុងពេលដំណើរទស្សនកិច្ចនេះ សម្តេចធិបតី ហ៊ុន ម៉ាណែត បានជួបពិភាក្សាការងារជាមួយប្រធានក្រុមហ៊ុនធំៗរបស់ចិន ជួបអ្នកវិនិយោគចិន រួមទាំងជួបប្រជុំការងារដាច់ដោយឡែកពីគ្នា ជាមួយមេដឹកនាំកំពូលរបស់ចិន រួមមាន៖ ប្រធានាធិបតីចិន ប្រធានរដ្ឋសភា និងនាយករដ្ឋមន្ត្រីចិន៕
ចែករំលែកព័តមាននេះ