រាជធានីភ្នំពេញ៖ ថ្លែងក្នុងឱកាសអបអរសាទរខួបអនុស្សាវរីយ៍លើកទី៧០នៃមិត្តភាពរវាង ជប៉ុននិងកម្ពុជា កាលពីពេលថ្មីៗនេះ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា ថា ការវិនិយោគរបស់ជប៉ុន នៅកម្ពុជាមានការកើនឡើង…
រាជធានីភ្នំពេញ៖ ថ្លែងក្នុងឱកាសអបអរសាទរខួបអនុស្សាវរីយ៍លើកទី៧០នៃមិត្តភាពរវាង ជប៉ុននិងកម្ពុជា កាលពីពេលថ្មីៗនេះ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា ថា ការវិនិយោគរបស់ជប៉ុន នៅកម្ពុជាមានការកើនឡើង គួរឱ្យកត់សម្គាល់ ។
ជាការអបអរខួបអនុស្សាវរីយ៍លើកទី៧០នៃមិត្តភាពរវាង ជប៉ុននិងកម្ពុជា នៅថ្ងៃទី១៥ ខែកញ្ញា ឆ្នាំ២០២៣ ស្ថានទូតជប៉ុន រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC) ការិយាល័យ ទំនាក់ទំនងភ្នំពេញនៃមូលនិធិជប៉ុន បាននិងកំពុងរៀបចំនូវការប្រគំតន្ត្រីអូខេស្ត្រាជាច្រើនដង ដោយក្រុម Worldship Orchestra (WSO) ដើម្បីអបអរសាទរខួបអនុស្សាវរីយ៍លើកទី៧០នៃមិត្តភាពរវាង ជប៉ុននិងកម្ពុជា ។
នៅក្នុងពិធីបើកការប្រគំតន្ត្រីអូខេស្ត្រា ឯកឧត្ដម អ៊ីណូ អាត់សូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន នៅកម្ពុជា បានថ្លែងថា៖ «ឆ្នាំនេះគឺជាឆ្នាំខួបអនុស្សាវរីយ៍លើកទី៧០ ក្នុងការបង្កើតទំនាក់ទំនងការទូតរវាង ជប៉ុននិងកម្ពុជា។ រយៈពេល៧០ឆ្នាំមកនេះ ទំនាក់ទំនងទ្វេភាគីរបស់ប្រទេសយើងទាំងពីរ បានអភិវឌ្ឍក្រោមការជឿទុកចិត្តគ្នាទៅវិញទៅមក តាមរយៈកិច្ចសហប្រតិបត្តិការ ក្នុងដំណើរការស្វែងរកសន្តិភាព ការកសាងឡើងវិញ និងការអភិវឌ្ឍសេដ្ឋកិច្ចសង្គមរបស់កម្ពុជា ។ ក្នុងរយៈពេលប៉ុន្មានឆ្នាំចុងក្រោយនេះ ការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធ របស់កម្ពុជា មានការរីកចម្រើនគួរឱ្យកត់សម្គាល់ ហើយការវិនិយោគរបស់ជប៉ុន នៅក្នុងប្រទេសកម្ពុជាមានក៏ការកើនឡើងផងដែរ។ សក្តានុពលសម្រាប់កិច្ចសហប្រតិបត្តិការ រវាងប្រទេសទាំងពីរកំពុងរីកចម្រើនឥតឈប់ឈរ» ។
ឯកឧត្ដម អ៊ីណូ អាត់សូស៊ី បន្ថែមថា ថ្ងៃនេះ យើងមានសេចក្តីសោមនស្សរីករាយ ក្នុងការអញ្ជើញវង់តន្ត្រីជប៉ុន Worldship Orchestra (WSO) មកកាន់ប្រទេសកម្ពុជា ដើម្បីអបអរសាទរខួបលើកទី៧០ឆ្នាំ រវាងប្រទេសទាំងពីរ។ សមាជិកនៃវង់តន្ត្រី Worldship Orchestra ដែលកំពុងសំដែងនេះ សព្វថ្ងៃ កំពុងធ្វើការដើម្បី លើកកម្ពស់ការអប់រំតន្ត្រី មិនត្រឹមតែនៅក្នុងប្រទេសជប៉ុនប៉ុណ្ណោះទេ ប៉ុន្តែក៏មាននៅក្នុងប្រទេសកម្ពុជា និងបណ្តា ប្រទេសអាស៊ីផ្សេងទៀត និងដើម្បីបណ្តុះតន្ត្រីករជំនាន់ក្រោយផងដែរ។
គួរបញ្ជាក់ផងដែរថា WSO គឺជាគម្រោងរបស់ NPO Worldship ជាអង្គការមិនរកប្រាក់ចំណេញ បង្កើតឡើងនៅ ទីក្រុងតូក្យូ ក្នុងខែវិច្ឆិកា ឆ្នាំ២០១៤ មានគោលបំណងផ្ដល់ឱ្យកុមារជុំវិញពិភពលោកនូវ«បទពិសោធន៍ វង់តន្ត្រីដំបូង»។ បច្ចុប្បន្នកំពុងធ្វើការលើសកម្មភាពពីរ គឺកម្មវិធីសម្តែងនៅក្រៅប្រទេស ដើម្បីផ្ដល់ឱ្យកុមារនៅ ក្នុងប្រទេសអាស៊ីជាច្រើន ដែលមិនមានឱកាសទទួលបានការអប់រំផ្នែកសិល្បៈតន្ត្រី ឬទស្សនាការសម្តែង ឧបករណ៍តន្ត្រីផ្ទាល់ ដើម្បីទទួលបានបទពិសោធន៍ នឹងចាប់អារម្មណ៍លើតន្ត្រី និងសកម្មភាពគាំទ្រវង់តន្ត្រីយុវជនក្រៅប្រទេស ។
ឯកឧត្តម ចាន់ រតនា ជាសហប្រធានគណៈកម្មការប្រតិបតិ្តសម្រាប់ខួបអនុស្សាវរីយ៍លើកទី៧០នៃមិត្តភាពកម្ពុជា-ជប៉ុន បានមានប្រសាសន៍ថា៖ «ខ្ញុំសូមស្វាគមន៍យ៉ាងកក់ក្តៅចំពោះក្រុមតន្ត្រីជប៉ុន និងអ្នកទាំងអស់គ្នាដែលបានចូលរួមក្នុង “ការប្រគុំតន្ត្រីពិសេស ក្នុងរាត្រីដ៏អស្ចារ្យនេះ ដើម្បីអបអរសាទរខួបលើកទី ៧០ នៃការបង្កើតទំនាក់ទំនងការទូតរវាងកម្ពុជា និងជប៉ុន។ ជាការពិតណាស់ យើងមានមោទនៈភាពជាខ្លាំង ដែលទំនាក់ទំនងមិត្តភាពរបស់យើង ឥឡូវនេះឈានដល់ដំណាក់កាលថ្មីមួយ ព្រោះថានៅឆ្នាំនេះ យើងបានលើកឡើងទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ” ដែលជាកម្រិតខ្ពស់បំផុត នៃកិច្ចសហប្រតិបត្តិការដែលមិនធ្លាប់មាន ក្នុងប្រវត្តិសាស្ត្រនៃប្រទេសទាំងពីរ» ។
ឆ្លៀតក្នុងឱកាសនេះដែរ ឯកឧត្តម ចាន់ រតនា បន្ថែមថា៖ «ជាមួយនឹងចក្ខុវិស័យ និងយុទ្ធសាស្ត្រថ្មីនេះ ដែលដាក់ចេញដោយថ្នាក់ដឹកនាំរបស់យើង ជាពិសេសដោយ សម្តេចអគ្គមហាសេនាបតីតេជោ ហ៊ុន សែន និងនាយករដ្ឋមន្ត្រី គីស៊ីដា ហ្វូមីអូ ប្រទេសទាំងពីរបានប្តេជ្ញាចិត្តក្នុងការពង្រឹង និងពង្រឹងកិច្ចសហប្រតិបត្តិការលើគ្រប់វិស័យ ដើម្បីផលប្រយោជន៍ប្រជាជនយើង។ និងប្រទេសទាំងពីរ ក៏ដូចជាសន្តិភាព សន្តិសុខ ស្ថិរភាព និងវិបុលភាពក្នុងតំបន់» ។
សូមជម្រាបថា ការប្រគំតន្ត្រីអូខេស្ត្រា ខួប៧០ឆ្នាំនៃមិត្តភាពជប៉ុន-កម្ពុជា នឹងធ្វើឡើងតាមកាលបរិច្ឆទ និងទីតាំងដូចខាងក្រោម៖
ចែករំលែកព័តមាននេះ