តាមរយៈច្រកចេញចូលតែមួយ បានបង្កើតឲ្យមានភាពពន្លឿនការងារមួយចំនួនឆាប់រហ័ស និងមិនចំណាយលុយក្រោមតុទៀតផង ព្រោះថា ថ្មីៗកន្លងទៅ មានការរិះគន់ពីសំណាក់ប្រជាពលរដ្ឋមួយចំនួនតូច ដែលលើកឡើងថា ការប្រកបរបរធ្វើក្រចកតូចតាច
ខេត្តកំពង់ចាម ៖ តាមរយៈច្រកចេញចូលតែមួយ បានបង្កើតឲ្យមានភាពពន្លឿនការងារមួយចំនួនឆាប់រហ័ស និងមិនចំណាយលុយក្រោមតុទៀតផង ព្រោះថា ថ្មីៗកន្លងទៅ មានការរិះគន់ពីសំណាក់ប្រជាពលរដ្ឋមួយចំនួនតូច ដែលលើកឡើងថា ការប្រកបរបរធ្វើក្រចកតូចតាច និងកាត់សក់ទ្រង់ទ្រាយតូច ក៏តម្រូវឲ្យទៅសុំបែបបទតាមរយៈច្រកចេញចូលតែមួយរបស់សាលាស្រុកស្រីសន្ធរដែរ។
លោក ស៊ីម គង់ អភិបាលស្រុកស្រីសន្ធរ បានប្រាប់ឲ្យដឹងតាមទូរស័ព្ទនៅព្រឹកថ្ងៃទី១៥ ខែកញ្ញា ឆ្នាំ២០២៣នេះថា កាលពីមុន គ្រាដែលសាលាស្រុកមិនទាន់មានច្រកចេញចូលតែមួយ ប្រជាពលរដ្ឋរស់នៅក្នុងស្រុកស្រីសន្ធរ បានមកសុំបែបបទ និងបំពេញឯកសារនានា ពេលខ្លះត្រូវឡើងមកដល់ខេត្តកំពង់ចាមក៏មានដែរ។ ដោយមើលឃើញនូវការលំបាកបែបនេះ ទើបត្រូវបានប្រមុខរាជរដ្ឋាភិបាលកម្ពុជា យកចិត្តទុកដាក់ឱ្យបង្កើតច្រកចេញចូលតែមួយនៅតាមបណ្ដាស្រុក ដើម្បីបង្កភាពងាយស្រួលដល់ពលរដ្ឋ គឺមិនមានការទារថ្លៃហួសសេវាដែលបានកំណត់នោះឡើយ។
អភិបាលស្រុកស្រីសន្ធរ បន្តឱ្យដឹងទៀតថា តាមរយៈការណែនាំរបស់ប្រមុខរាជរដ្ឋាភិបាលកម្ពុជា រដ្ឋបាលស្រុកស្រីសន្ធរ បានចេញសេចក្តីណែនាំដល់ប្រជាពលរដ្ឋរស់នៅក្នុងស្រុកស្រីសន្ធរទាំងអស់ ដែលប្រកបរបរធ្វើក្រចកដៃ ជាងកាត់សក់ រួមទាំងការប្រកបអាជីវកម្មផ្សេងទៀត សូមមកសុំបែបបទនូវច្រកចេញចូលតែមួយរបស់សាលាស្រុកស្រីសន្ធរ។ តែមិនមានប្រជាពលរដ្ឋណាម្នាក់មកដាក់ពាក្យសុំ ឬមានការរអ៊ូរទាំនោះទេ ហើយក៏មានមតិរិះគន់មួយចំនួនលើបញ្ហាទាំងនេះ។
អភិបាលស្រុកស្រីសន្ធរ បន្តឱ្យដឹងទៀតថា ក្រោយមក ត្រូវបានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីថ្មីនៃព្រះរាជាណាចក្រកម្ពុជា បានចេញលិខិតលេខ១០០ សសរ ចុះថ្ងៃទី១៣ ខែកញ្ញា ឆ្នាំ២០២៣ ដោយមានការកែតម្រូវចំណុចមួយចំនួន ក្នុងនោះយោងតាមការសម្រេចប្រការ១ ៖ -ត្រូវបានផ្អាកការផ្ដល់សេវារដ្ឋបាលមួយចំនួនរបស់រដ្ឋបាលក្រុងស្រុកខណ្ឌពាក់ព័ន្ធនឹងការបំពេញបែបបទធ្វើអាជីវកម្ម ដែលកំណត់ដោយប្រកាសអន្តរក្រសួងលេខ១៤៣៤២ប្រក ចុះថ្ងៃទី២៩ ខែធ្នូ ឆ្នាំ២០១៦ ស្ដីពីការផ្ដល់សេវារដ្ឋបាលរបស់រដ្ឋបាលថ្នាក់ក្រោមជាតិដូចខាងក្រោម ៖
ក- វិស័យវប្បធម៌ និងវិចិត្រសិល្បៈ
១. អាជីវកម្មសិល្បៈសូន្យរូបទីតាំងផលិត និងលក់ចម្លាក់ពុំធ្វើស៊ីម៉ង់ត៍ជាងគំនូរ
២. អាជីវកម្មកាត់សក់ អ៊ុតសក់ លម្អក្រចក និងសំអាងការ (ហាង)។ ដោយកាត់សក់បុរស (ចាប់២កៅអីទៅ៤កៅអី), កាត់សក់បុរស (ចាប់ពី៥កៅអីឡើងទៅ) និងអ៊ុតសក់ កាត់សក់ លំអរក្រចក (ចាប់២កៅអីទៅ៤កៅអី)…។
លោក ស៊ីម គង់ អភិបាលស្រុកស្រីសន្ធរ បានបញ្ជាក់ថា ចាប់តាំងពីពេលដែលរូបលោកចូលកាន់តំណែងជាអភិបាលស្រុកស្រីសន្ធរ គឺបានប្រឹងប្រែងដូចជា ៖ ក្នុងបរិវេណសាលាស្រុក ពីមុនក្នុងរដូវវស្សាបែកភក់ ពិបាកនឹងជិះម៉ូតូ ឬរថយន្ត។ ក្រោយមក ក៏បានចាក់បេតុងឡើងរលោងពេញទីធ្លាតែម្ដង។
លោក ស៊ីម គង់ អភិបាលស្រុកស្រីសន្ធរ បានបញ្ជាក់ទៀតថា សូម្បីតែមុខសាលាស្រុក មានពេលខ្លះអ្នកធ្វើដំណើរមកឈប់បត់ជើងតូច បត់ជើងធំក៏មាន តែមកដល់សព្វថ្ងៃនេះក្រោមការយកចិត្តទុកដាក់របស់អាជ្ញាធរ ដូចជាក្រោមការចង្អុលបង្ហាញពីឯកឧត្តមអភិបាលខេត្ត បានចាក់បេតុងឡើងរលោង ព្រមទាំងមានដាក់រូបសំណាក់ទៀតផង។ មិនត្រឹមប៉ុណ្ណោះ គ្រាចូលឆ្នាំកន្លងទៅ មនុស្សខ្ទង់ម៉ឺននាក់នាំគ្នាលេងរាំសប្បាយ ហើយនៅតាមផ្លូវចាប់ពីមុខសាលាស្រុក រហូតដល់ព្រំប្រទល់ស្រុកកោះសូទិន គឺមានផ្លូវបេតុង បំពាក់អំពូលសូឡា បំភ្លឺពេលរាត្រី ធ្វើឲ្យពលរដ្ឋងាយស្រួលក្នុងការធ្វើដំណើរមិនថាយប់ឬថ្ងៃឡើយ នៅផ្សារព្រែកពោធិ៍ ខណៈពីមុនផ្លូវដី ឥឡូវប្រែក្លាយជាផ្លូវបេតុងហើយ។
ក្រៅពីនេះ អាជ្ញាធរស្រុក ក៏ដូចជាខេត្ត បានរៀបចំអភិវឌ្ឍន៍ប្រព័ន្ធធារាសាស្ត្រ ដោយបូមទឹកពីទន្លេចូលដាក់ប្រឡាយមេ ដើម្បីស្រោចស្របដំណាំស្រូវរបស់បងប្អូនប្រជាកសិករបានរាប់ពាន់ហិកតាទៀតផង។
ចែករំលែកព័តមាននេះ