អគ្គិភ័យឆេះផ្ទះតារាចម្រៀងជើងចាស់ លោកណូយ វ៉ាន់ណេត ខូចខាតទ្រព្យជិត១ម៉ឺនដុល្លារ
រាជធានីភ្នំពេញ ៖ ផ្ទះរបស់តារាចម្រៀងជើងចាស់ លោក ណូយ វ៉ាន់ណេត ត្រូវបានអគ្គិភ័យឆាបឆេះ កាលពីវេលាម៉ោងប្រមាណ ១២ថ្ងៃត្រង់ នាថ្ងៃទី១៤…
រាជធានីភ្នំពេញ ៖ ផ្ទះរបស់តារាចម្រៀងជើងចាស់ លោក ណូយ វ៉ាន់ណេត ត្រូវបានអគ្គិភ័យឆាបឆេះ កាលពីវេលាម៉ោងប្រមាណ ១២ថ្ងៃត្រង់ នាថ្ងៃទី១៤ ខែកញ្ញា ឆ្នាំ២០២៣ ដែលមានទីតាំងស្ថិតនៅម្ដុំវត្ដជំពុះក្អែក ខណ្ឌច្បារអំពៅ រាជធានីភ្នំពេញ ក្នុងនោះការខូចខាតគិតជាទឹកប្រាក់អស់ជិត១ម៉ឺនដុល្លារ ។
យ៉ាងណាមិញ ហេតុការណ៍ខាងលើនេះ មិនបណ្តាលអោយមានគ្រោះថ្នាក់ដល់អាយុជីវិតគ្រួសាររបស់លោក ណូយ វ៉ាន់ណេត ណាម្នាក់ឡើយ។ ប៉ុន្តែអគ្គិភ័យ បានធ្វើខូចខាតទ្រព្យសម្បត្តិ ដែលគិតជាទឹកប្រាក់ប្រមាណជិត១ម៉ឺនដុល្លារ ។
ថ្លែងប្រាប់សារព័ត៌មាន តារាចម្រៀងលោក ណូយ វ៉ាន់ណេត បានអះអាងថា ផ្ទះរបស់លោកត្រូវបានឆេះដោយសារទុស្សេខ្សែភ្លើង ខណៈពេលលោកកំពុងមានវត្តមាននៅឯខេត្ត ។ លោកបញ្ជាក់ថា អគ្គិភ័យឆាបឆេះ បណ្ដាលឲ្យខូចខាតទ្រព្យសម្បត្ដិមួយចំនួន តែមិនបណ្ដាលឲ្យមនុស្សណាម្នាក់ស្លាប់ ឬរបួសឡើយ រួមទាំងកូនរបស់លោកម្នាក់កំពុងស្នាក់នៅក្នុងផ្ទះនោះផង ។
តារាចម្រៀងជើងចាស់រូបនេះ បានប្រាប់ឱ្យថា សារភ្លើងឆាបឆេះកាន់តែខ្លាំង ហេតុនេះ យើងមិនអាចពន្លត់បានភ្លាមៗឡើយ ដោយហេតុការណ៍បានបណ្តាលខូចខាតសម្ភារមួយចំនួន និងពិដានផ្ទះ ។ យ៉ាងណាបើតាមលោក ណូយ វ៉ាន់ណេត សម្រាប់ការខូចខាតនេះ លោកត្រូវចំណាយលុយសម្រាប់ការជួសជុលឡើងវិញប្រមាណជាជិត១ម៉ឺនដុល្លារ ។
ជាការកត់សម្កាល់ កាលពីអំឡុងឆ្នាំ២០១៧ តារាចម្រៀងលោក ណូយ វ៉ាន់ណេត បានប្រកាសដាក់លក់ផ្ទះមួយកន្លែងនៅស្ទឹងមានជ័យ ដើម្បីយកទៅឲ្យថ្លៃជាងបង្ហើយផ្ទះវីឡាថ្មីដែលបានឆាបឆេះនាពេលនេះ។
បច្ចុប្បន្ន លោក ណូយ វ៉ាន់ណេត មានផ្ទះចំនួន៣កន្លែង ដោយផ្ទះទី១នៅម្តុំវត្តចំពុះក្អែក ផ្ទះទី២ នៅទល់មុខវត្តនិរោធ និងផ្ទះទី៣ ជាប្រភេទផ្ទះល្វែងនៅម្តុំវាលស្បូវ ។
ចែករំលែកព័តមាននេះ