រាជធានីភ្នំពេញ៖ អ្នកប្រដាល់ពូកែស្នៀតកែងខុន រាជ មកពីក្លឹបកងពលធំអន្តរាគមន៍លេខ៣ ព្រះវិហារ បានធ្វើឱ្យ ADAY TON មកពីប្រទេសប្រេស៊ីល មានរបួស២កន្លែង ហើយត្រូវគ្រូពេទ្យបញ្ឈប់នៅត្រឹមទឹកទី២ ក្នុងការប្រកួតជាលក្ខណៈអន្តរជាតិនៅលើសង្វៀនស្ថានីយទូរទស្សន៍ប៉ុស្តិ៍លេខ៣ កាលពីរសៀលថ្ងៃសៅរ៍ ទី១៤ ឧសភា កន្លងមក
រាជធានីភ្នំពេញ៖ អ្នកប្រដាល់ពូកែស្នៀតកែងខុន រាជ មកពីក្លឹបកងពលធំអន្តរាគមន៍លេខ៣ ព្រះវិហារ បានធ្វើឱ្យ ADAY TON មកពីប្រទេសប្រេស៊ីល មានរបួស២កន្លែង ហើយត្រូវគ្រូពេទ្យបញ្ឈប់នៅត្រឹមទឹកទី២ ក្នុងការប្រកួតជាលក្ខណៈអន្តរជាតិនៅលើសង្វៀនស្ថានីយទូរទស្សន៍ប៉ុស្តិ៍លេខ៣ កាលពីរសៀលថ្ងៃសៅរ៍ ទី១៤ ឧសភា កន្លងមកនេះ ចំណែកជ័យ កុសល មកពីក្លឹបសិង្ហកីឡាបានត្រឹមស្មើពិន្ទុជាមួយ ATOSHI NOMURA មកពីប្រទេសជប៉ុន ។
តាមអ្នករៀបចំកម្មវិធីប្រកួតអះអាងថា ADAY TON ក៏មិនមែនជាជើងអន់ណាស់ណាដែរ គឺគេធ្លាប់ឈានជើងឡើងសង្វៀនប្រកួតជាង២០ដង ប៉ុន្តែសម្រាប់ការមកប៉ះខុន រាជ លើកនេះគេបែរជាភ្លាត់ស្នៀតបណ្តាលឱ្យខុន រាជ វាយឱ្យមានរបួសយ៉ាងធ្ងន់ធ្ងរបំផុត ។ នៅទឹកទី១ ខុន រាជ មិនទាន់វាយសម្រុកភ្លាមៗទេ ព្រោះគេនៅស្ទង់មើលកម្រិតបច្ចេកទេសគូប្រកួតសិន ហើយទាំងសងខាងបានប្រើស្នៀតជើងទាត់សងទៅសងមកក្នុងលក្ខណៈប្រុងប្រយ័ត្នរៀងៗខ្លួន ។ ប៉ុន្តែតាមរយៈនៃការបញ្ចេញខ្យល់ស៊ីសៗរបស់ ADAY TON ធ្វើឱ្យអ្នកទស្សនាភាគច្រើនគិតថា កីឡាកររូបនេះមិនសូវខ្លាំងប៉ុន្មានឡើយ ។
ដោយមើលឃើញពីចំណុចខ្សោយរបស់ ADAY TON ខុន រាជ ចាប់ផ្តើមវាយសម្រុកនៅទឹកទី២ គឺចូលបុកជង្គង់ និងវាយស្នៀតកែងភ្លាមៗតែម្តង ។ ការចូលក្រៀកវាយកែងរបស់ខុន រាជ លើកដំបូង ធ្វើឱ្យមានស្នាមរបួសចុងចិញ្ចើមឆ្វេងបន្តិច ប៉ុន្តែលើកទី២ ខុន រាជ បានពុះពីលើបណ្តាលឱ្យមានរបួសធំជាងមុន មានឈាមហូរជោកមុខ លោកគ្រូពេទ្យឃើញសភាពបែបនេះក៏សម្រេចបញ្ឈប់ការប្រកួតតែម្តង ។ របួសទាំង២កន្លែងរបស់ ADAY TON ត្រូវដេរចំនួន៩ថ្នេរ។
ចំណែកជ័យ កុសល ដែលគណៈកម្មការផ្តល់ពិន្ទុឱ្យស្មើ ATOSHI NOMURA មិនធ្វើឱ្យអ្នកទស្សនាមានការខកចិត្តឡើយ បើទោះបីជាកុសលមានប្រៀបជាងតាំងពីទឹកទី១ ក៏ដោយ ។ នៅក្នុងទឹកទី១ ស្នៀតកែងរបស់កុសលធ្វើឱ្យអ្នកប្រដាល់ជនជាតិជប៉ុនម្នាក់នេះ រងរបួសយ៉ាងធ្ងន់ធ្ងរ គឺបែកត្រង់បបូរមាត់ និងពកថ្ពាល់ខាងឆ្វេង ប៉ុន្តែ ATOSHI ចិត្តសឿងគ្រាន់បើដែរ បានតស៊ូវាយបកសងវិញយ៉ាងប្តូរផ្តាច់បំផុត។ ថ្វីដ្បិតតែនៅទឹកទី៣ ATOSHI មានឱកាសវាយបកសងមកលើកុសលវិញខ្លះៗក្តី ប៉ុន្តែមើលទៅស្ថានភាពរបស់ ATOSHI គឺទ្រុឌទ្រោមបំផុត ដោយសារតែស្នៀតជើង និងស្នៀតកែងរបស់កុសល ។
កុសល ចាប់ផ្តើមធ្លាក់ស្រុតកម្លាំងចាប់ពីទឹកទី៤ រហូតទៅ ឯ ATOSHI ផ្ទៃមុខរបស់គេទាំងមូលពោរពេញទៅដោយស្នាមរបួស តែគេនៅតែបង្ហាញភាពខ្លាំងវាយបកសងវិញ មិនញញើតឡើយ ។ ATOSHI បានបញ្ចេញស្នៀតជើងទាត់មកលើកុសល ដូចព្យុះនៅ ទឹកទី៤ និងទី៥ ហើយនៅមានស្នៀតជង្គង់ទៀតដែលបានជំរុញឱ្យកុសលដកថយអែបខ្សែរេញរហូត ។ ២ទឹកចុងក្រោយកុសលចាញ់ប្រៀប ATOSHI ដាច់តែម្តង ដូច្នេះគណៈកម្មការសម្រេចផ្តល់ពិន្ទុឱ្យស្មើគ្នានោះវាស័ក្តិសមណាស់ទៅហើយ ។
សួង សុវណ្ណថា មកពីក្លឹបកីឡាប្រដាល់ក្រសួងការពារជាតិយកឈ្នះលាប សំណាង មកពីក្លឹបកងពលតូចលេខ៧០ ដោយពិន្ទុ ។ សារឹម ង៉ា មកពីក្លឹបកីឡាប្រដាល់ក្រសួងការពារជាតិ យកឈ្នះសូយ សីហា មកពីក្លឹបអូដឹមកីឡា ដោយពិន្ទុ ។ វី សាវុធ មកពីក្លឹបឥន្ទ្រីកីឡាប្រកួតជាលក្ខណៈសាកលអាជីពប្រភេទទម្ងន់៦០គីឡូក្រាម ឈ្នះពិន្ទុផល សោភ័ណ្ឌ មកពីក្លឹបតាឡីដំរីមានឫទ្ធិ ។
ក្នុងការប្រកួតលើសង្វៀនស្ថានីយទូរទស្សន៍បាយ័នកាលពីរសៀលថ្ងៃទី១៤ ឧសភា កន្លងមកនេះកីឡាករកន ចន្ថា មកពីក្លឹបអាជ្ញាធរជាតិអាវុធគីមីបានបំបាក់ស្វាយ រិទ្ធី ជាសិស្សច្បងមកពីក្លឹបកងទ័ពជើងគោកឱ្យសន្លប់ក្នុងទឹកទី៣។ ចំណែកឯម ខ្លឹមខ្មៅ មកពីក្លឹបគ្រុឌមានជ័យបានយកឈ្នះពិន្ទុ វ៉ាន់ ចាន់វៃ មកពីក្លឹបព្រះខ័នរាជ្យ។
រវាងកន ចន្ថា និងស្វាយ រិទ្ធី សំរាប់២ទឹកដំបូងទោះបីជាការប្រកួតមិនទាន់ក្តៅសាច់ដុំនៅឡើយ តែស្វាយ រិទ្ធី បានបង្ហាញនូវការចាញ់ប្រៀប ពិសេសផ្នែកកំលាំងជាមួយកន ចន្ថា រួចទៅហើយ។ ស្វាយ រិទ្ធី ជាអ្នកប្រដាល់ចាស់វស្សាធ្លាប់ទទួលបានការគាំទ្រ និងល្បីឈ្មោះមួយរូប ប៉ុន្តែគេបានឃ្លាតឆ្ងាយពីសង្វៀនមួយរយៈវែង។ ពេលត្រឡប់មកវិញស្នៀតគុន និងកំលាំងរបស់គេហាក់ដូចជាបាត់បង់ច្រើន។ រិទ្ធីអាចមានលទ្ធភាពទប់ទល់ជាមួយចន្ថាទាំងលំបាកបានត្រឹម២ទឹកប៉ុណ្ណោះ ចូលដល់ទឹកទី៣ ត្រូវចន្ថាប្រើរន្ទះជើងទាត់ចូលឆ្អឹងជំនីរខាងឆ្វេងបណ្តាលឱ្យសន្លប់ធំតែម្តង ទោះបីលោកអាជ្ញាកណ្តាលរាប់ដល់១០ក៏ងើបមិនរួចដែរ។
ចំពោះការប្រកួតរវាងឯម ខ្លឹមខ្មៅ ជាមួយវ៉ាន់ ចាន់វៃ វិញ មុននឹងចាន់វៃ ចាញ់ពិន្ទុក៏ធ្វើឱ្យខ្លឹមខ្មៅវេទនាដែរ។ ការប្រកួតទាំង៥ទឹកនោះចាន់វៃមានឱកាសទាត់ទៅលើខ្លឹមខ្មៅ ច្រើនដែរប៉ុន្តែនៅពេលចូលកៀកគេចាញ់ជង្គង់របស់ខ្លឹមខ្មៅ។ សូមបញ្ជាក់ថា រវាងគូនេះធ្លាប់មានប្រវត្តិជួបប្រកួតគ្នា៤លើកមកហើយ ដោយគិតទាំងលើកនេះផង ក្នុងនោះគឺពួកគេឈ្នះ និងចាញ់២ដងម្នាក់។
ម៉ោង សំអាត មកពីក្លឹបតាព្រហ្មមានជ័យបានយកឈ្នះពិន្ទុឯម ចាន់រស្មី មកពីក្លឹបគ្រុឌមានជ័យ។ រស្មីបានប្រើស្នៀតកណ្តាប់ដៃវាយយ៉ាងសន្ធាប់ទៅលើសំអាត ប៉ុន្តែមិនទទួលលទ្ធផលល្អទេ ព្រោះការបញ្ជូនកណ្តាប់ដៃនោះភាគច្រើន គឺខុសគោលដៅ។ ផ្ទុយទៅវិញសំអាតដែលវាយចេញមួយៗ តែត្រូវគោលដៅល្អជាង។ រ៉ង សុខចាន់ មកពីក្លឹបរ៉ាហាប់ស្វាយប៉ាកឈ្នះពិន្ទុពៅ សារ៉ាត់ មកពីក្លឹបវីអាយភីចំការមន។ រីឯពុទ្ធ សុជាតិ មកពីក្លឹបពុទ្ធសេរីវង្សព្រែកតាទែនឈ្នះពិន្ទុសុខ វាសនា មកពីក្លឹបឃ្លាំងមឿងកីឡា ៕
ចែករំលែកព័តមាននេះ