ADផ្ទាំងផ្សព្វផ្សាយពាណិជ្ជកម្ម

Picture

មក​ស្គាល់​ភោជនីយ​ដ្ឋាន​ដ៏​ចម្លែក​ទាំង​៦​នៅ​ទ្វីប​អាស៊ី​, នៅ​ពេល​ដឹង​ហើយ​មាន​អារម្មណ៍​ព្រឺ​ព្រួច

5 ខែ មុន

ត​ទៅ​នេះ​ យើង​ខ្ញុំ​សូម​នាំ​អារម្មណ៍​ប្រិយមិត្ត​មក​ស្គាល់​​ភោជនីយ​ដ្ឋាន​៦​កន្លែង​នៅ​ទ្វីប​អាស៊ី​ដែល​ម្ចាស់​ហាង​បាន​រចនា​ចេញមក​មាន​លក្ខណៈ​ចម្លែក​ៗ​មិន​ធ្លាប់​មាន​ពី​មុន​មក​។ ចង់​ដឹង​ថា​ភោជនីយ​ដ្ឋាន​ទាំង​នោះ​មាន​លក្ខណៈ​ពិសេស​ខុស​ប្លែក​ពី​គេ​ត្រង់​ចំណុច​ណា​ខ្លះ​ យើង​សូម​នាំ​​​អារម្មណ៍​ប្រិយ​មិត្ត​មក​ស្វែង​យល់​​ដូច​តទៅ​។ ទី​១- ភោជ​នីយ​ដ្ឋាន​បង្គន់​ភោជនីយ​ដ្ឋាន​បង្គន់ ឬថយ​លេត​រ៉េស​ស្តូរ៉ន (toilet restaurant) ស្ដាប់​មួយ​ភ្លែត​ស្ទើរ​តែ​មាន​អារម្មណ៍​ចង់​ក្អួត…

ត​ទៅ​នេះ​ យើង​ខ្ញុំ​សូម​នាំ​អារម្មណ៍​ប្រិយមិត្ត​មក​ស្គាល់​​ភោជនីយ​ដ្ឋាន​៦​កន្លែង​នៅ​ទ្វីប​អាស៊ី​ដែល​ម្ចាស់​ហាង​បាន​រចនា​ចេញមក​មាន​លក្ខណៈ​ចម្លែក​ៗ​មិន​ធ្លាប់​មាន​ពី​មុន​មក​។ ចង់​ដឹង​ថា​ភោជនីយ​ដ្ឋាន​ទាំង​នោះ​មាន​លក្ខណៈ​ពិសេស​ខុស​ប្លែក​ពី​គេ​ត្រង់​ចំណុច​ណា​ខ្លះ​ យើង​សូម​នាំ​​​អារម្មណ៍​ប្រិយ​មិត្ត​មក​ស្វែង​យល់​​ដូច​តទៅ​។

ទី​១- ភោជ​នីយ​ដ្ឋាន​បង្គន់​
ភោជនីយ​ដ្ឋាន​បង្គន់ ឬថយ​លេត​រ៉េស​ស្តូរ៉ន (toilet restaurant) ស្ដាប់​មួយ​ភ្លែត​ស្ទើរ​តែ​មាន​អារម្មណ៍​ចង់​ក្អួត ឬ​ចង់​មិន​​ស្រួល​ខ្លួន​។ ជា​ពិសេស​ អ្នក​ដែល​ស្ដាប់​ពី​ដំបូង​ដៃ​ស្មាន​ថា​ជា​បង្គន់​មែន​ទែន។ ​តាម​ពិត​ វា​ជា​​ចាន​​គេ​រចនា​ម៉ូត​ដូច​ចាន​បង្គន់​​​សម្រាប់​ដាក់​អាហារ​​។​​ ​​លុះ​ត្រា​តែ​​​អ្នក​​ដែល​ហ៊ាន​កាត់​ចិត្ត​ និង​ចេះ​ទប់​អារម្មណ៍​ឱ្យ​បាន​ល្អ​ទើប​ហ៊ាន​ដាក់​អាហារ​ចូល​ទៅ​ក្នុង​មាត់​របស់​ពួក​គេ​។ ជា​ពិសេស ពួក​គេ​ត្រូវ​គិត​នៅ​ក្នុង​ចិត្ត​នេះ​មិន​មែន​ជា​ចាន​បង្គន់​មែន​ទែន​​ទេ​។ នេះ​ជា​របស់​ឧបកិច្ច​តែ​ប៉ុណ្ណោះ​។​ លុះ​ត្រា​តែ​តាំង​ចិត្ត​បែប​នេះទើប​ពួក​គេ​គ្មាន​អារម្មណ៍​ខ្ពើម​ឆ្អើម​​។ ​ភោជនីយ​ដ្ឋាន​បង្គន់​មាន​ទី​តាំង​នៅ​កោះ​តៃវ៉ាន់​។

នៅ​ពេល​ភ្ញៀវ​ដើរ​ចូល​ទៅ​ខាង​ក្នុង​ភោជនីយ​ដ្ឋាន,​ ពួក​គេ​អាច​នឹង​មាន​អារម្មណ៍​ថា​ទីនេះ​ប្រៀប​បាន​នឹង​​បង្គន់​ខ្នាត​ធំ​ដែល​ឃើញ​សុទ្ធ​តែ​ចាន​​បង្គន់​ពាស​ពេញ​ហ្នឹង​តែ​ម្ដង​។ ចំណុច​ដែល​គួរ​ឱ្យ​ចាប់​អារម្មណ៍​នៅ​ត្រង់​ថា​​ភ្ញៀវ​ដែល​មក​ទី​នេះ​ត្រូវ​អង្គុយ​ពី​លើ​ចាន​បង្គន់​ផង និង​ដួស​អាហារ​ចេញ​ពី​ចាន​បង្គន់​ផង​។ បើ​សម្រាប់​អ្នក​ដែល​​ឆាប់​មាន​អារម្មណ៍​ញញើត​នឹង​ទិដ្ឋ​ភាព​បែប​នេះ​គ្រាន់​តែ​ចូល​ទៅ​មាន​អារម្មណ៍​ចង់​ខ្យល់​ចាប់​ភ្លាម​ៗ​​។ ប៉ុន្តែ​ភោជនីយ​ដ្ឋា​ន​នេះ​បាន​ទាក់​ទាញ​អ្នក​ទេស​ចរ​ជាតិ​ និង​អន្តរ​ជាតិ​យ៉ាង​ច្រើន​កុះ​ករ​ទៅ​ញ៉ាំ​អាហារ​។ ពួក​គេ​ចង់​​ឃើញ ចង់​ស្គាល់​របស់​ចម្លែក​ៗ​ប្រភេទ​នេះ​ដែល​ផ្ដល់​បរិយាកាស​ញ៉ាំ​អាហារ​គ្មាន​២​នៅ​ក្នុង​លោក​។​​​


២- ហាង​កាហ្វេ​បិសាច​ជញ្ជក់​ឈាម​ ឬ​វេម​ផាយអឺ កាហ្វេ (Vampire Café)
ហាង​កាហ្វេ​បិសាច​ជញ្ជក់​ឈាម​ ឬវេម​ផាយ​អឺ កាហ្វេ​ មាន​ទីតាំង​ស្ថិត​នៅ​សង្កាត់​ហ្គីនហ្សា (Ginza) នៃ​ទី​ក្រុង​តូក្យូ​។ ហាង​នេះ​ត្រូវ​​គេ​តុប​តែង​ឡើង​ដើម្បី​បង្កើត​បរិយា​កាស​ព្រឺ​ព្រួច និង​រន្ធត់​សម្រាប់​អតិថិ​ជន​​ដោយ​ប្រើ​ប្រាស់​វាំង​នន​មាន​ពណ៌​ក្រហាម​ច្រាល​ដូច​ឈាម​របស់​មនុស្ស​ពិត​ៗ​។ ក្រៅ​ពី​នេះ ហាង​ក៏​បំពាក់​ទៀន, ក្ដារ​មឈូស និង​កញ្ចក់​ដែល​ដិត​ដាម​ដោយ​ឈាម​ ប្រៀប​ដូច​ជា​ទី​នេះ​មាន​បិសាច​ទើប​តែ​ជញ្ជក់​ឈាម​មនុស្ស​ថ្មី​ៗ​។

​រឹត​តែ​គួរ​ឱ្យ​ចាប់​អារម្មណ៍​ថែម​ទៀត​នោះ​គឺ​អាហារ​ និង​ភេសជ្ជៈ​នៅ​ទី​នេះត្រូវ​គេ​ដាក់​រហស្ស​នាម​ដូច​ឈ្មោះ​បិសាច​ជញ្ជក់​ឈាម​នៅ​ក្នុង​រឿង​និទាន​។ អាហារ​ទាំង​នេះ​ក៏​រៀប​ចំ​តុប​តែង​មាន​លក្ខណៈ​គួរ​ឱ្យ​ព្រឺ​ព្រួច​ផង​ដែរ​។ ​មែនទែន​ទៅ, ការ​រៀប​ចំ​បរិយាកាស​នៅ​ក្នុង​ហាង​នេះ​មិន​មែន​ដើម្បី​បន្លាច​ចិត្ត​របស់​ភ្ញៀវ​ទេ​។ ប៉ុន្តែ​ដើម្បី​បង្ក​បរិយាកាស​ដែល​ចម្លែក​ខុស​គេ​។ សម្រាប់​អ្នក​ដែល​ចូល​ចិត្ត​ទិដ្ឋ​ភាព​បែប​ហាឡូវីន (Halloween), ទិដ្ឋភាព​បែប​រន្ធត់ ឬ​បែប​​បិសាច​ជញ្ជាក់​ឈាម​ពិត​ជា​​ពេញ​ចិត្ត​ស្ដូក​​នឹង​​​ទី​កន្លែង​បែប​នេះ​។


៣- ភោជ​នីយ​ដ្ឋាន​ពន្ធ​នាគារ​
ភោជនីយ​ដ្ឋាន​ពន្ធ​នាគារ​​មាន​ទី​តាំង​នៅ​​​ប្រទេស​ឥណ្ឌា​​ និង​​មាន​ភិន​ភាគ​ដូច​​​ពន្ធនាគារ​បេះ​បិទ​។ នៅ​ពេល​ភ្ញៀវ​ដើរ​ចូល​ទៅ​ដល់​​ក្នុង​ភោជនីយ​ដ្ឋាន​​ភ្លាម​, ពួ​កគេ​ក្រឡេក​មើល​ឆ្វេង​ស្ដាំ​ឃើញ​គេ​រៀប​ចំ​ជា​បន្ទប់​មាន​លក្ខណៈ​ដូច​បន្ទប់​ជាប់​ឃុំ​បេះ​ដាក់​។ ​ភ្ញៀវ​ត្រូ​វចូល​អង្គុយ​នៅ​ក្នុង​បន្ទប់​ទាំង​នេះ​។​ រួច​ហើយ,​ បុគ្គលិក​ហាង​នឹង​បិទ​ទ្វារ​ចាក់​សោ​ពី​ខាង​ក្រៅ​។

អ្នក​កុម្ម៉ង់​អាហារ និង​អ្នក​លើក​អាហារ​ស្លៀក​ពាក់​ជា​អនុរក្ស​ពន្ធ​នាគារ​។ មុខ​ម្ហូប​នៅ​ទី​នេះ​មាន​ឈ្មោះ​ប្លែក​ៗ​មិន​ដែល​ឮ​នៅ​កន្លែង​ផ្សេង​។ សូម្បី​តែ​អាហារ​ក៏​ត្រូវ​គេ​ដាក់​​ឱ្យ​ភ្ញៀវ​ញ៉ាំ​នៅ​ក្នុង​​ចាន​សម្រាប់​អ្នក​ទោស​ផង​ដែរ​​។ ដូច​នេះ ​ការ​ញ៉ាំ​អាហារ​​​មាន​អត្ថ​ន័យ​ជ្រាល​ជ្រៅ​មិន​អាច​បំភ្លេច​បាន​​។ និយាយ​ទៅ, ភ្ញៀវ​នឹង​មាន​អារម្មណ៍​ដូច​នៅក្នុង​ពន្ធ​នាគារ​ពិត​ៗ​តែ​ម្ដង​។


៤- ​ភោជនីយ​ដ្ឋាន​កាយ៉ាប៊ូគីយ៉ា (Kayabukiya)
​កាយ៉ាប៊ូគីយ៉ា​ជា​ភោជនីយ​ដ្ឋាន​បែប​ប្រពៃណី​របស់​ប្រទេស​ជប៉ុន​ និង​មាន​ទី​តាំង​នៅ​សង្កាត់​អាសាគូសា (Asakusa) នៃ​​ទី​ក្រុង​តូក្យូ​។​ ​លក្ខណៈ​ចម្លែក​របស់​​​ភោជ​នីយ​ដ្ឋាន​នេះ​នៅ​ត្រង់​ថា​ហាង​មិន​ប្រើ​ប្រាស់​បុគ្គលិក​ជា​មនុស្ស​​សម្រាប់​​​ទទួល​​ការ​កុម្ម៉ង់​អាហារ ឬ​លើក​អាហារ​ជូន​ភ្ញៀវ​ទេ​។ ប៉ុន្តែ​គេ​ប្រើ​ប្រាស់​សត្វ​ស្វា​ជា​ច្រើន​ក្បាល​ដែល​គេ​បង្វឹក​យ៉ាង​ស្ទាត់​ជំនាញ​ផ្នែក​សេវា​រត់​តុ​។

បើ​គិត​មើល​ទៅ, ប្រើ​សត្វ​ស្វា​រត់​តុ​ក៏​ម៉្យាង​ដែរ​ព្រោះ​​​ហាង​អាច​កាត់​បន្ថយ​ថ្លៃ​ចំណាយ​បាន​ច្រើន​។ ផ្ទុយ​ពី​បុគ្គលិក​ជា​មនុស្ស​ដែល​ត្រូវ​បើក​ប្រាក់​ខែ​ឱ្យ​ពួក​គេ​ជា​ទៀង​ទាត់​, សត្វ​ស្វា​ទាំង​នេះ​មិន​ត្រូវ​ការ​អ្វី​ច្រើន​ទេ​ ក្រៅ​ពី​ផ្លែ​ចេក​ទុំ​សម្រាប់​វា​ស៊ី​មួយ​​ចម្អែត​ក្រពះ​។​​ ​មិន​តែ​ប៉ុណ្ណោះ ពួក​វា​អាច​ទទួល​បាន​ការ​យក​ចិត្ត​ទុក​ដាក់​ ឬ​បី​បន្លែង​ពី​អតិថិជន​ដែល​​មក​ញ៉ាំ​អាហារ​នៅ​ទី​នេះ​។​​​


៥- ភោជនីយ​ដ្ឋាន​យូនីសាន់​ស្ប៉ា​ (Yunessun Spa)
​ភោជ​នីយ​ដ្ឋាន​យូនី​សាន់​ស្ប៉ា​ជា​អាហារ​ដ្ឋាន​ដ៏​ចម្លែក​បំផុត​មួយ​ ​ហើយ​​​ក៏​បង្ក​បរិយាកាស​​សប្បាយ​​រីក​រាយ​សម្បើម​ណាស់​ដែរ​​សម្រាប់​​ភ្ញៀវ​​ដែល​ទៅ​កម្សាន្ត​នៅ​ប្រទេស​ជប៉ុន​។ ទី​នេះ​ត្រូវ​គេ​រៀប​ចំ​តុប​តែង​ប្រៀប​ដូច​ជា​សួន​កម្សាន្ត​​ដែល​​រៀប​ចំ​ដូច​ជា​កន្លែង​​ស្ប៉ា​។ អតិថិជន​អាច​ចុះ​ត្រាំ​ខ្លួន​នៅ​ក្នុង​អាង​ទឹក​ដែល​គេ​ចាក់​ស្រា​ទំពាំង​បាយ​ជូរ​ចូល,​ ចាក់​កាហ្វេ​ចូល​ និង​ចាក់​មី​ចូល​ទៅ​ក្នុង​ទឹក​នោះ​។​

របស់​ដែល​ចាក់​ចូល​ទៅ​ក្នុង​នោះ​មិន​មែន​សម្រាប់​ឱ្យ​ពួក​គេ​ទទួល​ទាន​ទេ​។ របស់​សម្រាប់​ភ្ញៀវ​ញ៉ាំ​ផ្សេង​ពី​នេះ​។ ពួក​គេ​នឹង​ទទួល​បាន​ការ​ផ្ដល់​ជូន​ស្រា​ទំពាំង​បាយ​ជូរ, កាហ្វេ និង​មី​​ ​ដែល​ដាក់​នៅ​ក្នុង​ចាន និង​នៅ​ក្នុង​កែវ​​ត្រឹម​ត្រូវ​។ គោល​បំណង​នៃ​ការ​បង្កើត​​កន្លែង​ស្ប៉ា​ដ៏​ចម្លែក​នេះ​ដើម្បី​បង្ក​បរិយាកាស​រំភើប​រីក​រាយ​សម្រាប់​ភ្ញៀវ​។​ សូម​ជម្រាប​ថា​ស្រា​ទំពាំង​បាយជូរ, កាហ្វេ និង​ទឹក​ស៊ុប​សម្រាប់​ស្រុះ​មី​សុទ្ធ​តែ​ជា​របស់​ឧប​កិច្ច​តែ​ប៉ុណ្ណោះ​ដើម្បី​​​ធ្វើ​ឱ្យ​ភ្ញៀវ​មាន​អារម្មណ៍​ថា​ដូច​ជា​របស់​ពិត​ៗ​។​


៦- ហាង​កាហ្វេ​ត្រី​នៅ​វៀតណាម​
ហាង​កាហ្វេ​​ឈ្មោះ​អាមីក​ហ៊្វីស​កាហ្វេ (Amixt Fish Café) ​មាន​តែ​១​គត់​នៅ​លើ​ពិភពលោក​ ស្ថិត​នៅ​ទី​ក្រុង​ហូជីមិញ ប្រទេស​វៀតណាម​។ នៅ​ទី​នេះ ភ្ញៀវ​អាច​អង្គុយ​ញ៉ាំ​កាហ្វេ​បណ្ដែត​អារម្មណ៍​លេង​នៅ​លើ​ទឹក​ដែល​គេ​បូម​ដាក់​នៅ​លើ​កម្រាល​ឥដ្ឋ​កម្ពស់​ទឹក​ត្រឹម​កែង​ជើង​​​។ ក្រៅ​ពី​នេះ​ គេ​ក៏​លែង​ត្រី​រាប់​រយ​ក្បាល​មាន​ច្រើន​ប្រភេទ​ និង​ចម្រុះ​ពណ៌​ហែល​ឆ្វែល​ឆ្វាត់​កាត់​ជើង​របស់​ភ្ញៀវ​។ ​


មុន​នឹង​ដើរ​ចូល​ទៅ​ក្នុង​ហាង​នេះ ភ្ញៀវ​ទាំង​អស់​ត្រូវ​ដោះ​ស្បែក​ជើង​ចេញ​ឱ្យ​អស់​ ទុក​តែ​ជើង​ទទេ​ប៉ុណ្ណោះ​។ នៅ​ទី​នេះ​មាន​២​ជាន់​។ ប៉ុន្តែ​អាង​ទឹក​មាន​តែ​នៅ​ជាន់​ទី​១​ប៉ុណ្ណោះ​។ ​ទឹក​នៅ​ទី​នេះ​នឹង​ត្រូវ​បូម​ចេញ​ដាក់​ទឹក​ថ្មី​រៀង​រាល់​២៤​ម៉ោង​ម្ដង​។ ភ្ញៀវ​ដែល​​មក​​ញ៉ាំ​កាហ្វេ​នៅ​ទី​នេះ​​មាន​អារម្មណ៍​សប្បាយ​រំភើប​នឹង​បរិយា​កាស​បែប​​​នេះ​ដែល​មាន​លក្ខណៈ​ប្លែក​ខុស​ពី​កន្លែង​ផ្សេង​៕​​

ប្រភព​៖ Daily Mail, Japan Times និង​ប្រភព​ដទៃ​ទៀត​
https://www.cktravels.com/modern-toilet-restaurant-taipei/
https://tokyocheapo.com/restaurant/vampire-cafe/
https://www.dailymail.co.uk/news/article-1071289/Pictured-The-amazing-monkey-waiters-serve-tables-Japanese-restaurant.html
https://www.japantimes.co.jp/life/2017/06/18/lifestyle/dipping-hakones-unusual-hot-spas/

អតិថិជន​ចុះ​ត្រាំ​នៅ​ក្នុង​ទឹក​ស៊ុប​មី​តាម​បែប​ជប៉ុន​ (នេះ​គ្រាន់​តែ​ជា​ការ​ឧប​កិច្ច​តែ​ប៉ុណ្ណោះ​។ គេ​មាន​វិធី​កែ​ឆ្នៃ​ទឹក​ដោយ​ប្រើ​ប្រាស់​ថ្នាំ​ពណ៌​ ឬ​ល័ខ​ដើម្បី​ធ្វើ​ឱ្យ​មាន​ភិន​ភាគ​ខាង​ក្រៅ​ដូច​ជា​ទឹក​ស៊ុប​មី​។​)

អត្ថបទសរសេរ ដោយ

កែសម្រួលដោយ