ក្នុងរដូវបិទនេសាទ សកម្មភាពបទល្មើសដាក់លូស្បៃមុងដោយខុសច្បាប់ នៅតាមអតីតឡូនេសាទ ស្ថិតក្នុងស្រុកកងមាស ត្រូវបានកម្លាំងជំនាញជលផលចុះបង្ក្រាប ដោយធ្វើឡើងស្ទើរតែពេញមួយថ្ងៃ
ខេត្តកំពង់ចាម ៖ ក្នុងរដូវបិទនេសាទ សកម្មភាពបទល្មើសដាក់លូស្បៃមុងដោយខុសច្បាប់ នៅតាមអតីតឡូនេសាទ ស្ថិតក្នុងស្រុកកងមាស ត្រូវបានកម្លាំងជំនាញជលផលចុះបង្ក្រាប ដោយធ្វើឡើងស្ទើរតែពេញមួយថ្ងៃ កាលពីថ្ងៃទី១២ ខែកញ្ញា ឆ្នាំ២០២៣ ក្រោមការណែនាំពីសំណាក់ឯកឧត្តមអភិបាលខេត្ត ក៏ដូចជាលោកព្រះរាជអាជ្ញាអមសាលាដំបូងខេត្ត។
ហើយក្នុងប្រតិបត្តិការខាងលើនេះ មន្ត្រីជំនាញជលផលសហការជាមួយអាជ្ញាធរមូលដ្ឋាន បានរឹបអូសស្បៃមុងរាប់ពាន់ម៉ែត្រ ព្រមទាំងចាក់លែងកូនត្រីចូលទៅក្នុងបឹងធម្មជាតិវិញ និងឧរឹបអូសបករណ៍នេសាទខុសច្បាប់ជាច្រើន ហើយយកទៅដុតបំផ្លាញចោលនៅនឹងកន្លែងផងដែរ ព្រមទាំងធ្វើការស្រាវជ្រាវ ដើម្បីស្វែងរកអ្នកប្រព្រឹត្តបទល្មើសទាំងនេះទៀតផង។
លោក អ៊ុក ណារិន នាយខណ្ឌរដ្ឋបាលជលផលកំពង់ចាម បានឱ្យដឹងថា ចាប់ពីរដូវបិទនេសាទ ពេលដែលទឹកទន្លេមេគង្គបានហូរចូលតាមបឹងបួរ ក្នុងនោះត្រូវបានអាជ្ញាធរមូលដ្ឋានរាយការណ៍ដល់ស្ថាប័នជំនាញថា មានសកម្មភាពដាក់លូស្បៃមុងជាច្រើន ដើម្បីចាប់យកត្រីតូចធំ។ ហើយក្រុមដែលប្រព្រឹត្តបទល្មើសទាំងនេះ ត្រូវបានគេសង្ស័យថា គឺជាមុខសញ្ញាចាស់ដដែលៗ។
លោក អ៊ុក ណារិន បានឱ្យដឹងបន្តថា មន្ត្រីជំនាញជលផលបានធ្វើការផ្សព្វផ្សាយតាមបណ្ដាញសង្គម ក៏ដូចជាការចុះបង្រៀនដោយផ្ទាល់ ប៉ុន្តែនៅតែមានពលរដ្ឋខិលខូចមួយចំនួនបន្តសកម្មភាពលួ.ចដាក់បទល្មើសនេសាទដដែល។
ចំណែកលោក នាយ ខាន់ រដ្ឋបាលជលផលកំពង់ចាម បន្តឲ្យដឹងដែរថា ដោយទទួលបាននូវព័ត៌មាននេះភ្លាម រូបលោកបានសុំគោលការណ៍ពីឯកឧត្តម វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្ត និងឯកឧត្តមអភិបាលខេត្ត ដោយរូបលោកដឹកនាំប្រតិបត្តិការនេះដោយផ្ទាល់តែម្ដង។
លោក នាយ ខាន់ បន្តថា ហើយក្នុងពេលចុះបង្ក្រាបនេះ គឺមិនឱ្យមុខសញ្ញាដាក់បទល្មើសនេសាទដឹងជាមុននោះទេ គឺធ្វើឡើងសហការជាមួយអាជ្ញាធរស្រុកកងមាស អធិការដ្ឋាននរគបាលស្រុកកងមាស និងកម្លាំងប៉ុស្តិ៍នគរបាលរដ្ឋបាលឃុំព្រែកកុយ ដោយមានការអនុញ្ញាតពីឯកឧត្តម វង្ស ប៊ុនវិសុទ្ធ ព្រះរាជអាជ្ញាអយ្យការអមសាលាដំបូងខេត្តកំពង់ចាម បានចុះធ្វើកិច្ចសន្យាបញ្ឈប់សកម្មភាពចំពោះមុខសញ្ញាបទល្មើស ដែលប្រើប្រាស់ឧបករណ៍លូស្បៃមុង និងឧបករណ៍លបប្រឹស១០០ បានចំនួន០៧នាក់ និងបង្ក្រាបបទល្មើសជលផលបានចំនួន០៣ករណីទៀត ហើយកសាងសំណុំរឿងតាមនីតិវិធីនៃច្បាប់ស្តីពីជលផល និងរុះរើបំផ្លាញចោលវត្ថុតាងនៃបទល្មើសជលផលនៅនិងកន្លែងកើតហេតុតែម្ដង ក្នុងនោះរួមមាន ៖
ករណីទី០១ ៖ មន្ត្រីជំនាញជលផលរឹបអូសបទល្មើសលូស្បៃមុងចំនួន០៥មាត់, របាំងស្បៃមុងចំនួន២០០ម៉ែត្រ, ស៊ងស្បៃមុងចំនួន៥កន្លែង ប្រវែង៥០ម៉ែត្រ និងបង្គោលចម្រឹង ចំនួន៤៥ដើម នៅចំណុចបឹងកក់ ស្ថិតក្នុងឃុំស្តៅ ស្រុកកងមាស ខេត្តកំពង់ចាម។
ករណីទី០២ ៖ មន្ត្រីជំនាញជលផលរឹបអូសបទល្មើសនេសាទ លូស្បៃមុងចំនួន០៧មាត់, របាំងស្បៃមុងចំនួន៣៥០ម៉ែត្រ, ស៊ងស្បៃមុងចំនួន៧កន្លែង ប្រវែង៧៥ម៉ែត្រ និងបង្គោលចម្រឹងចំនួន៩៥ដើម នៅចំណុចបឹងជាឬស្សី ស្ថិតក្នុងឃុំស្តៅ ស្រុកកងមាស ខេត្តកំពង់ចាម។
ចំណែកករណីទី០៣ ៖ មន្ត្រីជំនាញរឹបអូសបទល្មើសនេសាទបាន លូស្បៃមុងចំនួន១២មាត់, របាំងស្បៃមុងចំនួន៦០០ម៉ែត្រ, ស៊ងស្បៃមុងចំនួន១២កន្លែង ប្រវែង១២៥ម៉ែត្រ និងបង្គោលចម្រឹង ចំនួន១៨០ដើម នៅចំណុចរោងវែង ស្ថិតក្នុងឃុំព្រែកកុយ ស្រុកកងមាស ខេត្តកំពង់ចាម។
លោកនាយខណ្ឌរដ្ឋបាលជលផលកំពង់ចាម បញ្ជាក់បន្ថែមថា នៅក្នុងប្រតិបត្តិការចុះបង្ក្រាបបានចំនួន៣ករណី នៅក្នុងស្រុកកងមាសខាងលើនេះ គឺមិនមានលេចមុខសញ្ញាជនសង្ស័យណាម្នាក់ត្រូវបានរកឃើញនោះទេ។ តែមន្ត្រីជំនាញ បានដាក់ការសង្ស័យថា អាចជាមុខសញ្ញាចាស់មុខដដែលៗ។
ជាមួយគ្នានោះដែរ មន្ត្រីជំនាញសូមធ្វើការអំពាវនាវដល់បងប្អូនប្រជាពលរដ្ឋ មេត្តាបញ្ឈប់ប្រើប្រាស់ឧបករណ៍នេសាទដោយខុសច្បាប់ ព្រោះថា វាបានបំផ្លាញធនធានមច្ឆាជាតិយ៉ាងធ្ងន់ធ្ងរ សូម្បីតែកូនត្រីតូចទើបនឹងញាស់ ក៏មិនអាចហែលគេចរួចពីលបស្បៃមុងទាំងនោះដែរ។ ដូច្នេះមន្ត្រីជំនាញក្រើនរំលឹក សូមបងប្អូនមេត្តាងាកមកប្រើប្រាស់ឧបករណ៍នេសាទស្របច្បាប់ប្រសើរជាង ដើម្បីថែរក្សានិរន្តរភាពមច្ឆាជាតិឲ្យគង់វង្ស និងសម្បូរនាពេលអនាគត៕
ចែករំលែកព័តមាននេះ