ខេត្តបន្ទាយមានជ័យ ៖ កម្លាំងនគរបាលជាតិកម្ពុជា និងកម្លាំងនគរបាលភូមិន្ទថៃ បានបើកសហប្រតិបត្តិការស្រាវជ្រាវ រហូតឈានដល់កំណត់បានមុខសញ្ញា និងឃាត់ខ្លួនជនជាតិថៃ ចំនួន០៤នាក់ កាលពីថ្ងៃទី០៩ ខែកញ្ញា…
ខេត្តបន្ទាយមានជ័យ ៖ កម្លាំងនគរបាលជាតិកម្ពុជា និងកម្លាំងនគរបាលភូមិន្ទថៃ បានបើកសហប្រតិបត្តិការស្រាវជ្រាវ រហូតឈានដល់កំណត់បានមុខសញ្ញា និងឃាត់ខ្លួនជនជាតិថៃ ចំនួន០៤នាក់ កាលពីថ្ងៃទី០៩ ខែកញ្ញា ឆ្នាំ២០២៣ ដែលកំពុងសំងំលាក់ខ្លួនក្នុងភូមិសាស្ត្រ ក្រុងប៉ោយប៉ែត ខេត្តបន្ទាយមានជ័យ ពាក់ព័ន្ធនឹងអំពើឆបោកតាមប្រព័ន្ធអនឡាញ បណ្តាលឲ្យកើតមានអំពើឃា.តកម្មលើពលរដ្ឋថៃមួយគ្រួសារ នៅខេត្តសាមុតប្រាកាន ប្រទេសថៃ កាលពីថ្ងៃទី២៨ ខែសីហា ឆ្នាំ២០២៣ និងមានមនុស្សស្លា.ប់ ចំនួន០៣នាក់។
ក្រោមបទបញ្ជាដ៏ម៉ឺងម៉ាត់របស់នាយឧត្តមសេនីយ៍ ស ថេត អគ្គស្នងការនគរជាតិ ដោយការយកចិត្តទុកដាក់ខ្ពស់ និងមានការចង្អុលដឹកនាំពីឧត្តមសេនីយ៍ឯក ឌី វិជ្ជា អគ្គស្នងការរង នាយកដ្ឋានកណ្តាលសន្តិសុខ បានសហការជាមួយនាយកដ្ឋានប្រឆាំងបទល្មើសបច្ចេកវិទ្យា នាយកដ្ឋានប្រឆាំងបទល្មើសល្បែងពាណិជ្ជកម្ម និងលោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ និងមានកិច្ចសម្របសម្រួលនីតិវិធីដោយអយ្យការអមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រី អេង លីហួរ ស្នងការរងផែនការងារអន្តោប្រវេសន៍ បានធ្វើការផ្លាស់ប្តូរព័ត៌មានជាមួយនគរបាលភូមិន្ទថៃ រហូតកំណត់បានមុខសញ្ញា និងឃាត់ខ្លួនជនជាតិថៃ ចំនួន០៤នាក់ ដែលកំពុងរត់គេច និងសំងំលាក់ខ្លួនពីការតាមចាប់របស់សមត្ថកិច្ច ក្រោយធ្វើសកម្មភាពឆបោកតាមប្រព័ន្ធអនឡាញ បណ្តាលឲ្យជនរងគ្រោះជាជនជាតិថៃ សម្លា.ប់គ្រួសាររបស់ខ្លួនឯង ដែលមានម្តាយ និងកូនពីរនាក់ រួចព្យាយាមធ្វើអត្តឃា.តខ្លួនតាមក្រោយ។
កិច្ចប្រតិបត្តិការនេះ បានធ្វើឡើងតែមួយសប្តាហ៍ប៉ុណ្ណោះបន្ទាប់ពីនាយឧត្តមសេនីយ៍ ស ថេត អគ្គស្នងការនគរជាតិ ទទួលជំនួបសម្តែងការគួរសម និងពិភាក្សាការងារជាមួយនាយឧត្ដមសេនីយ៍ Surachate Hakparn អគ្គស្នងការរងនគរបាលភូមិន្ទថៃ និងគណៈប្រតិភូកាលពីថ្ងៃទី០៤ ខែកញ្ញា ឆ្នាំ២០២៣ ខណៈកិច្ចពិភាក្សានេះ បានផ្តោតសំខាន់ អំពីការបន្តពង្រឹង និងពង្រីកទំនាក់ទំនងកិច្ចសហប្រតិបត្តិការរវាងនគរបាលជាតិកម្ពុជា និងនគរបាលភូមិន្ទថៃ ឲ្យមានភាពរឹងមាំជិតស្និទ្ធបន្ថែមទៀត សំដៅសម្រេចឲ្យបាននូវលទ្ធផលធំៗ ក្នុងកិច្ចសហប្រតិបត្តិការបង្ការទប់ស្កាត់ និងប្រឆាំងបទល្មើសឧក្រិដ្ឋឆ្លងដែនគ្រប់ប្រភេទ ។
បច្ចុប្បន្ន ជនសង្ស័យទាំង៤នាក់ ក្រោយឃាត់ខ្លួន ត្រូវបានប្រគល់ជូនសមត្ថកិច្ចថៃនាំយកទៅ ប្រទេសថៃ ដើម្បីបន្តនីតិវិធីកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់ ៕
ចែករំលែកព័តមាននេះ