ខេត្តបន្ទាយមានជ័យ ៖ ជនសង្ស័យ០៣នាក់ពាក់ព័ន្ធករណីជួញដូរ និងប្រើប្រាស់នូវសារធាតុញៀន រួមនឹងវត្ថុតាង ត្រូវបានកម្លាំងការិយាល័យប្រឆាំងគ្រឿងញៀន កងរាជអាវុធហត្ថខេត្តបន្ទាយមានជ័យ បញ្ជូនទៅសាលាដំបូងខេត្ត ហើយនៅរសៀលថ្ងៃចន្ទ ទី១១ ខែកញ្ញា ឆ្នាំ២០២៣ ដើម្បីអនុវត្តតាមនីតិវិធី ។
លោកវរសេនីយ៍ត្រី ចាន់ រដ្ឋា មេបញ្ជាការមូលដ្ឋានកងរាជអាវុធហត្ថស្រុកមង្គលបូរី បានឱ្យដឹងថា កាលពីវេលាម៉ោង១០និង១៥នាទីយប់ ថ្ងៃទី០៩ ខែកញ្ញា ឆ្នាំ២០២៣ លោកបានដឹកនាំកម្លាំងមូលដ្ឋានកងរាជអាវុធហត្ថស្រុកមង្គលបូរី បើកប្រតិបត្តិការបង្ក្រាបករណីជួញដូរ និងប្រើប្រាស់ដោយខុសច្បាប់ នូវសារធាតុញៀនឃាត់ខ្លួនជនសង្ស័យចំនួន០៣នាក់ នៅចំណុចមុខរោងកុនចាស់ ស្ថិតក្នុងភូមិឬស្សីក្រោក ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ព្រមទាំងចាប់យកសម្ភារៈ វត្ថុតាងរួមមាន ៖
-គ្រឿងញៀនប្រភេទម្ស៉ៅក្រាមពណ៌សថ្លា (ទឹកកក) ចំនួន ០២កូនថង់កិប ទម្ងន់ ១,១៣ក្រាម
-ម៉ូតូចំនួន ០២គ្រឿង
-ទូរសព្ទ ចំនួន ០៣គ្រឿង ។
ជនសង្ស័យទាំង៣នាក់ រួមមាន៖
១-ឈ្មោះ ឆោម សុធារ៉ា ភេទប្រុស អាយុ២០ឆ្នាំ ជនជាតិខ្មែរ មុខរបរជាងដែក បច្ចុប្បន្ននៅភូមិអូតាម៉ា ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ (ជួញដូរ និងប្រើប្រាស់)។
២-ឈ្មោះ សំរ៉ង់ ចាន់រិទ្ធ ហៅខ្មូត ភេទប្រុស អាយុ២៣ឆ្នាំ ជនជាតិខ្មែរ មុខរបរបើកឡានដឹកដី បច្ចុប្បន្ននៅភូមិអន្លង់មានទ្រព្យ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ(ប្រើប្រាស់)។
៣-ឈ្មោះ សុខា លីម៉ា ភេទប្រុស អាយុ១៩ឆ្នាំ ជនជាតិខ្មែរ មុខរបរបុគ្គលិកកាស៊ីណូ បច្ចុប្បន្ន នៅភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ(ប្រើប្រាស់)។
លោកមេបញ្ជាការមូលដ្ឋានកងរាជអាវុធហត្ថស្រុកមង្គលបូរី បានបញ្ជាក់ថា មុនឈានដល់ការបង្ក្រាបកម្លាំងមូលដ្ឋានកងរាជអាវុធហត្ថស្រុក បានចុះល្បាតតាមមូលដ្ឋាន លុះដល់ចំណុចខាងលើ ក៏បានប្រទះឃើញជនសង្ស័យចំនួន២នាក់ជិះម៉ូតូ០១គ្រឿង គួរឱ្យសង្ស័យ កម្លាំងក៏បានឃាត់សួរនាំស្រាប់តែពេលនោះ ឈ្មោះ ឆោម សុធារ៉ា ដែលជាអ្នកបើកម៉ូតូ បានឃើញកម្លាំងក៏មានការភិតភ័យ ក៏បានបោះគ្រឿងញៀន ចោលទៅលើផ្លូវក្បែរម៉ូតូ។ ដោយឃើញបែបនេះកម្លាំង ក៏បានធ្វើការឃាត់ខ្លួនជនសង្ស័យទាំង០២នាក់ នាំមកកាន់មូលដ្ឋានកងរាជអាវុធហត្ថស្រុកមង្គលបូរី ដើម្បីចាត់ការតាមនីតិវិធី។
ក្រោយពីស្តាប់ចម្លើយសារភាពបឋម និងដោយមានការសហការពីជនសង្ស័យ កម្លាំងមូលដ្ឋានកងរាអវុធហត្ថស្រុក ក៏បានបើកប្រតិបត្តិការឃាត់ខ្លួនបានជនសង្ស័យម្នាក់ទៀត សរុប០៣នាក់ ។
លោកវរសេនីយ៍ឯកជា តារាមេបញ្ជាការរងកងរាជអាវុធហត្ថខេត្ត ទទួលការងារប្រឆាំងគ្រឿងញៀនបានឱ្យដឹងថា ក្រោយឃាត់ខ្លួន និងសួរចម្លើយ ជនសង្ស័យបានឆ្លើយសារភាពថា រូបខ្លួនពិតជាបាន ជួញដូរ និងប្រើប្រាស់ដោយខុសច្បាប់នូវសារធាតុញៀន ពិតប្រាកដមែន ៕
ចែករំលែកព័តមាននេះ