តារាសម្តែងនាង វណ្ណៈ បូរមី បានទទួលស្គាល់សមត្ថភាពរបស់ខ្លួនថា នៅស្ទើរនៅឡើយ ក្នុងផ្នែកប្រកួតប្រជែងបវរកញ្ញា ក្រោយពីនាងធ្វើបានត្រឹមតែឈ្នះលំដាប់រងនៃកម្មវិធី «Miss Univers Cambodia 2023» ដែលទើបតែ
រាជធានីភ្នំពេញ ៖ តារាសម្តែងនាង វណ្ណៈ បូរមី បានទទួលស្គាល់សមត្ថភាពរបស់ខ្លួនថា នៅស្ទើរនៅឡើយ ក្នុងផ្នែកប្រកួតប្រជែងបវរកញ្ញា ក្រោយពីនាងធ្វើបានត្រឹមតែឈ្នះលំដាប់រងនៃកម្មវិធី «Miss Univers Cambodia 2023» ដែលទើបតែបិទបញ្ចប់កាលពីពេលថ្មីៗនេះ។
តារាសម្តែងនាង វណ្ណៈ បូរមី សារភាពថា «នាងមិនធ្លាប់មានបទពិសោធន៍ ហើយនេះជាលើកដំបូង ដែលនាងបានចូលរួមកម្មវិធីប្រកួតប្រជែងផ្នែកបវរកញ្ញា ខណៈពេលនេះ ក៏បានធ្វើការសុំទោសទៅកាន់អ្នកគាំទ្ររូបនាងទាំងអស់ ដែលនាងធ្វើមិនល្អ ហើយមិនអាចឈ្នះមកុដនៅក្នុងកម្មវិធីខាងលើនេះបាន»។
ស្រីស្អាត វណ្ណៈ បូរមី បានបង្ហោះសារនៅលើបណ្តាញសង្គមថា «និយាយត្រង់ ម្សិលម៉ិញខ្ញុំអត់សប្បាយចិត្តជាមួយខ្លួនឯងទេ ព្រោះដោយសារខ្ញុំធ្វើអត់បានល្អ មានអារម្មណ៍ធ្វើឲ្យក្រុមទាំងមូលរបស់ខ្ញុំអស់សង្ឈឹម តែខ្ញុំភ្លេចគិតថា ខ្ញុំអត់ទាន់ ready ទេ»។
នាងបញ្ជាក់ថា «នេះជាលើកដំបូងរបស់ខ្ញុំ បទពិសោធន៍ជីវិត និងសិល្បៈខ្ញុំមានច្រើនមែន តែបទពិសោធន៍លើវិថីបវរកញ្ញា ខ្ញុំអត់ដែលមានទេ ត្រង់ៗចុះសូម្បីតែដំបូង កម្មវិធីគេចង់បានអី ខ្ញុំមិនដែលទាំងដឹងផង ទាល់តែបានចូលរួមទើបខ្ញុំចាប់ផ្ដើមរៀន ចាប់ផ្ដើមយល់ ហើយក៏សូមអរគុណដល់អ្នកទាំងអស់គ្នាដែលស្រលាញ់ និងគាំទ្រខ្ញុំ»។
ជាការកត់សម្គាល់ បើទោះបីជាមិនអាចឈ្នះមកុដ «Miss Universe Cambodia 2023» នេះ ក៏ដោយ ប៉ុន្តែស្រីស្អាត វណ្ណៈ បូរមី ក៏ទទួលបានចំណាត់ថ្នាក់លំដាប់រងទី២ (2nd Runner up) និងឈ្នះពានឈុតតំណាងជាតិដែលល្អផ្តាច់គេពីកម្មវិធីផងដែរ។
ហើយមុននឹងកម្មវិធីប្រឡងខាងលើនេះបានបញ្ចប់ បេក្ខនារីតំណាងឱ្យខេត្តស្វាយរៀង ស្រីស្អាតនាង វណ្ណៈ បូរមី បានបញ្ចេញទស្សនៈផ្ទាល់ខ្លួន និងឱ្យនិយមន័យនៃមកុដរបស់កម្មវិធីថា «មកុដមិនមែនបង្កើតមក ដើម្បីបង្ហាញពីភាពអង់អាច អំណាច ការចាញ់ឈ្នះ ភាពអំនួត ឬបង្កើតឱ្យមានការច្រណែន ការដណ្តើម ឬកំណត់ស្តង់ដាសម្រស់អ្វីនោះទេ»។
នាងថា «មកុដ ជាអំណោយផ្ដល់ជូនស្ត្រី ដែលគេមានទំនួលខុសត្រូវ មានសមត្ថភាពអាចបំពេញកាតព្វកិច្ច អាចនិយាយ និងដោះស្រាយបញ្ហាកំពុងកើតឡើងក្នុងសង្គម អាចក្លាយជាគំរូល្អសម្រាប់ក្មេងជំនាន់ក្រោយ និងសាកសមមានតំណែងជាស្ត្រីតំណាងឱ្យស្ថាប័នមួយ ក្រុមហ៊ុនមួយ ខេត្តឬក្រុងមួយ ប្រទេសមួយ ឬក៏រយៈកាលមួយ»។
គួរបញ្ជាក់ផងដែរថា តារាសម្ដែង និងពិធីការិនីស្រីស្អាត វណ្ណៈ បូរមី គឺជាតារាស្រីដ៏មានសម្រស់លេចធ្លោម្នាក់ ក្នុងចំណោមតារាស្រីខ្មែរជាច្រើនទៀត ប៉ុន្ដែគេមិនសូវឃើញនាងទទួលការងារច្រើន ឬថតច្រើនឲ្យផលិតកម្មផ្សេងៗក្នុងពេលដំណាលគ្នានោះទេ។ ការមិនសូវលេចមុខច្រើននៅក្នុងខ្សែភាពយន្តនោះ គឺដោយសារតារារូបនេះ ជាប់រវល់នូវការសិក្សា និងមុខរបររកស៊ីផ្ទាល់ខ្លួន ខណៈពេលនាងក៏មិនទទួលថតរឿង២ក្នុងពេលតែមួយផងដែរ។
ទោះបីជាយ៉ាងណា នៅពេលដែលលេចវត្ដមានតារាស្រីរូបនេះនៅលើខ្សែភាពយន្ដម្ដងៗ គឺតែងតែទទួលបានការស្រឡាញ់ពេញចិត្ដលើការសម្ដែងរបស់កញ្ញាជាខ្លាំង៕
ចែករំលែកព័តមាននេះ