អបអរសាទរ…! នៅទីបំផុត តារាសម្តែងនាង ចន សុទីម៉ា បានគ្រងមកុដកញ្ញាឯកចក្រវាទ្ប កម្ពុជា (Miss Universe Cambodia 2023) ហើយ បន្ទាប់ពីនាងឆ្លងកាត់ការប្រកួតសម្រស់នានាជាបន្តបន្ទាប់ ប៉ុន្តែមិនធ្លាប់គ្រងមកុដលំដាប់កំពូលដូចជាពេលនេះឡើយ
រាជធានីភ្នំពេញ ៖ អបអរសាទរ…! នៅទីបំផុត តារាសម្តែងនាង ចន សុទីម៉ា បានគ្រងមកុដកញ្ញាឯកចក្រវាទ្ប កម្ពុជា (Miss Universe Cambodia 2023) ហើយ បន្ទាប់ពីនាងឆ្លងកាត់ការប្រកួតសម្រស់នានាជាបន្តបន្ទាប់ ប៉ុន្តែមិនធ្លាប់គ្រងមកុដលំដាប់កំពូលដូចជាពេលនេះឡើយ។
ស្រីស្អាត ចន សុទីម៉ា គឺជាបេក្ខនារីតំណាងឲ្យខេត្តកំពង់ចាម ត្រូវបានគណៈកម្មការសម្រេចឲ្យគ្រងមកុដកញ្ញាឯកចក្រវាទ្បកម្ពុជា ក្នុងកម្មវិធីប្រកួតវគ្គផ្តាច់ព្រ័ត្រដែលធ្វើឡើងកាលពីរាត្រីថ្ងៃទី៧ ខែកញ្ញា ឆ្នាំ២០២៣ បន្ទាប់ពីនាងធ្វើការប្រកួតប្រជែងជាមួយបេក្ខនារីជាច្រើនរូប នៅក្នុងវគ្គបន្តបន្ទាប់ប្រកបដោយភាពស្វាហាប់ និងពោរពេញទៅដោយសមត្ថភាព។
ស្រីស្អាត ចន សុទីម៉ា បានក្លាយជាទីចាប់អារម្មណ៍យ៉ាងខ្លាំងពីសំណាក់ទស្សនិកជន ហើយបណ្ដាអ្នកគាំទ្រជាច្រើនក៏បានបង្ហាញគោលបំណងចង់ឲ្យនាងគ្រងមកុដនៃកម្មវិធី Miss Universe Cambodia 2023 នេះផងដែរ។
យ៉ាងណាម៉ិញ មហាជន ជាពិសេសបណ្តាអ្នកគាំទ្ររូបនាងជាច្រើនបានសម្តែងការអបអរសាទរយ៉ាងខ្លាំង ក្នុងពេលដែលឃើញស្រីស្អាត ចន សុទីម៉ា អាចគ្រងមកុដ Miss Universe Cambodia 2023 តាមបំណង ហើយអាចក្លាយជាបវរកញ្ញាតំណាងកម្ពុជា ទៅចូលរួមប្រកួតប្រជែងនៅលើឆាកអន្តរជានាពេលខាងមុខនេះ។
ជាការកត់សម្គាល់ បច្ចុប្បន្ន កញ្ញា ចន សុទីម៉ា ទើបតែមានវ័យប្រមាណជាង២០ឆ្នាំប៉ុណ្ណោះ និងមានកម្ពស់ ១,៧៨ ម៉ែត្រ ហើយក៏ជាអតីតជ័យលាភីរងទី២ (2nd Runner Up) នៃកម្មវិធី «Miss Universe Cambodia 2019» ហើយក៏ជាជ័យលាភីរងទី៤ (4th Runner Up)នៃកម្មវិធីអន្តរជាតិ «Miss Tourism International 2019» ដែលធ្វើនៅឯប្រទេសម៉ាឡេស៊ី ។
មិនត្រឹមតែប៉ុណ្ណោះ កញ្ញាក៏ជាជ័យលាភីកញ្ញាឯកប្រចាំឆ្នាំ២០១៩ និងឆ្នាំ២០២០ «Miss Dreaming Girl of the year 2019-2020» ហើយក៏ធ្លាប់ជាកញ្ញាឯករងទី២ (2nd Runner Up) នៃកម្មវិធី «Miss Grand Cambodia 2017» ផងដែរ ។
នៅក្នុងវិស័យនៃការប្រកួតបវរកញ្ញា អាចនិយាយបានថា កញ្ញា ចន សុទីម៉ា គឺជាបេក្ខនារីម្នាក់ដែលក្លាហាន និងតស៊ូ ដោយបានចាប់ផ្តើមចូលរួមប្រកួតបវរកញ្ញាតាំងពីឆ្នាំ២០១៧ ថ្វីត្បិតតែមិនទទួលបាន Winner ក៏ពិតមែន ប៉ុន្ដែស្រីស្អាត សុទីម៉ា មិនដែលទទួលបានលទ្ធផលអន់នោះទេ គឺតែងតែបានលំដាប់រងទាំងក្នុងស្រុក និងក្រៅប្រទេស៕
ចែករំលែកព័តមាននេះ