ភ្នំពេញ៖ អតីត​រដ្ឋមន្ត្រី​​ក្រសួង​​ព័ត៌មាន លោក ខៀវ កាញារីទ្ធ ដែល​សព្វថ្ងៃ ជាអ្នកតំណាងរាស្ត្រ​ នៅថ្ងៃទី៧ ខែកញ្ញា ឆ្នាំ២០២៣ នេះ បាន Share តាមហ្វេសប៊ុកផ្លូវការរបស់លោក នូវ Status របស់ Heng Det ដែលបានសរសេរបង្ហោះថា «កសិករយំមិនចេញ! ថ្ងៃនេះ ( ថ្ងៃទី៦ ខែកញ្ញា ឆ្នាំ២០២៣ ) ស្រូវចុះនៅត្រឹម ១លាន ១០ម៉ឺន ( រៀល ) ក្នុង ១តោន។ អត់មានមន្ត្រីណា ចុះជួបកសិករទេ។ មូលហេតុថោក គឺទិញផ្តាច់មុខ​»។​

នៅពេល Share នូវ Status ដូច្នេះ លោកតំណាងរាស្ត្រ ខៀវ កាញារីទ្ធ ដែលជាអតីតអ្នកកាសែត និងបាន​កាន់ការ​ជាអ្នក​រាជការ តាំងពីបែករបបខ្មែរក្រហម ដោយបាន​កាន់តំណែង​ធ្វើជារដ្ឋមន្ត្រី​ក្រសួងព័ត៌មាន ២០ឆ្នាំផង​ បានចោទជាសំណួរយ៉ាងខ្លី​ថា «តើជាការពិតដែរ ឬទេ?»។

តបនឹងចម្ងល់របស់លោកតំណាងរាស្ត្រ ខៀវ កាញារីទ្ធ ខាងលើនេះ ផេកហ្វេសប៊ុកផ្លូវការរបស់​ក្រសួងកសិកម្ម រុក្ខាប្រមាញ់ និងនេសាទ បានចូលមកឆ្លើយ Comment ថា «ថ្លៃស្រូវស្រង៉ែស្រាល​ក្នុងថ្លៃធម្មតាប៉ុន្មាន? នៅឆ្នាំមុនៗ ស្រូវស្រង៉ែ មិនបាន ១០០០រៀល ក្នុង​មួយគីឡូក្រាម មានន័យថា មួយតោន មិនដល់​ ១លានរៀលផងទេ​! ឆ្នាំនេះ ស្រូវ​បានថ្លៃឡើងខ្ពស់ តែក៏ត្រូវចុះមកវិញពេល ដែលប្រទេសគេដល់​ពេលប្រមូលផល​ដែរ​។ យ៉ាងណាក្តី ថ្ងៃនេះ នៅតែខ្ពស់ជាង​ទីផ្សារធម្មតា​រាល់ឆ្នាំ​»។

បន្ថែមលើនេះ ក្រសួងកសិកម្ម រុក្ខាប្រមាញ់ និងនេសាទ ក៏បានឆ្លើយតប​នឹង​អ្នកចូល Comment ឈ្មោះ «ពិសេស គុយ» នៅក្នុង Status របស់​លោកតំណាងរាស្ត្រ ខៀវ កាញារីទ្ធ បន្តថា « ទីផ្សារ​ក៏មាន ថ្លៃក៏មានដែរ​។ ១លាន ១០ម៉ឺនរៀល ក្នុងមួយតោននេះ ជាថ្លៃខ្ពស់ជាងធម្មតាទៅ​ហើយ» លោកដឹងថា ស្រូវសើមពូជនេះ ថ្លៃប៉ុន្មានទេ ក្នុងពេលធម្មតា? សូមស្វែងយល់​សិនទៅ»។

អស់ពីតម្លៃស្រូវ ក៏មានអ្នកលេងហ្វេសប៊ុកម្នាក់ទៀត ឈ្មោះ «ផាន សុគន្ធារ៉ា» បានចូល Comment តបទៅក្រសួងកសិកម្ម រុក្ខាប្រមាញ់ និងនេសាទ ថា «ជីក៏ថ្លៃ»។

ប៉ុន្តែ​​​​ក្រសួង​​​​កសិកម្ម រុក្ខា​ប្រមាញ់​ និង​​​នេ​សាទ បាន​ឆ្លើយ​តប​ទៅ ​Comment របស់ «ផាន សុគន្ធារ៉ា» ថា «ខ្ញុំមើល Profile លោកហើយ លោកមិនមែនជាអ្នកកសិកម្មទេ។ លោកមិនបានដឹងថ្លៃជីចុះ​ប៉ុណ្ណាផង តាំងពីចប់ Covid មក»។

បន្ថែមលើនេះ លោក ឡឹក សុធារ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក៏បានចូលឆ្លើយតប​នឹង Comment របស់ «ផាន សុគន្ធារ៉ា» ថា «ជីធូរថ្លៃជាង ឆ្នាំ២០២២»។​

ចំណែក​ Yean BunThoeurn ក៏បានឆ្លើយទៅកាន់ផេកហ្វេសប៊ុករបស់​ក្រសួងកសិកម្ម រុក្ខាប្រមាញ់ និងនេសាទ ថា «មុននេះបន្តិច ខ្ញុំបានជួបផ្ទាល់ជាមួយកសិករជិត ១០គ្រួសារ ដែលរស់នៅក្នុង​ឃុំសំរោងយា ស្រុកពួក ខេត្តសៀមរាប ពួកគាត់បាននិយាយដូចៗគ្នាថា តម្លៃស្រូវបានធ្លាក់ចុះពី ១៣៥០៛/kg មកនៅត្រឹម ១១០០៛/kg ក្នុងរយៈពេលត្រឹមតែ ២សប្ដាហ៍ប៉ុណ្ណោះ»។

អ្នកលេងហ្វេសប៊ុក ក៏បានចូលទៅ Comment នៅលើហ្វេសប៊ុករបស់​លោកតំណាងរាស្ត្រ ខៀវ កាញារីទ្ធ បន្ថែមថា «ហេតុអ្វី ស្រូវចុះថោក ហើយបែរជាអង្ករឡើងថ្លៃ ? អង្ករផ្កាខ្ញី ស្រូវចាស់ ធ្លាប់ទិញ 3400 ៛/kg ឥឡូវឡើង 4000 ៛/kg»។

អ្នកខ្លះទៀត លើកឡើងថា «អង្ករផ្កាខ្ញី ខ្ញុំទិញលក់រាល់ថ្ងៃ 28000៛ (10kg) ឥឡូវ 32000៛ (10kg)»។

មិនទាន់មានការឆ្លើយតបបែបណា ពីក្រសួងកសិកម្ម រុក្ខាប្រមាញ់ និងនេសាទ ចំពោះការលើក​ឡើងថា «ស្រូវចុះថោក តែអង្ករឡើងថ្លៃ» នៅឡើយទេ​។

ប៉ុន្តែ​ក្រសួងកសិកម្ម រុក្ខាប្រមាញ់ និងនេសាទ ក៏បានចូល Comment ដោយបង្ហាញនូវតារាង​ក្រាហ្វិក ប្រៀបធៀបតម្លៃស្រូវ ឆ្នាំ២០២៣ និងឆ្នាំ២០២២។ មិនថា ស្រូវសែនក្រអូប ស្រូវអ៊ីអ៊ែរ ឬក៏ស្រូវ OM 5451 ទេ គឺនៅឆ្នាំ២០២៣ នេះ ចាប់តាំងពីខែមករា រហូតដល់ខែកញ្ញា ឆ្នាំ២០២៣ នេះ សុទ្ធតែថ្លៃជាងឆ្នាំ២០២២ ទាំងអស់​។​  

ចំណែក​លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បាន​លើក​ឡើងតាមហ្វេសប៊ុកផ្លូវការរបស់ខ្លួនថា «មិនទាន់មានសញ្ញាណាមួយ ត្រូវព្រួយបារម្ភពី​ថ្លៃស្រូវនៅលើទៅផ្សារនោះទេ។ ទោះបីជាប៉ុន្មានថ្ងៃនេះ ថ្លៃស្រូវ បានថយចុះមកបន្តិចពី​ថ្លៃខ្ពស់បំផុត កាលពីសប្តាហ៍មុន។ តួលេខនេះ នៅល្អច្រើន បើធៀបទៅនឹងឆ្នាំមុន ដែលបាន​ថ្លៃត្រឹមតែ ៨០០-៩០០រៀល ក្នុងមួយគីឡូក្រាម តែប៉ុណ្ណោះ»។

លោក ឃឹម ហ្វីណង់ ដែលជាអតីតអភិបាលស្រុងបន្ទាយស្រី និងជាអតីតអភិបាលរងខេត្ត​សៀមរាប បានបន្ថែមថា «ដរាបណា ថ្លៃស្រូវនៅតែស្ថិតនៅលើបន្ទាត់ ១០០០រៀល/គីឡូក្រាម កសិករ នៅតែទទួលបានប្រាក់ចំណេញ គ្រាន់តែតិច ឬច្រើនតែប៉ុណ្ណោះ ហើយទីផ្សារនៅតែមាន​សម្រាប់កសិកម្មកម្ពុជាដដែល។ រាជរដ្ឋាភិបាល អាណត្តិទី៧ ក៏បានត្រៀមកញ្ចប់ថវិកា ដើម្បីអន្តរាគមន៍ ក្នុងករណីដែលមានការធ្លាក់ចុះថ្លៃកសិផលជាគំហុកណាមួយ ដើម្បីធានា​ស្ថេរភាព​ថ្លៃផងដែរ។ សង្ឃឹមថា សាធារណៈជន ដែលមិនស្ថិតនៅក្នុងវិស័យកសិកម្ម អាចស្វែងយល់បានពីស្ថានភាពពិតប្រាកដនេះ ជៀសវាងការផ្អើលនិយាយតៗគ្នា ដោយគ្មាន​មូលដ្ឋានច្បាស់លាស់»៕