ទើបតែវិវឌ្ឍន៍ខ្លួនមកអាជីពសម្តែង តារាចម្រៀងនាង ចាន់ ឡៃវលក្ខណ៍ បានសម្តែងក្តីរំពឹងថា ស្នាដៃសម្តែងភាពយន្តលើកដំបូងរបស់នាង ក្នុងរឿងភាគទូរទស្សន៍ នឹងទទួលបានការគាទ្រពីសំណាក់ទស្សនិកជន ខណៈពេល
រាជធានីភ្នំពេញ ៖ ទើបតែវិវឌ្ឍន៍ខ្លួនមកអាជីពសម្តែង តារាចម្រៀងនាង ចាន់ ឡៃវលក្ខណ៍ បានសម្តែងក្តីរំពឹងថា ស្នាដៃសម្តែងភាពយន្តលើកដំបូងរបស់នាង ក្នុងរឿងភាគទូរទស្សន៍ នឹងទទួលបានការគាទ្រពីសំណាក់ទស្សនិកជន ខណៈពេលដែលនាងបានខិតខំប្រឹងប្រែងអស់ពីសមត្ថភាពនៅក្នុងការសម្តែងរឿងមួយនេះ។
ស្រីស្អាត ចាន់ ឡៃវលក្ខណ៍ បានបង្ហាញវត្តមានជាតួឯកស្រីម្នាក់ជាលើកដំបូងនៅក្នុងរឿង «ស្នេហា Cover» ដែលដឹកនាំសម្តែងដោយអ្នកស្រី ពាន់ ភួងបុប្ផា និងចាក់បញ្ចាំងនៅស្ថានីយទូរទស្សន៍ PNN។ ក្នុងពេលមានឱកាសបានសម្តែងជាលើកដំបូងនាពេលនេះ ស្រីស្អាត ចាន់ ឡៃវលក្ខណ៍ មានអារម្មណ៍រីករាយ បើទោះបីជាការសម្តែងភាពយន្តហាក់ជួបការលំបាកច្រើនជាងការងារច្រៀងក៏ដោយ។
តារាចម្រៀងរូបនេះ បានលើកឡើងថា «ការសម្តែងរឿងនេះ មានផលលំបាកច្រើន ព្រោះនេះជាលើកទី១ ដែលនាងដាក់ចិត្តទទួលយកការថតភាពយន្ត»។ នាងបញ្ជាក់ថា «ការសម្តែង និងការច្រៀង មិនសូវខុសគ្នាប៉ុន្មានឡើយ ដោយយើងត្រូវដាក់អារម្មណ៍ និងមនោសញ្ចេតនាចូលទៅតាមតួអង្គ តែសម្រាប់នាង គឺនាងបានព្យាយាមខ្លាំងមែនទែន អស់ពីកម្លាំងកាយចិត្តតែម្តង ដើម្បីសម្តែងនេះ។ យ៉ាងណាម៉ិញ នាងសង្ឃឹមថា បងប្អូនទស្សនិកជននឹងពេញចិត្ត ហើយគាំទ្រការសម្តែងរបស់នាងលើកដំបូងក្នុងរឿង «ស្នេហា Cover»។
យ៉ាងណា ស្រីស្អាត ចាន់ ឡៃវលក្ខណ៍ រំពឹងថា «រឿងនេះ នឹងល្អប្រសើរនៅពេលចាក់បញ្ចាំង ព្រោះសាច់រឿងដ៏ស៊ីជម្រៅរបស់ផលិតករជើងចាស់ អ្នកស្រី ពាន់ ភួងបុប្ផា»។ នាងបញ្ជាក់ថា «តួអង្គសម្តែងគ្រប់រូប រួមទាំងនាងផងដែរ បានខិតខំប្រឹងប្រែងសម្តែងអស់ពីកម្លាំងចិត្ត ដើម្បីឱ្យរឿងល្អ និងត្រូវចិត្តសម្រាប់ទស្សនិកជន»។ នាងថា «រឿងភាគថ្មីនេះ ព្រោះវាមិនត្រឹមតែផ្តល់ការកម្សាន្តប៉ុណ្ណោះទេ តែមានរឿងរ៉ាវជាច្រើនលាក់បង្កប់ក្នុងសាច់រឿងនេះ ហើយឆ្លុះបញ្ចាំងចេញពីថតភាពពិតក្នុងសង្គមនាពេលបច្ចុប្បន្ន»។
ជាការកត់សម្គាល់ ស្រីស្អាត ចាន់ ឡៃវលក្ខណ៍ គឺជាតារាមួយរូប ដែលមានការពុះពារ និងឆ្លងកាត់នូវរឿងលំបាក ឈឺចាប់ជាច្រើន នៅមុនពេលដែលនាងអាចឈរជើងយ៉ាងល្អនៅក្នុងអាជីពសិល្បៈ។
កន្លងមក តារាស្រីរូបនេះ ធ្លាប់បានលើកឡើងនូវរឿងរ៉ាវជីវិតអតីតកាលដែលនាងធ្លាប់ជួបប្រទះតាមរយៈសំណេរបង្ហោះតាមបណ្តាញសង្គមថា «មិនថាឡើយអ្នកដទៃ សូម្បីបងប្អូន មិត្ដសិល្បៈរួមជំនាន់ ក៏មើលងា.យនាងដែរ ដោយអ្នកខ្លះដៀ.លនាងថា «មីកូនអនាថា អត់ម៉ែ អត់ឪ… មីខ្មៅ និងមីភ្នែកម្នាស់ជាដើម» ។
នាងបន្តថា «ការដៀ.លត្មះដល់គ្រួសារ មានមិត្ដខ្លះចំអកថា ទោះបីស្លា.ប់ក៏មិនយកនាងដែរ ហើយអ្នកខ្លះទៀតបានយកខ្សែទាក់.ក ហើយយកកាតាបរបស់នាងទៅបោះចោលក្នុងធុងសំរា.មទៀត ៖ «ទង្វើ និងការនិយាយបែបឡកឡឺយខ្ញុំទាំងអស់រយៈពេល៥ឆ្នាំហើយ»។
នាងបញ្ជាក់បន្ថែមថា «ចំពោះមិត្ដសិល្បៈរួមជំនាន់វិញ រៀមច្បងសិល្បៈបានធ្វើឲ្យនាងខ្លាចឡើងបាក់។ ក្មេងទើបប្រឡូកសិល្បៈដំបូង អត់បានទទួលការបង្ហាត់បង្រៀនបន្ថែមពីសិល្បកររៀមច្បងទេ។ ផ្ទុយទៅវិញ បែរជាផ្ដល់មេរៀនយ៉ាងចាស់ដៃអោយខ្ញុំចងចាំអស់មួយជីវិត ៖ «ខ្ញុំឈរច្រៀងទាំងញ័រជើង ហើយស្រក់ទឹកភ្នែក… ចាំបានកាលហ្នឹង ច្រៀងបទឆាឆាទេ តែហូរទឹកភ្នែក»។
ស្រីស្អាត ចាន់ ឡៃវលក្ខណ៍ អះអាងបន្ថែមថា «កូនស្រីម្នាក់ ដែលកើតក្នុងត្រកូលអ្នកក្រ គ្រាន់តែលឺ ក៏គេមិនរាប់មុខផង គ្រួសារនាងធ្លាប់អត់ដល់ថ្នាក់រកអង្ករច្រកឆ្នាំងគ្មាន ទើបនាងសម្រេចចិត្តចេញធ្វើការតាំងពីអាយុ១៦ឆ្នាំ ហើយបានជួបរឿងដូចដែលបានរៀបរាប់ខាងលើ។ បច្ចុប្បន្ន នាងបានប្រសើរច្រើនហើយ ដោយសារតែការប្រឹងប្រែង និងជម្នះគ្រប់ឧបសគ្គ»។ នាងថា «កើតមកក្រ មិនមែនជាកំហុស តែបើស្លា.ប់ទៅវិញនៅតែក្រនោះ ទើបជាកំហុស»៕
ចែករំលែកព័តមាននេះ