រាជធានីភ្នំពេញ ៖ អ្នករៀបចំការប្រកួតប្រចាំសង្វៀនបាយ័នបានផ្គូផ្គងរវាងវ៉ែន សុវណ្ណ មកពីក្លឹបកងកេងខេត្តបាត់ដំបង និងចាន់ រតនាមកពីក្លឹបខេមរៈខ្លាហោះឱ្យជួបប្រកួតគ្នានៅថ្ងៃទី១៤ ឧសភា ខាងមុខនេះ។ សុវណ្ណ និងរតនា មិនធ្លាប់មានប្រវត្តិជួបប្រកួតគ្នាពីមុនមកទេ។
កាលពីចុងឆ្នាំ២០១០ សុវណ្ណ និងរតនាបានចូលរួមប្រកួតក្នុងព្រឹត្តិការណ៍ដណ្តើមខ្សែក្រវាត់បាយ័ន ដោយពួកគេស្ថិតនៅក្នុងពូលផ្សេងគ្នា។ ពេលនោះចាន់ រតនា ត្រូវធ្លាក់ហាលអាវតាំងពីជុំដំបូងមកម្លេ៉ះ។ ចំណែកវ៉ែន សុវណ្ណ បានឈ្នះការប្រកួតបន្តរហូតឈានចូលដល់វគ្គផ្តាច់ព្រ័ត្រ ប៉ុន្តែគេត្រូវចាញ់ពិន្ទុអូត ភូថង មកពីក្លឹបក្រសួងការពារជាតិ។ តាំងពីពេលនោះមកវ៉ែន សុវណ្ណ ត្រូវបាត់មុខពីរេញបាយ័នរហូត។ រីឯចាន់ រតនា វិញទោះបីក្នុងព្រឹត្តិការណ៍ប្រកួតពេលនេះគេមិនសូវមានសំណាងក្តី ប៉ុន្តែក្រោយមកចាន់ រតនា បង្កើនភាពល្បីល្បាញខ្លាំងណាស់ពិសេសគឺក្រោយពេលដែលគេត្រឡប់មកពីប្រកួតជាលក្ខណៈអន្តរជាតិនៅប្រទេសបារាំងកាលពីចុងខែមេសាកន្លងមកនេះ គឺបាននាំមកជាមួយនូវខ្សែក្រវាត់គួរជាទីមោទនៈក្រៃលែង។ ចាន់ រតនា គឺជាអ្នកប្រដាល់ដែលចូលចិត្តប្រើស្នៀតពិសេសៗ ហើយតាមរយៈស្នៀតនេះបានផ្តួលដៃគូជាច្រើននាក់មកហើយ។ ពេលនេះវ៉ែន សុវណ្ណ ចង់ដឹងស្នៀតរបស់រតនា តើខ្លាំងប៉ុនណា។ សុវណ្ណជាអ្នកប្រដាល់ជើងចាស់មួយរូប ដែលមានបទពិសោធន៍ខ្ពស់លើសង្វៀន ប៉ុន្តែអ្នកប្រដាល់រូបនេះយឺតបន្តិច។
ឯម ចាន់រស្មី មកពីក្លឹបគ្រុឌមានជ័យត្រូវប្រកួតជាមួយអាំង សំអាត មកពីក្លឹបតាព្រហ្មមានជ័យ។ ទាំងរស្មី ទាំងសំអាត ទោះបីពួកគេស្ថិតក្នុងទម្ងន់ស្រាល៥៤គីឡូក្រាម ប៉ុន្តែមិនមែនជាអ្នកប្រដាល់ថ្មីនោះទេ ពួកគេមានបទពិសោធន៍ក្នុងវិស័យប្រដាល់នេះយូរឆ្នាំមកហើយ។
កន ចន្ថា មកពីក្លឹបក្រសួងការពារជាតិត្រូវប្រកួតជាមួយ ស្វាយ រិទ្ធី មកពីក្លឹបកងទ័ពជើងគោក។ កន ចន្ថា ជាសិស្សប្អូន ប៉ុន្តែមួយរយៈចុងក្រោយនេះគេមានសំណាងច្រើនដោយមិនសូវស្គាល់ចាញ់ទេ។ កាលពី២សប្តាហ៍មុន កន ចន្ថា បានបំបាក់ហុន គិរី មកពីក្លឹបតាព្រហ្មមានជ័យឱ្យសន្លប់ក្នុងទឹកទី៤។ រីឯស្វាយ រិទ្ធី គេក៏ជាជើងខ្លាំងដែរ តែបាត់មុខយូរហើយទើបតែបង្ហាញមុខជាថ្មីម្តងទៀត។
នៅមានអ្នកប្រដាល់ស្រករក្រោយច្រើនគូទៀតដូចជារ៉ុង សុខចាន់ មកពីក្លឹបរ៉ាហាប់ស្វាយប៉ាកប្រកួតជាមួយ ពៅ សារ៉ាក់ មកពីក្លឹបវីអាយភីចំការមន។ ពុទ្ធ សុផាត មកពីក្លឹបពុទ្ធសេរីវង្សព្រែកតាទែនប្រកួតជាមួយសុខ វាសនា មកពីក្លឹបឃ្លាំងមឿងកីឡា ៕
ចែករំលែកព័តមាននេះ