ADផ្ទាំងផ្សព្វផ្សាយពាណិជ្ជកម្ម

វៀតណាមប្រ.ហា.រជី.វិ.តបុរ.សម្នាក់ដែលយកដែ.កគោ.ល៩ដើមដំទ.ម្លុះខួ.រក្បា.លកុ.មា.រីអាយុ៣ឆ្នាំ

11 ខែ មុន

២២ ខែ សីហា ឆ្នាំ ២០២៣ ម៉ោង ០៣:៤៣

តុលាការវៀតណាមសម្រេចផ្ដន្ទាទោសប្រហារជីវិតបុរសវ័យ៣០ឆ្នាំ ពីបទប្រព្រឹត្តអំពើឧក្រិដ្ឋកម្មធ្ងន់ធ្ងរទៅលើកុមារីម្នាក់អាយុ៣ឆ្នាំដែលត្រូវជាកូនស្រីរបស់សង្សាររបស់គាត់។ មានន័យថាសង្សាររបស់គាត់មានកូនជាមួយប្ដីមុន។ តុលាការរកឃើញថាបុរសនេះបានយកដែកគោលជាច្រើនដើមដំពីលើលលាដ៍ក្បាលកុមារីរូបនោះ ជាលក្ខណៈដំទម្លុះខួរក្បាលតែម្ដង។

បុរសឈ្មោះង្វៀនជុងយៀន (Nguyễn Trung Huyện) ក្រៅពីត្រូវតុលាការផ្ដន្ទាទោសប្រហារជីវិតហើយ គាត់ក៏ត្រូវកាត់ទោសឱ្យជាប់ពន្ធនាគារ៤ឆ្នាំបន្ថែមទៀតពីបទបង្ករបួសស្នាមធ្ងន់ធ្ងរដោយចេតនាទៅលើរាងកាយអ្នកដទៃ។ ដូច្នេះ សរុបសេចក្ដីមក គាត់ត្រូវតែទទួលទោសប្រហារជីវិត។ បុរសឈ្មោះង្វៀនជុងយៀនបានប្រព្រឹត្តអំពើមនុស្សឃាតនៅអំឡុងពេលស្នាក់នៅជាមួយមិត្តស្រីរបស់គាត់ត្រកូលង្វៀនដូចគ្នា។ នាងឈ្មោះង្វៀនធិលៀន (Nguyễn Thị Luyến) អាយុ២៧ឆ្នាំ។ កូនស្រីរបស់នាងដែលរងគ្រោះនោះក៏រស់នៅជាមួយគ្នាផងដែរនៅក្នុងបន្ទប់ជួល១កន្លែងនៃសង្កាត់ថាច់ថាត (Thạch Thất) ទីក្រុងហាណូយ។

បុរសជាជនដៃដល់ប្រាប់ថានៅពេលរស់នៅជាមួយកុមារីនោះធ្វើឱ្យប៉ះពាល់ជីវិតរស់នៅរបស់គាត់។ ដូចនេះ គាត់ដុះគំនិត១ថាត្រូវតែធ្វើបាបកូនហ្នឹងឱ្យណាណីម្ដង ដើម្បីកុំឱ្យរស់នៅបានសុខ។ មួយថ្ងៃៗ គាត់ចេះតែវាយដំច្រំធាក់កុមារីម្នាក់ហ្នឹង ព្រោះគាត់ខ្ជិលចិញ្ចឹមកូនរបស់គេ។ សង្សាររបស់គាត់ នាងង្វៀនធិលៀន និងប្ដីមុនរបស់នាង មានកូនបីនាក់ជាមួយគ្នា សុទ្ធតែជាកូនស្រីទាំងអស់។ កុមារីដែលត្រូវគេដំដែកគោលពីលើក្បាលនោះជាកូនស្រីដែលក្មេងជាងគេ។ ក្រោយពេលចែកផ្លូវគ្នាកាលពីឆ្នាំ២០២១, នាងង្វៀនធិលៀនយកកូនស្រីពៅនេះទៅនៅជាមួយ។ ចំណែកប្ដីយកកូនស្រី២នាក់ទៀតទៅនៅជាមួយ។

ជនដៃដល់ធ្វើទារុណកម្មកុមារីនោះយ៉ាងតិច៤ដងចាប់តាំងពីខែកញ្ញា ឆ្នាំ២០២១។ ពេលខ្លះ គាត់ឱ្យផឹកថ្នាំសម្លាប់សត្វល្អិត ពេលខ្លះឱ្យលេបដែកគោល និងពេលខ្លះវាយបំបាក់ដៃ។ នៅដំណាក់កាលចុងក្រោយ គាត់លេងធម៌ក្ដៅតែម្ដងដោយយកដែកគោលជាច្រើនដើមដំពីលើក្បាលរបស់កុមារីនោះកាលពីថ្ងៃទី១៧ ខែមករា។ នេះបើយោងតាមលទ្ធផលស៊ើបអង្កេត។ មុនដំបូង, គាត់ទះកំផ្លៀងដោយសារកូននោះមិនព្រមឆ្លើយនឹងគាត់។ ចុងក្រោយ គាត់ក៏ដំដែកគោលទម្លុះខួរក្បាលតែម្ដង។

ក្រោយមក, ម្ដាយរបស់នាងក៏ប្រញាប់ដឹកកូនស្រីទៅមន្ទីរពេទ្យសង្កាត់ថាច់ថាត និងដឹកបន្តទៅមន្ទីរពេទ្យសាំងប៉ូល (Saint Paul)។ កុមារីនោះសន្លប់បាត់មាត់បាត់ករយៈពេល២ខែ ហើយក៏ស្លាប់បាត់ទៅ។ គ្រូពេទ្យស្កេនខួរក្បាលមើលឃើញដែកគោល៩ដើមនៅជាប់នឹងលលាដ៍ក្បាល។ ស្ត្រីដែលជាម្ចាស់បន្ទប់ជួលប្រាប់ថាបុរសជាជនដៃដល់នេះជាមនុស្សថ្លង់ស្ដាប់មិនឮទេ។ គាត់ធ្វើការជាជាងឈើ។ ស្ត្រីរូបនេះប្រាប់ថាកុមារីរងគ្រោះនោះរស់នៅទាំងអារម្មណ៍ភ័យខ្លាចបុរសនោះយ៉ាងខ្លាំង។

នៅក្នុងពេលកាត់សេចក្ដី, រដ្ឋអាជ្ញាស្នើសុំឱ្យសមត្ថកិច្ចស៊ើបអង្កេតបន្ថែមទៀតដើម្បីចង់ដឹងថាតើស្ត្រីជាម្ដាយកុមារីរងគ្រោះបានធ្វើអ្វីខ្លះមុនពេលឈានដល់ដំណាក់កាលធ្វើទារុណកម្មធ្ងន់ធ្ងររហូតដល់ស្លាប់។ ជាពិសេស រដ្ឋអាជ្ញាចង់ដឹងថាតើស្ត្រីជាម្ដាយបានដឹងរឿងនេះដែរឬទេ? បើដឹងហើយ តើបានរាយការណ៍ប្រាប់សមត្ថកិច្ចដែរឬទេ?

ក្រុមគ្រួសាររបស់កុមារីរងគ្រោះខ្សែខាងឪពុកបង្កើតរបស់នាងមិនទាន់ស្ងប់ចិត្តនៅក្នុងរឿងនេះទេ ទោះបីប្រហារជីវិតជនដៃដល់ក៏ដោយ។ ពួកគេចង់ឱ្យសមត្ថកិច្ចចាប់ខ្លួនទាំងស្ត្រីជាម្ដាយយកទៅកាត់ទោសថែមទៀត។ ម្ដាយមីងកុមារីរងគ្រោះប្រាប់ថាស្ត្រីជាម្ដាយកុមារីនោះនិយាយបកស្រាយហាក់ដូចជាមិនសមទំនង។ ឧទាហរណ៍ នៅពេលសមត្ថកិច្ចសួរនាំពីករណីដែលកុមារីរងគ្រោះលេបដែកគោល៣ដើមចូលទៅក្នុងពោះ, ស្ត្រីជាម្ដាយម្ដងនិយាយបែបនេះ ម្ដងនិយាយបែបនោះ។ ជួនកាល ស្ត្រីនេះប្រាប់ថាកូនស្រីរបស់ខ្លួនលេបដែកគោលនៅក្នុងបន្ទប់ទឹក។ ជួនកាល ប្រាប់ថាលេបដែកគោលនៅកន្លែងជាងឈើ។

យោងតាមរដ្ឋអាជ្ញា, ថ្វីដ្បិតស្ត្រីជាម្ដាយកុមារីរងគ្រោះនិយាយមិនសូវសមទំនង និងទោះបីមានចម្លើយដាក់បន្ទុករបស់សាក្សី, ប៉ុន្តែបើពិនិត្យទៅលើទិដ្ឋភាពច្បាប់ ស្ត្រីរូបនេះមិនទាន់ដល់ថ្នាក់ត្រូវចោទប្រកាន់ពីបទព្រហ្មទណ្ឌនៅឡើយទេ។ ដូច្នេះ តុលាការសម្រេចផ្ដន្ទាទោសប្រហារជីវិតបុរសជាសង្សារ និងជាជនដៃដល់។ ចំណែកស្ត្រីជាម្ដាយអាចនឹងរួចខ្លួនពីការចោទប្រកាន់៕

ប្រភព៖ Vietnam Express
https://e.vnexpress.net/news/news/hanoi-man-receives-death-for-murdering-toddler-by-hammering-nails-into-skull-4523112.html