អាជ្ញាធរក្រុងសែនមនោរម្យ ចុះពិនិត្យទីតាំងសំណង់ទំនប់ទឹកគ្មានច្បាប់មួយកន្លែងរបស់រមណីយដ្ឋានចំការកាហ្វេ ដែលកា.ប់កាយកែច្នៃអូរ និងដីចំណីអូរធម្មជាតិ ធ្វើឲ្យប៉ះពាល់ដល់ដីកម្មសិទ្ធិអ្នកដទៃ
ខេត្តមណ្ឌលគិរី ៖ អាជ្ញាធរក្រុងសែនមនោរម្យ ចុះពិនិត្យទីតាំងសំណង់ទំនប់ទឹកគ្មានច្បាប់មួយកន្លែងរបស់រមណីយដ្ឋានចំការកាហ្វេ ដែលកា.ប់កាយកែច្នៃអូរ និងដីចំណីអូរធម្មជាតិ ធ្វើឲ្យប៉ះពាល់ដល់ដីកម្មសិទ្ធិអ្នកដទៃ ស្ថិតនៅក្នុងភូមិពូលូង សង្កាត់រមនា ជាប់ព្រំប្រទល់សង្កាត់ស្ពានមានជ័យ នាព្រឹកថ្ងៃទី១៥ ខែសីហា ឆ្នាំ២០២៣។
បើតាមអ្នកភូមិពូលូង ដែលមានឈ្មោះ ទូច ហឿន បានឲ្យដឹងថា «ទំនប់ទឹកដែលគេបានសង់ ដើម្បីទប់ទឹកធ្វើទំនប់បង្ហៀរកាត់អូរធម្មជាតិកណ្តាលក្រុងនេះ បានបង្កផលប៉ះពាល់យ៉ាងខ្លាំងដល់បងប្អូនប្រជាពលរដ្ឋរស់នៅផ្នែកខាងលើអូរ។ ហើយការប៉ះពាល់ ព្រោះតែទំនប់នេះ បានសាងសង់ឡើងខ្ពស់ បណ្តាលឲ្យច្រាស់ទឹកលិចដល់ដីអ្នកដទៃនៅសងខាងអូរទៀតផង។ ដូច្នេះ លោក (ទូច ហឿន) សំណូមពរដល់ម្ចាស់សំណង់ និងអាជ្ញាធរជួយកែសម្រួលសំណង់ទំនប់ទឹកនោះ ឲ្យមានផ្លូវទឹកហូរដូចដើមវិញ ចៀសវាងប្រយោជន៍បុគ្គលបង្កការលំបាកដល់អ្នកដទៃ»។
ជាការឆ្លើយតបពាក់ព័ន្ធនឹងករណីខាងលើនេះ លោក ប៊ូ សុភាព ម្ចាស់រមណីយដ្ឋានចំការកាហ្វេ បានរក្សាជំហរមិនរុះរើ ឬកែសម្រួលទំនប់ទឹកនោះទេ ដ្បិតគាត់សាងសង់សំណង់ទំនប់បង្ហៀរទឹកនេះ អស់លុយច្រើនណាស់។ ហើយការសំណូមពររបស់អ្នកភូមិ ដែលតម្រូវចង់ឲ្យគាត់កែ ឬកាយទំនប់ចេញ ឬក៏ឲ្យគាត់ចាក់ដីសងកន្លែងដែលលិចទឹកវិញ ក៏ត្រូវបានលោក ប៊ូ សុភាព លើកឡើងថា «មកពីពួកគាត់ចង់បានល្អស្អាតស្រាប់ៗពេក មិនចង់ចំណាយលុយខ្លួនឯង។ ដូច្នេះគាត់មិនអាចចេញលុយទៅជំនួសឡើយ»។
ចំណែកអាជ្ញាធរក្រុងសែនមនោរម្យ និងមន្ត្រីជំនាញដែនដី ក៏បានឲ្យដឹងដែរថា «ករណីសង់សំណង់ទំនប់ទឹកនេះ ម្ចាស់ទីតាំងមិនបានស្នើសុំ ឬមានការអនុញ្ញាតអាជ្ញាធរ និងមន្ទីរជំនាញទេ គាត់បានសាងសង់ដោយចិត្តឯង»។
បើតាមអាជ្ញាធរ ដែលចុះទៅពិនិត្យនៅទីតាំងជាក់ស្តែង កាលពីព្រឹកថ្ងៃទី១៥ ខែសីហា បានឲ្យដឹងដែរថា «ករណីខាងលើនេះ ជំនាញបានធ្វើការវាស់វែង ដើម្បីរៀបចំឯកសារដាក់ជូនថ្នាក់ខេត្ត ប្រជុំវិនិច្ឆ័យនៅពេលក្រោយ៕
ចែករំលែកព័តមាននេះ