រាជធានីភ្នំពេញ ៖ លោករាជ សម្បត្តិ ប្រធានផ្នែកកិច្ចការសាធារណៈនៃសាលាក្តីខ្មែរក្រហម បានទទួលមរណភាពគួរឱ្យសោកស្តាយក្នុងវ័យ៤៧ឆ្នាំ កាលពីវេលាម៉ោង៩យប់ថ្ងៃទី១១ ឧសភា ២០១១ នៅលើគ្រែពេទ្យនៃមន្ទីរពេទ្យកាល់ម៉ែត ដោយសារជំងឺលើសឈាមធ្ងន់ធ្ងរគឺដាច់សរសៃឈាមក្នុងខួរក្បាល ខណៈដែលក្រុមគ្រួសារហៀបនឹងបញ្ជូនទៅកាន់មន្ទីរពេទ្យទំនើបមួយនៅក្រុងបាងកក ប្រទេសថៃ
រាជធានីភ្នំពេញ ៖ លោករាជ សម្បត្តិ ប្រធានផ្នែកកិច្ចការសាធារណៈនៃសាលាក្តីខ្មែរក្រហម បានទទួលមរណភាពគួរឱ្យសោកស្តាយក្នុងវ័យ៤៧ឆ្នាំ កាលពីវេលាម៉ោង៩យប់ថ្ងៃទី១១ ឧសភា ២០១១ នៅលើគ្រែពេទ្យនៃមន្ទីរពេទ្យកាល់ម៉ែត ដោយសារជំងឺលើសឈាមធ្ងន់ធ្ងរគឺដាច់សរសៃឈាមក្នុងខួរក្បាល ខណៈដែលក្រុមគ្រួសារហៀបនឹងបញ្ជូនទៅកាន់មន្ទីរពេទ្យទំនើបមួយនៅក្រុងបាងកក ប្រទេសថៃ ។
តាមព័ត៌មានពីបុគ្គលិកនៃសាលាក្តីខ្មែរក្រហមបានឱ្យដឹងថា ដំបូងឡើយលោករាជ សម្បត្តិ កើតអាការវិលមុខ ងងឹតមុខ បន្ទាប់មកទ្រោបខ្លួននៅលើតុនៃការិយាល័យរបស់គាត់ក្នុងសាលាក្តីខ្មែរក្រហម រួចហើយស្រែកហៅគេឱ្យជួយ។ ភ្លាមនោះមន្ត្រីជាច្រើននាក់នៃសាលាក្តីខ្មែរក្រហមបានផ្តល់ដំណឹងដល់គ្រួសារ និងត្រូវចាត់បញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត កាលពីវេលាល្ងាចថ្ងៃទី១០ ឧសភា ២០១១ ។ អាការបែបនេះរបស់លោករាជ សម្បត្តិ បានយាយីរូបលោកជាច្រើនខែមកហើយ។ ប្រភពពីក្រុមមន្ត្រីសាលាក្តីខ្មែរក្រហមបានឱ្យដឹងទៀតថា ជំងឺលើសឈាមធ្ងន់ធ្ងររបស់លោករាជ សម្បត្តិ អាចបណ្តាលឱ្យដាច់សរសៃឈាមក្នុងខួរក្បាល ទើបធ្វើឱ្យលោកសន្លប់បាត់ស្មារតី ហើយត្រូវសម្រាកលើគ្រែពេទ្យ ដោយព្យួរសេរ៉ូមជាប់ជាប្រចាំ។
មកដល់វេលាម៉ោង៧យប់ថ្ងៃទី១១ ឧសភា ក្រុមគ្រួសាររបស់លោកត្រៀមបញ្ជូនទៅកាន់មន្ទីរពេទ្យបំរ៉ុងរ៉ាដ្ឋ នៅក្រុងបាងកក ប្រទេសថៃ ប៉ុន្តែ ត្រូវលុបចោលវិញ ដោយសារអាការលោករាជ សម្បត្តិ ធ្ងន់ធ្ងរដល់ទីបំផុត និងមិនមានជំនឿថា អាចសង្គ្រោះបាននោះទេ ហើយបន្ទាប់មកក៏ផុតជីវិតតែម្តងនៅវេលាម៉ោង៩យប់ថ្ងៃទី១១ ឧសភា គួរឱ្យសោកស្តាយ។ លោករាជ សម្បត្តិ គឺជាសាស្ត្រាចារ្យសារព័ត៌មាន និងជាអ្នកសារព័ត៌មានកម្ពុជាដ៏មានស្នាដៃមួយរូប ហើយបានចូលរួមចំណែកយ៉ាងសំខាន់នៅក្នុងការលើកកម្ពស់សេរីភាពសារព័ត៌មាន និងលទ្ធិប្រជាធិបតេយ្យនៅកម្ពុជា។ កោះសន្តិភាពចាត់ទុកថា មរណភាពរបស់លោករាជ សម្បត្តិ គឺជាការបាត់បង់ធនធានមនុស្សដ៏សំខាន់មួយសម្រាប់វិស័យសារព័ត៌មានកម្ពុជា និងសូមសម្តែងនូវការសោកស្តាយ និងចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារនៃសពលោករាជ សម្បត្តិ និងសូមឱ្យវិញ្ញាណក្ខន្ធលោកទៅកាន់សុគតិភព ។ សពលោករាជ សម្បត្តិ ត្រូវបានតម្កល់ទុកធ្វើបុណ្យតាមប្រពៃណី នៅគេហដ្ឋានសពផ្ទះលេខ៤៨៧ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ៕
ចែករំលែកព័តមាននេះ