ខេត្តកំពង់ចាម ៖ ស្ត្រីចំណាស់ឈ្មោះជួប ហ៊ុច អាយុ៥៦ឆ្នាំ រស់នៅភូមិខ្ញូងលើ ឃុំមហាខ្ញូង ស្រុកកោះសូទិន ត្រូវបានពស់ថ្នាំងប្ញស្សីខាំត្រូវម្រាមជើង និងប្រអប់ដៃខាងស្តាំពេលទៅបត់ជើងនៅខាងក្រោយផ្ទះចម្ងាយ៥០ម៉ែត្រ វេលាម៉ោង៧និង៣០នាទីយប់ ថ្ងៃទី៥ ឧសភា ធ្វើឱ្យពិសជ្រាបចូលក្នុងខ្លួនប្រាណបណ្តាលឱ្យចុកចាប់
ខេត្តកំពង់ចាម ៖ ស្ត្រីចំណាស់ឈ្មោះជួប ហ៊ុច អាយុ៥៦ឆ្នាំ រស់នៅភូមិខ្ញូងលើ ឃុំមហាខ្ញូង ស្រុកកោះសូទិន ត្រូវបានពស់ថ្នាំងប្ញស្សីខាំត្រូវម្រាមជើង និងប្រអប់ដៃខាងស្តាំពេលទៅបត់ជើងនៅខាងក្រោយផ្ទះចម្ងាយ៥០ម៉ែត្រ វេលាម៉ោង៧និង៣០នាទីយប់ ថ្ងៃទី៥ ឧសភា ធ្វើឱ្យពិសជ្រាបចូលក្នុងខ្លួនប្រាណបណ្តាលឱ្យចុកចាប់។ ទោះបីជាបែបណា តាំងពីពេលនោះមក គាត់មិនបានរូតរះមកកាន់មន្ទីរពេទ្យព្យាបាលទេ ដោយឱ្យគ្រូបុរាណស្តោះផ្លុំឡើងឆ្អែតឆ្អន់តែមិនធូរស្រាល ទើបរត់មករកគ្រូពេទ្យខេត្តឱ្យជួយសង្គ្រោះតាមក្រោយនាព្រឹកថ្ងៃទី៩ ឧសភា ព្រោះតែខ្លាចគ្រោះថ្នាក់ដល់អាយុជីវិត។
តាមការឱ្យដឹងពីស្ត្រីឈ្មោះជួប ហ៊ុល អាយុ៥១ឆ្នាំ ត្រូវជាប្អូនរបស់ស្ត្រីរងគ្រោះរៀបរាប់ថា នៅពេលដែលបងស្រីទៅបត់ជើងនៅខាងក្រោយផ្ទះនោះ ក៏បានដើរជាន់សត្វពស់អាសិរ្ពិស១ក្បាល បណ្តាលឱ្យវាខាំត្រង់ម្រាមជើងខាងស្តាំរហូតចេញឈាម ហើយដោយសារតែឈឺចុកចាប់ពេកគាត់ក៏បានអោនទៅចាប់ទាញចេញ ក៏ត្រូវពស់នោះខាំចំប្រអប់ដៃស្តាំថែមទៀត។ ពេលត្រូវពស់១ក្បាលខាំបណ្តាលឱ្យរងរបួសបែបនេះ បងស្រីបានស្រែកហៅគេឯងឱ្យជួយ ហើយមានលោកយាយម្នាក់បានឮក៏បានចេញមកជួយគ្រាហ៍នាំមកដាក់នៅខាងក្រោមផ្ទះ និងបានយកទឹកឃ្មុំ និងជ័រល្ហុងខ្វងមកលាបបិទត្រង់មុខរបួស ដើម្បីបន្ថយការឈឺចុកចាប់ តែបងស្រីចេះតែងងុយដេក និងរកកល់ចង់ក្អួតចង្អោរ។
ពេលនោះចាស់ៗក្នុងភូមិបានប្រាប់ឱ្យបងស្រីដេកផ្ទាល់ដីពេញមួយថ្ងៃដើម្បីបន្សាបពិស ដោយមិនឱ្យលើកដាក់នៅលើផ្ទះឡើយ។ លុះមួយថ្ងៃក្រោយមកទើបគាត់គ្រាហ៍បងស្រីឡើងទៅលើផ្ទះ និងបានហៅគ្រូបុរាណឱ្យមកស្តោះផ្លុំ តែមិនបានធូរស្រាលទេ ដោយត្រង់កន្លែងពស់ខាំនៅតែហើម ហើយបងស្រីចេះតែក្តៅខ្លួន ទើបគាត់សម្រេចចិត្តនាំទៅសង្គ្រោះនៅមន្ទីរពេទ្យខេត្តនាថ្ងៃទី៩ ឧសភា។
ស្ត្រីឈ្មោះជួប ហ៊ុល បញ្ជាក់ថា ក្នុងពេលនាំមកកាន់មន្ទីរពេទ្យខេត្ត គាត់ឃើញស្នាមកន្ទួលពណ៌ខ្មៅលើខ្លួនប្រាណ និងផ្ទៃមុខបងស្រី ហើយក្រោយពីសម្រាកព្យាបាលបាន២ថ្ងៃ មុខរបួសបងស្រីក៏បានធូរស្រាលជាងមុន។ គ្រូពេទ្យបានប្រាប់ឱ្យដឹងដែរថា តាមការពិនិត្យមើលអាការៈរបស់ស្ត្រីរងគ្រោះខាងលើនេះ មិនមានបញ្ហាអ្វីនោះទេ ព្រោះត្រង់មុខរបួសមិនទាន់រលួយ ហើយតាមរយៈឱសថសម្រាប់ព្យាបាលពស់ខាំ ឬចឹកនោះគឺអាចសង្គ្រោះអាយុជីវិតរបស់ស្ត្រីឈ្មោះហ៊ុច ឱ្យផុតពីគ្រោះថ្នាក់បាន៕
ចែករំលែកព័តមាននេះ