ខេត្តបាតំដំបង ៖ អភិបាលក្រុងបាត់ដំបង លោកលាង វាសនា បានចេញលិខិតព្រមានចាត់វិធានការតាមផ្លូវច្បាប់ចំពោះម្ចាស់សំណង់ម្នាក់ នៅថ្ងៃទី ១០ សីហា ប្រសិនបើម្ចាស់សំណង់នេះមិនព្រមផ្អាកសកម្មភាពជាបណ្ដោះអាសន្ន ដែលកំពុងសាងសង់សំណង់រឹងមាំរំលោភលើដីចំណីស្ទឹងសង្កែ ស្ថិតនៅចំណុចភូមិថ្កូវ សង្កាត់ក្ដុលដូនទាវ ក្រុងបាត់ដំបង ។
លោក លាង វាសនា បានចេញលិខិតជូនដំណឹងនេះ ទៅកាន់ម្ចាស់សំណង់ឈ្មោះ ណាន ណៃ នៅភូមិថ្កូវ សង្កាត់ក្ដុលដូនទាវ ក្រុងបាត់ដំបង ដែលកំពុងធ្វើការសាងសង់សំណង់រឹងមាំរំលោភចូលលើដីមាត់ស្ទឹងសង្កែ។
នៅក្នុងលិខិតនេះ លោកអភិបាលក្រុងបានចោទប្រកាន់ថា ម្ចាស់សំណង់នេះថា បានសាងសង់រំលោភលើដីចំណីស្ទឹង ដោយពុំមាន «ច្បាប់អនុញ្ញាត» ។ លោកអភិបាលក្រុងបានបញ្ជាឲ្យម្ចាស់សំណង់នេះ «ត្រូវផ្អាកការសាងសង់ជាបន្ទាន់ ដោយគិតចាប់ពីថ្ងៃចុះហត្ថលេខានេះតទៅ» ហើយលោកបានព្រមានថា ប្រសិនបើម្ចាស់ផ្ទះ មិនគោរពតាមការណែនាំខាងលើនេះ រដ្ឋបាលក្រុងនឹងចាត់វិធានការតាមផ្លូវច្បាប់ជាធរមាន ដោយចុះរឹមអូសសម្ភាររបស់ជាងយកមករក្សាទុកជាបណ្ដោះអាសន្ន ។
សូមបញ្ជាក់ថា នៅថ្ងៃដែលរដ្ឋបាលក្រុងចេញសេចក្ដីជូនដំណឹងនេះ គឺក្រុមជាងកំពុងតែដំណើរការសាងសង់យ៉ាងរលូនរួចរាល់ប្រហែល៥០% ទៅហើយ ។ បើពិនិត្យជាក់ស្ដែងទីតាំង នៃសំណង់ផ្ទះដីធំសម្បើមនេះ បានសាងសង់រំលោភយកដល់មាត់ស្ទឹងសង្កែតែម្ដង ។ គេពុំដឹងថា ការចាប់ផ្ដើមសាងសង់ដំបូងរបស់ម្ចាស់សំណង់ឈ្មោះ ណាន ណៃ នេះ អាជ្ញាធរមូលដ្ឋានបានដឹងដែរ ឬ យ៉ាងណានោះទេ ទើបរហូតមកដល់ពេលនេះ រដ្ឋបាលក្រុង ទើចចេញលិខិតជូនដំណឹងឲ្យម្ចាស់សំណង់ផ្អាកសកម្មភាពជាបណ្ដោះអាសន្ន ខណៈសំណង់ធ្វើបានច្រើនជាន់ រួចរាល់ស្ទើរពាក់កណ្ដាលទៅហើយ ។
ប៉ុន្តែយ៉ាងណា ពេលនេះ រដ្ឋបាលក្រុងបានបញ្ជាឱ្យផ្អាកការសាងសង់ជាបណ្ដោះអាសន្នជាផ្លូវការហើយ។ តើក្រោយពីផ្អាកបណ្ដោះអាសន្ន និងជួបដោះស្រាយហើយ រដ្ឋបាលក្រុង និង មន្ទីរជំនាញ ត្រូវចុះរុះរើវាយកំទេចចោល ឬ ត្រូវចេញច្បាប់អនុញ្ញាតឲ្យម្ចាស់សំណង់បន្តការសាងសង់រំលោភយកដីចំណីស្ទឹងដដែល ដោយស្របច្បាប់ ?
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ