ខេត្តកណ្តាល ៖ នៅលើសង្វៀនប្រដាល់ស្ថានីយទូរទស្សន៍ប៉ុសិ៍្តលេខ៥ សម្រាប់រសៀលថ្ងៃអាទិត្យ ទី១៥ ឧសភា ខាងមុខនេះ ចាន់ វិរៈ មកពីក្លឹបកងពលតូចលេខ៧០ ត្រូវបានផ្គូផ្គងឱ្យជួបប្រកួតជាមួយឯម វុត្ថា មកពីក្លឹបគ្រុឌមានជ័យ ។ អ្នកប្រដាល់ដែលអាចចាត់ទុកថា ជាលំដាប់ ខ្លាំងទាំង២រូបនេះ ធ្លាប់មានប្រវត្តិប្រកួតគ្នាជាញឹកញាប់រួចមកហើយកាលពីពេលកន្លងមកដោយមានឈ្នះ-ចាញ់ជាធម្មតា ។ ចាន់ វិរៈ ជាអ្នកលេងកណ្តាប់ដៃល្អ វាយចេញលឿនហើយធ្ងន់ និងមិនងាយទន់ជ្រាយផ្តេសផ្តាសទេ ។ រីឯឯម វុត្ថា កណ្តាប់ដៃរបស់គេស្រាលជាងវិរៈ តែអ្នកប្រដាល់រូបនេះមានស្នៀតកែងយ៉ាងល្អ អ្នកដែលប៉ះជាមួយវុត្ថា មិនអាចប្រហែសស្នៀតកែងនេះបានឡើយ ។ ទោះជាបែបណារវាងគូនេះអ្នកណាឈ្នះឬចាញ់ ត្រូវតែឈឺសាច់រៀងៗខ្លួន ។
សូយ ភិរម្យ មកពីក្លឹបអូដឹមកីឡា ត្រូវប្រកួតជាមួយខុន ស៊ីចន មកពីក្លឹបកងពលធំ អន្តរាគមន៍លេខ៣ ប្រាសាទព្រះវិហារ ។ តាម ពិត ខុន ស៊ីចន ចេញមុខមកសងសឹកជំនួសមិត្តរួមក្លឹបរបស់គេ គឺខុន ស៊ីចាន់ ដែលត្រូវសូយ ភិរម្យ ផ្តួលឱ្យសន្លប់កាលពី២សបា្តហ៍មុន ។ គួររំលឹកថា កាលពីថ្ងៃទី១ ឧសភា កន្លងមក នៅលើសង្វៀន ស្ថានីយទូរទស្សន៍ប៉ុស្តិ៍លេខ៥ ដដែលនេះ សូយភិរម្យ បានប្រើស្នៀតពិសេស គឺការទាត់ផ្កាប់ចានទៅលើកញ្ចឹងករបស់ខុន ស៊ីចាន់ បណ្តាលឱ្យសន្លប់ធំនៅក្នុងទឹកទី៤ ។ ពេលនេះ ខុន ស៊ីចន បានចេញមុខមកសងសឹកជំនួស ប៉ុន្តែមិនដឹងថា ទទួលវាសនាបែបណាទេ ។
ហួន សុខនីម មកពីក្លឹបសិង្ហកីឡា ត្រូវប្រកួត ជាមួយសាំង ស៊ីថា មកពីក្លឹបក្រសួងការពារជាតិ។ សុខនីម មានប្រវត្តិប្រកួតក្រោយស៊ីថា មានន័យថា គេជាសិស្សប្អូន ។ ស៊ីថា ទោះបីជាអ្នកប្រដាល់ចាស់វស្សា ប៉ុន្តែហាក់ដូចជាមិនសូវល្បីឈ្មោះទេ ។ ពេលនេះ គេត្រូវប៉ះជាមួយសិស្សប្អូន ហើយក៏មិនប្រាកដថា ឈ្នះដែរ ។
ផៃ គឹមហឿត មកពីក្លឹបខេមរិន្ទមានប្ញទ្ធិ ត្រូវប្រកួតជាមួយគួន ហ៊ុនហ៊ីម មកពីក្លឹបពន្លឺសាមគ្គី ខេត្តបាត់ដំបង ។ ចាន់ ចាវ មកពីក្លឹបតាព្រហ្មមានជ័យ ប្រកួតជាមួយប្រិមប្រិយ មកពីក្លឹបបុរីមានប្ញទ្ធិ ។ រីឯការប្រកួតជាលក្ខណៈសាកលជាការជួបប្រកួតរវាងស្វាយ ចាន់ថន មកពីក្លឹបប៉េអឹមរាជធានីភ្នំពេញជាមួយណា បូរី មកពីក្លឹបប្រដាល់ខេត្តកំពង់ឆ្នាំង ៕
ចែករំលែកព័តមាននេះ