ខេត្តរតនគិរី ៖ កម្មករជាង២០០នាក់ដែលបំរើការនៅក្រុមហ៊ុន ហង អញ់ អណ្ដូងមាស ចម្ការចេករបស់វៀតណាម ដែលមានទីតាំងស្ថិតនៅភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី បានជួបជុំគ្នានាថ្ងៃទី៩ ខែសីហា ឆ្នាំ២០២៣ នៅខាងមុខក្រុមហ៊ុន ដើម្បីតវ៉ា និងស្នើសុំតំណាងក្រុមហ៊ុន ឲ្យបើកប្រាក់ខែជូនពួកគាត់ដែលមានទំហំទឹកប្រាក់រហូតដល់ទៅចំនួន២៤៨,៣៦១,៨០០រៀល (ជាង២០០លានរៀល)។
បើតាមអ្នកស្រី យ៉ែម ណុប តំណាងឲ្យកម្មករដែលរងគ្រោះ បានប្រាប់ឲ្យដឹងថា «កន្លងមក នាយកក្រុមហ៊ុនចម្ការចេកហង អញ់អណ្ដូងមាស បានផ្ដល់សិទ្ធិឲ្យឈ្មោះ វង្ស ជនជាតិវៀតណាម ជាអ្នកមើលចាត់ចែងការងារដាំដុះ និងថែទាំដំណាំចេកជំនួសក្រុមហ៊ុន ពោលគឺជាមេកាឡូ (មេការរួម)។ ហើយមេកាឡូ រូបនោះ បានមើលលើមេការផ្នែកប្រមាណចំនួន១០នាក់ទៀត ដោយក្នុងនោះមេការម្នាក់ៗ មានកម្មករចាប់ពី៥០នាក់រហូតទៅ៦០នាក់»។
តំណាងកម្មករ បានឲ្យដឹងទៀតថា «នៅពេលចុះធ្វើការ មេកាឡូ សន្យាថានឹងបើកប្រាក់ពលកម្មឲ្យកម្មករ២ដងក្នុងមួយខែ ក៏ប៉ុន្ដែជាក់ស្ដែងមេកាឡូ មិនបានបើកប្រាក់ខែឲ្យគ្រប់ចំនួននោះឡើយ គឺបើកឲ្យតែថ្លៃម្ហូប ស្ទើរតែមិនចង់គ្រប់ផង»។
តំណាងកម្មករ បានបញ្ជាក់ថា «នៅពេល មេកាឡូ មិនបានបើកប្រាក់ខែឲ្យទៀងទាត់ ក្នុងនាមជាអ្នកម៉ៅការ បានទៅខ្ចីបុលប្រាក់ពីធនាគារយកមកប្រើប្រាស់ គឺបើកឲ្យកម្មករ ដើម្បីកុំឲ្យស្ទះការងារ ប៉ុន្ដែឈ្មោះ វង្ស ដែលមេកាឡូ ជនជាតិវៀតណាមនោះ បានពន្យាពេលពុំបានបើកលុយឲ្យមេការខ្មែរទាំង១០នាក់ គឺចាប់ពីខែកក្កដា ឆ្នាំ២០២២ រហូតមកដល់ខែសីហា ឆ្នាំ២០២៣នេះ ធ្វើឲ្យថ្លៃពលកម្មកើនប្រាក់រហូតដល់ជាង២៤៨,៣៦១,៨០០រៀល (ជាង២០០លានរៀល) ឯណោះ»។
ប្រភពដដែលបន្តថា «កាលពីខែមេសា ឆ្នាំ២០២២ តំណាងកម្មករក៏ធ្លាប់បានទៅដាក់ពាក្យប្ដឹងនៅសាលាដំបូងខេត្តរតនគិរី ហើយតុលាការក៏បានកោះហៅខាងក្រុមហ៊ុន ហង អញ់ អណ្ដូងមាស ឲ្យចូលខ្លួនមកធ្វើការដោះស្រាយដែរ តែក្រុមហ៊ុននៅតែពុំបានបើកប្រាក់ខែឲ្យកម្មករទាំងជាង២០០នាក់នោះទេ»។
ប្រភពដដែលបន្តទៀតថា «លុះមកដល់ខែកក្កដា ឆ្នាំ២០២៣នេះ ក្រុមកម្មករក៏បាននាំគ្នាមកកាន់សាលាខេត្តរតនគិរី ដើម្បីសុំឲ្យអភិបាលខេត្តជួយអន្ដរាគមន៍ ព្រោះពួកគាត់គ្មានប្រាក់សម្រាប់ដោះស្រាយជីវភាពប្រចាំថ្ងៃ និងសម្រាប់បង់ការប្រាក់ធនាគានោះទេ»។
គួរបញ្ជាក់ថា លោក ញ៉ែម សំអឿន អភិបាលខេត្តរតនគិរី ក៏បានចេញលិខិតមួយច្បាប់ បញ្ជូនទៅលោក សេក ហៃ អភិបាលស្រុកកូនមុំ ឲ្យធ្វើការដោះស្រាយរវាងក្រុមហ៊ុន និងកម្មករឲ្យបានជ្រះស្រឡះ ប៉ុន្តែមកដល់ពេលនេះ តំណាងកម្មករថា លោក សេក ហៃ នៅពុំទាន់បានដោះស្រាយជូនពួកគាត់នៅឡើយទេ»។
ខណៈពេលនេះ តំណាងកម្មករនៅចម្ការចេក បានបញ្ជាក់ថា មេកាឡូ ឈ្មោះវង្ស នោះ ត្រូវបានក្រុមហ៊ុនឲ្យត្រឡប់ទៅប្រទេសវៀតណាមវិញបាត់ហើយ តែរឿងនេះពួកគាត់សុំឲ្យខាងក្រុមហ៊ុនចេញមុខទទួលសងប្រាក់ជាង២០០លានរៀលនោះ ព្រោះមេកាឡូរូបនោះ គឺជាមនុស្សរបស់ក្រុមហ៊ុន «ហង អញ អណ្ដូងមាស»។
បើតាមលោក សេក ហៃ អភិបាលស្រុកកូនមុំ ក៏បានប្រាប់ឲ្យដឹងដែរថា ពាក់ព័ន្ធករណីខាងលើនេះ កម្មករធ្លាប់បានមកប្ដឹងក្រុមហ៊ុនចម្ការចេក ទៅកាន់តុលាការរួចម្ដងហើយ គឺតាមរយ:មន្ទីរការងារ តែពុំដឹងថា តើមានដំណោះស្រាយយ៉ាងណានោះទ?។ ហើយនៅថ្ងៃខាងមុខ លោកនឹងអញ្ជើញភាគីកម្មករឲ្យមកសាលាស្រុក ដើម្បីបំភ្លឺបន្ថែម៕
ចែករំលែកព័តមាននេះ