ជនសង្ស័យ២នាក់ត្រូវបានសមត្ថកិច្ចចម្រុះឃាត់ខ្លួន និងបញ្ជូនទៅអធិការដ្ឋាននគបាលស្រុកកែវសីមាទាំងយប់ ក្រោយពីជនសង្ស័យទាំងនេះព្យាយាមជម្លៀសរំដោះគ្រឿងចក្រ១គ្រឿងដែលធ្វើការឈូសឆាយព្រៃខុសច្បាប់ នៅទីតាំង
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់ត្រូវបានសមត្ថកិច្ចចម្រុះឃាត់ខ្លួន និងបញ្ជូនទៅអធិការដ្ឋាននគបាលស្រុកកែវសីមាទាំងយប់ ក្រោយពីជនសង្ស័យទាំងនេះព្យាយាមជម្លៀសរំដោះគ្រឿងចក្រ១គ្រឿងដែលធ្វើការឈូសឆាយព្រៃខុសច្បាប់ នៅទីតាំងស្ថានីយដាំឈើចុងផ្លាស់ ស្ថិតក្នុងភូមិព្រះ ឃុំស្រែឈូក ស្រុកកែវសីមា។
បើតាមលោក សុះ មីឡែម អភិបាលរងស្រុកកែវសីមា និងជាប្រធានលេខាធិការដ្ឋានគណៈបញ្ជាការឯកភាពស្រុក បានឱ្យដឹងថា នៅថ្ងៃទី០៧ ខែសីហា ឆ្នាំ២០២៣ វេលាម៉ោង២០និង២២នាទីយប់ លេខាធិការដ្ឋានគណៈបញ្ជាការឯកភាពស្រុក បានដឹកនាំកម្លាំងអធិការដ្ឋានស្រុក កងរាជធាវុធហត្ថស្រុក ផ្នែករដ្ឋបាលស្រុក និងសង្កាត់រដ្ឋបាលព្រៃឈើស្រែព្រះ-ចុងផ្លាស់ ដោយមានការសម្របសម្រួលនីតិវិធីពីលោក អ៊ាង សុគន្ធ ព្រះរាជអាជ្ញារងអមសាលាដំបូងខេត្តមណ្ឌលគិរី បានធ្វើការចាប់ឃាត់គ្រឿងចក្រអេស្កាវ៉ាទ័រចំនួន០១គ្រឿង និងរថយន្តដឹកអេស្កាវ៉ាទ័រចំនួន០១គ្រឿងទៀត នៅត្រង់ចំណុចលេខនិយាមកា ៦៦១៤៦២-១៣៧៣៤០៦ ដែលកំពុងរត់គេចខ្លួនចេញពីកន្លែងកើតហេតុ ស្ថិតក្នុងភូមិព្រះ ឃុំស្រែឈូក ស្រុកកែវសីមា។
លោកអភិបាលរងស្រុកកែវសីមា បន្តថា គ្រឿងចក្រខាងលើនេះ បានធ្វើការឈូកឆាយដីព្រៃដោយគ្មានច្បាប់អនុញ្ញាតិលើទីតាំងដីស្ថានីយដាំឈើចុងផ្លាស់ ដែលមានទំហំប្រមាណជាង១០០ហិកតា ត្រង់ចំណុចលេខនិយាមកា ៦៦៣៥១៧-១៣៧៨៧៣៧ ស្ថិតនៅក្នុងភូមិព្រះ ឃុំស្រែឈូក ស្រុកកែវសីមា។ ហើយក្នុងប្រតិបត្តិការខាងលើនេះផងដែរ កងកម្លាំងលេខាធិការដ្ឋាន ក៏បានធ្វើការឃាត់ខ្លួនជនសង្ស័យចំនួន២នាក់ ដែលមានឈ្មោះដូចខាងក្រោម ៖
ទី១- ឈ្មោះ អូន តុលា ភេទប្រុស អាយុ១៩ឆ្នាំ រស់នៅភូមិស្វាយជ្រះ ឃុំស្វាយជ្រះ ស្រុកស្នួល ខេត្តក្រចេះ និងទី២- ឈ្មោះ ចំរើន សំណាង ភេទប្រុស អាយុ១៨ឆ្នាំ រស់ភូមិស្រែនាម ឃុំឃ្សឹម ស្រុកស្នួល ខេត្តក្រចេះ៕
ចែករំលែកព័តមាននេះ