អាជ្ញាធរស្រុកគាស់ក្រឡ បានប្រើធម៌ក្ដៅដឹកនាំកម្លាំងចម្រុះ មានទាំងគ្រឿងចក្រផង ចុះវា.យកម្ទេចរបងថ្មរបស់ក្រុមហ៊ុនចិញ្ចឹមសត្វជ្រូកដ៏ធំមួយកន្លែង
ខេត្តបាត់ដំបង ៖ អាជ្ញាធរស្រុកគាស់ក្រឡ បានប្រើធម៌ក្ដៅដឹកនាំកម្លាំងចម្រុះ មានទាំងគ្រឿងចក្រផង ចុះវា.យកម្ទេចរបងថ្មរបស់ក្រុមហ៊ុនចិញ្ចឹមសត្វជ្រូកដ៏ធំមួយកន្លែងយីហោ «ស៊ីភី» ដែលសាងសង់រំលោ.ភបំពា.នលើចំណីផ្លូវផង និងលើដីប្រជាពលរដ្ឋខ្លះៗផង កាលពីព្រឹកថ្ងៃទី០៨ ខែសីហា ឆ្នាំ២០២៣ នៅចំណុចទាក់ធ្នឹម ស្ថិតក្នុងភូមិគោករកា ឃុំដូនបា ស្រុកគាស់ក្រឡ។ ក្រោយពីអាជ្ញាធរជូនដំណឹងឲ្យក្រុមហ៊ុននេះ ធ្វើការរុះរើច្រើនលើកកន្លងមក តែក្រុមហ៊ុនមិនយកត្រចៀកស្ដាប់ឡើយ។
មន្ត្រីរដ្ឋបាលស្រុកគាស់ក្រឡ បានរាយការណ៍ឱ្យដឹងថា «របងថ្មដែលក្រុមហ៊ុនចិញ្ចឹមជ្រូក CP នេះ បានធ្វើរបងថ្មដ៏រឹងមាំរំលោ.ភយកចំណីផ្លូវសាធារណៈរបស់រដ្ឋ ដែលមានទទឹងប្រវែង១៨ម៉ែត្រ និងបណ្ដោយប្រវែង៧១៧,៧១ម៉ែត្រ ដោយមានលោក ស៊ុយ សារី ជាម្ចាស់ក្រុមហ៊ុន។ មន្ត្រីដដែលឲ្យដឹងទៀងថា «ម្ចាស់ក្រុមហ៊ុននេះ បានសាងសង់របងថ្មដ៏រឹងមាំផង និងដាំបង្គោលថ្មមួយចំនួនផងដែរ ដោយគ្មានការពិភាក្សា ឬសួរនាំពីមន្ត្រីជំនាញទេ មុននឹងធ្វើការសាងសង់នេះ»។
មន្ត្រីរដ្ឋបាលស្រុកគាស់ក្រឡ បានរាយការណ៍ឱ្យដឹងបន្តថា «ក្រោយដឹងថា ក្រុមហ៊ុននេះធ្វើរបងរំលោ.ភយកដីរដ្ឋ អាជ្ញាធរស្រុក និងខេត្ត បានចេញលិខិតជូនដំណឹងម្ដងហើយម្ដងទៀតទៅកាន់ម្ចាស់ក្រុមហ៊ុន ឲ្យធ្វើការរុះរើចេញពីលើចំណីផ្លូវ តែម្ចាស់ក្រុមហ៊ុននេះនៅតែមានះរឹងរួស ធ្វើមិនដឹងមិនឮ ទើបអាជ្ញាធរស្រុក សុំគោលការណ៍ពីថ្នាក់លើ ដើម្បីវា.យកម្ទេចចោលតែម្ដង។
កោះសន្តិភាព មិនអាចទំនាក់ទំនងសុំការបំភ្លឺពីលោក ស៊ុយ សារី ដែលអាជ្ញាធរអះអាងថា ជាម្ចាស់ក្រុមហ៊ុន «CP» នេះបានទេ នៅព្រឹកថ្ងៃទី៩ ខែសីហា ឆ្នាំ២០២៣នេះ។
ដោយឡែកលោក ប៉ាង ហៀង អធិការស្រុកគាស់ក្រឡ ដែលដឹកនាំកម្លាំងចូលរួមក្នុងការងារនេះ បានប្រាប់ថា «មានរបងថ្មរឹងមាំផង និងមានដាំបង្គោលថ្មផង ដែលក្រុមហ៊ុននេះធ្វើរំលោ.ភលើចំណីផ្លូវសាធារណៈ ហើយក៏មានមួយផ្នែកខ្លះ ក្រុមហ៊ុននេះធ្វើរំលោ.ភលើដីពលរដ្ឋ តែត្រូវបានវា.យកម្ទេចចោលទាំងអស់»។
លោកអធិការបានបញ្ជាក់ថា «បើតាមមន្ត្រីជំនាញ និងប្រជាពលរដ្ឋនៅតំបន់នោះ បាននិយាយថា ភាគីក្រុមហ៊ុននេះ បានសាងសង់របងថ្មលើព្រំដី ដោយមិនបានសួរនាំ ឬពិគ្រោះយោបល់ជាមួយអាជ្ញាធរ ឬជាមួយប្រជាពលរដ្ឋដែលមានដីជាប់ព្រំប្រទល់គ្នាជាមុនទេ។ ពោលគឺធ្វើអត្តនោម័តម្នាក់ឯងតែម្ដង»។
លោក ប៉ាង ហៀង បានបញ្ជាក់ថា «មូលហេតុ ដែលអាជ្ញាធរស្រុក សម្រេចដឹកនាំកម្លាំងចម្រុះ និងប្រើគ្រឿងចក្រវា.យបំផ្លាញរបងថ្មរបស់ក្រុមហ៊ុនចោលពីលើដីចំណីផ្លូវនេះ ក៏ព្រោះតែភាគីក្រុមហ៊ុននេះ មិនព្រមអនុវត្តតាមសេចក្ដីជូនដំណឹងរបស់រដ្ឋបាលខេត្តផង និងរដ្ឋបាលស្រុកគាស់ក្រឡផង ដែលបានដាស់តឿនច្រើនលើកច្រើនសារ តែម្ចាស់ក្រុមហ៊ុននេះនៅតែធ្វើព្រងើយកន្តើយ ទើបអាជ្ញាធរចុះកម្ទេចចោល និងណែនាំឲ្យម្ចាស់ក្រុមហ៊ុននេះ ធ្វើកិច្ចសន្យាបញ្ឈប់ការសាងសង់រំលោ.ភយកដីរដ្ឋបន្តទៀត៕
ចែករំលែកព័តមាននេះ