ខេត្តបាត់ដំបង ៖ លំនៅឋានមួយខ្នងដែលធ្វើអំពីឈើប្រក់ស័ង្កសី ត្រូវបានអគ្គិភ័យដែលគេសង្ស័យបណ្ដាលមកពីការទុស្សេខ្សែភ្លើងឆាបឆេះអស់គ្មានសល់ កាលពីវេលាម៉ោង១២ថ្ងៃត្រង់ថ្ងៃទី០៨ សីហា ស្ថិតនៅចំណុចភូមិនិគមក្នុង ឃុំជ្រោយស្ដៅ ស្រុកថ្មគោល ខណ:ម្ចាស់ផ្ទះរវល់ទៅស្រែ…
ខេត្តបាត់ដំបង ៖ លំនៅឋានមួយខ្នងដែលធ្វើអំពីឈើប្រក់ស័ង្កសី ត្រូវបានអគ្គិភ័យដែលគេសង្ស័យបណ្ដាលមកពីការទុស្សេខ្សែភ្លើងឆាបឆេះអស់គ្មានសល់ កាលពីវេលាម៉ោង១២ថ្ងៃត្រង់ថ្ងៃទី០៨ សីហា ស្ថិតនៅចំណុចភូមិនិគមក្នុង ឃុំជ្រោយស្ដៅ ស្រុកថ្មគោល ខណ:ម្ចាស់ផ្ទះរវល់ទៅស្រែ ហើយពុំមានអ្នកនៅចាំ។
តាមរបាយការណ៍សមត្ថកិច្ចបានឲ្យដឹងថា លំនៅឋានដែលត្រូវអគ្គិភ័យលេបត្របាក់ធ្វើអំពីឈើប្រក់ស័ង្កសីទំហុំ៤ម៉ែត្រx៨ម៉ែត្រ និងមានតសំយ៉ាបថែមប្រវែង៤ម៉ែត្រទៀត ។ ម្ចាស់ផ្ទះរងគ្រោះឈ្មោះ ហេវ យុត ប្រុសអាយុ៥១ឆ្នាំ ។ បើតាមមន្ត្រីមូលដ្ឋានបាននិយាយថា ម្ចាស់ផ្ទះបានបិទទ្វារចាក់សោរួចនាំគ្នាទៅស្រែអស់ ហើយក៏មានអគ្គិភ័យកើតឡើងមិនអាចរំដោះទ្រព្យសម្បត្តិបាន ។ម្ចាស់ផ្ទះបានដឹងនៅពេលភ្លើងកំពុងឆេះ ហើយអ្នកភូមិបានទូរស័ព្ទប្រាប់ ។ នេះបើតាមការអះអាងរបស់សមត្ថកិច្ច ។
លោក សេង លុច អធិការស្រុកថ្មគោលបានឲ្យដឹងថា ម្ចាស់ផ្ទះមិនបានដឹងពីដំបូងទេ ព្រោះរវល់ទៅស្រែ ។ លោកថា អគ្គិភ័យនោះទំនងបានកើតឡើងដោយសារទុស្សេខ្សែភ្លើងនៅក្នុងផ្ទះ ស្រាប់តែឆាបឆេះអស់គ្មានសល់ សូម្បីអ្នកភូមិក៏មិនអាចជួយទាន់ដែរ ហើយរថយន្តពន្លត់អគ្គីភ័យរបស់សមត្ថកិច្ចក៏ទៅជួយមិនទាន់ដែរ ។ លោកអធិការបានបញ្ជាក់ថា ទ្រព្យសម្បត្តិនៅក្នុងផ្ទះស្ទើរទាំងស្រុងត្រូវភ្លើងឆេះអស់ មិនអាចរំដោះបានឡើយ ។
បើតាមម្ចាស់ផ្ទះបាននិយាយថា ក្រៅពីអស់ផ្ទះមួយខ្នង នៅមានទ្រព្យសម្បត្តិទាំងអស់នៅក្នុងផ្ទះក៏ត្រូវភ្លើងឆេះអស់គ្មានសល់ដែរ ក្នុងនោះមាន៖ គោយន្តកន្ត្រៃ០១គ្រឿង, រថយន្តប្រភេទទូរីស១២កៅអី០១គ្រឿង, ទូទឹកកក០១គ្រឿង, ម៉ាស៊ីនកិនស្រូវខ្នាតតូច០១គ្រឿង, ម៉ាស៊ីនហាន់ដើមចេក០១គ្រឿង, គ្រែ០២, តុបាយ០១, ទុរទស្ស០១គ្រឿង និងលុយថៃចំនួន៣,០០០បាត សរុបជាទឹកប្រាក់ប្រមាណ១៦,០០០ដុល្លារ។
លោកសេង លុច អធិការស្រុកថ្មគោលបានបញ្ជាក់ថា បើតាមការស្រាវជ្រាវ និងការបំភ្លឺនានាពីប្រជាពលរដ្ឋដែលឃើញហេតុការដំបូង រួមទាំងការសន្និដ្ឋានពីម្ចាស់ផងអគ្គិភ័យ អាចកើតឡើងដោយសារការទុស្សេខ្សែភ្លើង ពេលម្ចាស់ផ្ទះរវល់ទៅស្រែ គ្មានមនុស្សស្នាក់នៅ៕
ចែករំលែកព័តមាននេះ