រាជធានីភ្នំពេញ ៖ ស្ដ្រីម្នាក់បានត្រូវនគរបាលប៉ុសិ៍្ដរដ្ឋបាលផ្សារកណ្ដាលទី១ ឃាត់ខ្លួនក្រោយពីស្ដ្រីនោះ និងបក្សពួក២នាក់ ទៀតយកកាំបិតចិតបន្លែភ្ជង់ស្ដ្រីម្នាក់ប្លន់យកទូរស័ព្ទកាលពីវេលា ម៉ោង១និង៣០នាទីរំលងអធ្រាត្រឈានចូលថ្ងៃទី១៥ កុម្ភៈ ឆ្នាំ២០១០
រាជធានីភ្នំពេញ ៖ ស្ដ្រីម្នាក់បានត្រូវនគរបាលប៉ុសិ៍្ដរដ្ឋបាលផ្សារកណ្ដាលទី១ ឃាត់ខ្លួនក្រោយពីស្ដ្រីនោះ និងបក្សពួក២នាក់ ទៀតយកកាំបិតចិតបន្លែភ្ជង់ស្ដ្រីម្នាក់ប្លន់យកទូរស័ព្ទកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៥ កុម្ភៈ ឆ្នាំ២០១០ នៅមុខភោជនីយដ្ឋានរីវើហ្វ្រន់ ផ្ទះលេខ២០ Eo កែងផ្លូវលេខ១១៨ និងវិថីព្រះស៊ីសុវត្ថិ សង្កាត់ផ្សារកណ្ដាលទី១ខណ្ឌដូនពេញ ។
ស្ដ្រីរងគ្រោះឈ្មោះពៅ សីហា អាយុ២០ឆ្នាំ ជាអ្នករត់តុកាហ្វេ ស្នាក់នៅផ្ទះលេខ ១៥Eo ផ្លូវលេខ១១៨ សង្កាត់ផ្សារកណ្ដាលទី១ ខណ្ឌដូនពេញ ។ ក្នុងពាក្យបណ្ដឹងដែលដាក់ចូលមកសមត្ថកិច្ចបានរៀបរាប់ថា កាលពីវេលាម៉ោងជាង១រំលងអធ្រាត្រឈានចូលថ្ងៃទី១៥ កុម្ភៈ រូបនាងនិងមិត្ដភក្ដិរួមការងារ៣នាក់ទៀត បានបបួលគ្នាទៅហូបពងទាកូននៅមាត់ទន្លេ ហើយពេលនោះមិត្ដភក្ដិនាំគ្នាជិះម៉ូតូឌុបទៅមុន ចំណែកនាងដើរតាមក្រោយលើកំណាត់ផ្លូវលេខ១១៨ ឆ្ពោះទៅ មាត់ទន្លេដែរ ។ លុះដល់កែងវិថីព្រះស៊ីសុវត្ថិមុខផ្ទះលេខ២០Eo ស្រាប់តែមានមនុស្សស្រីម្នាក់ និងបុរស២នាក់ចោមរោម ចាប់ក្រៀកនាង ហើយស្ដ្រីជាជនដៃដល់បានយកកាំបិតចិតបន្លែភ្ជង់បំពង់.កនាងប្លន់យកទូរស័ព្ទដៃ រួចហើយក៏នាំគ្នាគេចខ្លួនបាត់ ។ ក្រោយពីត្រូវក្រុមចោរប្លន់យកទូរស័ព្ទដៃបែបនេះ នាងក៏ដើរត្រឡប់មកផ្ទះវិញតាមផ្លូវលេខ១១៨ លុះខណៈពេលដើរជិតដល់កន្លែងធ្វើការ ស្រាប់តែជួបជនដៃដល់ ក៏ស្រែកឆោឡោឡើង ដើម្បីឱ្យប្រជាពលរដ្ឋជួយដេញចាប់ ។ ភ្លាមៗនោះ ប្រជាពលរដ្ឋបានឃាត់ខ្លួនស្ដ្រីម្នាក់ក្នុងចំណោមបក្សពួក៣នាក់ ព្រមទាំងដកហូតបានទូរស័ព្ទដៃមួយគ្រឿងដែលជារបស់គាត់មកវិញផងដែរ ។
មន្ដ្រីសមត្ថកិច្ចមូលដ្ឋានបានឱ្យដឹងថា ស្ដ្រីសង្ស័យធ្វើសកម្មភាពប្លន់យកទូរស័ព្ទដៃដែលត្រូវឃាត់ខ្លួននេះឈ្មោះម៉េង ឆិចឆិន អាយុ២៤ឆ្នាំ មុខរបរនិងកន្លែងស្នាក់នៅមិនពិតប្រាកដ ។ ខណៈពេលចាប់ខ្លួនសមត្ថកិច្ចដកហូតបានទូរស័ព្ទដៃមួយគ្រឿងម៉ាក BLUE TOOTH និងបានប្រគល់ឱ្យជនរងគ្រោះវិញ រីឯបក្សពួកជនសង្ស័យ២នាក់ទៀតដែលគេចខ្លួន សមត្ថកិច្ចបានកំណត់មុខសញារួចហើយ ៕
ចែករំលែកព័តមាននេះ