បង្ក្រាបបទល្មើសនេសាទនៅព្រំប្រទល់ឃុំចំនួន២ រឹបអូសវត្ថុតាង និងលែងកូនត្រីទៅវិញ
- ក្រចេះ
ខេត្តក្រចេះ ៖ លោកស្រី សុខ សុផាត អភិបាលរងស្រុកព្រែកប្រសព្វ បានដឹងនាំកម្លាំងចម្រុះចុះត្រួត
ខេត្តក្រចេះ ៖ លោកស្រី សុខ សុផាត អភិបាលរងស្រុកព្រែកប្រសព្វ បានដឹងនាំកម្លាំងចម្រុះចុះត្រួតពិនិត្យ និងបង្ក្រាបបទល្មើសនេសាទ ក្នុងបឹងធម្មជាតិ ដោយរឹបអូសវត្ថុតាងបទល្មើសនេសាទជាច្រើនបំផ្លាញចោល។
ករណីខាងលើកម្លាំងចម្រុះបានធ្វើឡើងនៅរសៀលថ្ងៃទី៥ ខែសីហា ឆ្នាំ២០២៣ ស្ថិតនៅចំនុច ក.ព្រែកបឹងធំ (ក.ព្រែកយួន) ជាប់ព្រំប្រទល់រវាងឃុំកំពង់គរ និងឃុំតាម៉ៅ ស្រុកព្រែប្រសព្វ ខេត្តក្រចេះ។
នាយខណ្ឌជលផលក្រចេះ លោក ម៉ុក ពន្លក បានឲ្យដឹងនៅព្រឹកថ្ងៃទី ៦ ខែសីហា នេះថា កម្លាំងចម្រុះចូលរួមផ្នែករដ្ឋបាលជលផលព្រែកប្រសព្វ សហការជាមួយគណៈបញ្ជាការឯកភាពស្រុក ព្រែកប្រសព្វ ក្រុមប្រឹក្សាឃុំកំពង់គរ និងឃុំតាម៉ៅកម្លាំងនគរបាលប៉ុស្តិ៍រដ្ឋបាលកំពង់គរ តាម៉ៅ កម្លាំងសហគមន៍នេសាទតាម៉ៅ និងប្រជាការពារកំពង់គរ ។
លោកនាយខណ្ឌបន្តថាជាលទ្ធផលកម្លាំងចម្រុះសម្រេចបាន ដោយធ្វើការរុះរើ និងបំផ្លាញចោលនូវឧបករណ៍នេសាទល្មើសច្បាប់រួមមាន របាំងសាច់អួនក្រឡាញឹក(សាច់កាវ)ដាក់បាំងជិតចំណុចកព្រែកយួនចំនួន១១កន្លែង (១១ខ្សែ) ប្រវែង៤១០ម៉ែត្រលបសាច់អួនក្រឡាញឹក(សាច់កាវ) ចំនួន១២គ្រឿង,លបប្រឹស១០០ចំនួន៦គ្រឿង ប្រវែង៦០ម៉ែត្រ ក្រឡា៤-៥សង្ទីម៉ែត្រ បង្គោលចម្រឹងឈើ-ប្ញស្សីចំនួន៣០០ដើមនិងចាក់លែងត្រីចម្រុះចូលបឹងធម្មជាតិ ប្រមាណជា១៥គីឡូក្រាម។
លោក ម៉ុក ពន្លក បានបញ្ជាក់ទៀតថា ក្នុងនាមសមត្ថកិច្ចជំនាញ សូមអំពាវនាវដល់ប្រជានេសាទទាំងអស់ កុំឲ្យពួកគាត់ប្រើឧបករណ៍នេសាទខុសច្បាប់ ដូចជាឆក់ ស្បៃមុង ដែលបំផ្លាញធនធានជលផលធ្ងន់ធ្ងរ សូមឲ្យបងប្អូននេសាទជាលក្ខណៈគ្រួសារ ដើម្បីរក្សាធនធានជលផលឲ្យមាននិរន្តភាពសម្រាប់បច្ចប្បន្ន និងទៅអនាគត ហើយសូមប្រជាពលរដ្ឋ និងអាជ្ញាធរមូលដ្ឋាន ជួយផ្ដល់ព័ត៌មានស្ដីពីបទល្មើសជលផលដើម្បីឲ្យសមត្ថកិច្ចជលផល និងអាជ្ញាធរពាក់ព័ន្ធចុះបង្ក្រាបទាន់ពេលវេលា ៕
ចែករំលែកព័តមាននេះ