ខេត្តកំពត ៖ មន្ត្រីជលផលខេត្តកំពតបានបញ្ជាក់ថា ចាប់តាំងពីថ្ងៃទី ២៩ ខែកក្កដា រហូតមកដល់ពេលនេះ អ្នកនេសាទសមុទ្រភាគច្រើនមិនបានចេញទៅនេសាទទេ ដោយសារអាកាសធាតុលើផ្ទៃសមុទ្រមិនសូវល្អផង និងដោយសារជំនន់ទឹកភ្លៀងបានហូរនាំទឹក សាបចូលទៅតំបន់ឆ្នេរសមុទ្រច្រើនធ្វើឲ្យការនេសាទមិនសូវបានផលផង ។ មន្ត្រីជំនាញអំពាវនាវឲ្យប្រជានេសាទត្រូវមានការប្រុងប្រយ័ត្នខ្ពស់ នៅពេលចេញទៅនេសាទក្នុងអំឡុងពេលនេះ។
លោក ស សុរិន នាយខណ្ឌរដ្ឋបាលជលផលខេត្តកំពតបានប្រាប់ឲ្យដឹងថា ការនេសាទសមុទ្រជាការងារសំខាន់មួយ ក្នុងវិស័យជលផល ដើម្បីផ្គត់ផ្គង់ និងបំពេញតម្រូវការគ្រឿងសមុទ្រនៅក្នុងខេត្ត និងចែកចាយទូទាំងប្រទេស ។ ចំពោះខេត្តកំពតទូក និងកាណូតនេសាទកំពុងធ្វើប្រតិបត្តិការតាមតំបន់ឆ្នេរសរុប១០៥៣គ្រឿង ក្នុងនោះទូកម៉ាស៊ីន មានចំនួន៤៥២គ្រឿង ម៉ាស៊ីនក្រៅមានចំនួន៦០១គ្រឿង តែដោយសារកត្តាអាកាសធាតុមិនអំណោយផល ចាប់តាំងពីថ្ងៃទី ២៩ ខែកក្កដា រហូតមកដល់ពេលនេះ ទូកអ្នកនេសាទចេញទៅសមុទ្រមានប្រមាណ៣០ភាគរយតែប៉ុណ្ណោះ ព្រោះប្រជានេសាទបានប្រាប់ថា អាកាសធាតុនៅសមុទ្រមិនសូវល្អ មានខ្យល់ខ្លាំងរលកសមុទ្រធំៗ និងទឹកហូរលឿន ហើយជំនន់ទឹកភ្លៀងបានហូរនាំទឹកសាបចូលទៅតំបន់ឆ្នេរសមុទ្រច្រើន ធ្វើការនេសាទពុំសូវបានផលនោះទេ ខាតតែប្រេងនិងជួបឧបសគ្គថែមទៀត ។
បើតាមការបញ្ជាក់របស់លោកនាយខណ្ឌថា អំឡុងពេលទទួលឥទ្ធិពលពីប្រព័ន្ធសម្ពាធទាប និងខ្យល់ព្យុះចាប់ពីថ្ងៃទី២ ដល់ថ្ងៃទី៨ ខែសីហានេះ ក្រោមការណែនាំពីប្រធានមន្ទីរកសិកម្ម ពិសេសអភិបាលខេត្ត មន្ត្រីជលផលបានដាក់កម្លាំងបន្ថែមក្នុងការចេញល្បាត ដើម្បីឃ្លាំមើលសភាពការទូទៅ នៅលើផ្ទៃសមុទ្រដោយសហការជាមួយនគរបាលព្រំដែនទឹក ពិសេសត្រៀមការពារសុវត្ថិភាពជូនប្រជានេសាទ ក្នុងករណីមានហេតុការណ៍មិនល្អកើតឡើងនៅក្នុងលំហរសមុទ្រតំបន់បងប្អូនធ្វើនេសាទ ។
តែទោះជាយ៉ាងណាក៏ដោយ លោកនៅតែអំពាវនាវដល់ប្រជានេសាទ ត្រូវបង្កើនការប្រុងប្រយ័ត្នខ្ពស់ និងមានត្រៀមសម្ភារៈសម្រាប់ការពារសុវត្ថិភាពដូចជាអាវពោងជាដើមដាក់តាមនៅក្នុងទូកនេសាទរៀងៗខ្លួន ។
ក្នុងឆមាសទី០១ ឆ្នាំ២០២៣នេះ ផលនេសាទខេត្តកំពតសរុបមានចំនួន ១០៩៥០តោន ក្នុងនោះរួមមានផលនេសាទទឹកសាបចំនួន ១៧១០តោន និងផលនេសាទសមុទ្រចំនួន៩២៤០តោន ក្នុងនោះផលនេសាទសិប្បកម្មមានចំនួន ២៧៧២តោន ផលនេសារគ្រួសារសមុទ្រ មានចំនួន ៦៤៦៨ តោន ៕
ចែករំលែកព័តមាននេះ