ខេត្តរតនគិរី ៖ គ្រោះជំនន់ទឹកភ្លៀងបានហូរចូលតាមអូរ បណ្តាលឱ្យលិចផ្លូវទៅសាលាបឋមសិក្សាចំនួន៣កន្លែង ដោយសិស្សមិនបានមកចូលរៀនទេ ស្ថិតនៅស្រុកវើនសៃ ខេត្តរតនគីរី ។ នេះបើតាមរបាយការណ៍របស់មន្ទីរអប់រំ យុវជន…
ខេត្តរតនគិរី ៖ គ្រោះជំនន់ទឹកភ្លៀងបានហូរចូលតាមអូរ បណ្តាលឱ្យលិចផ្លូវទៅសាលាបឋមសិក្សាចំនួន៣កន្លែង ដោយសិស្សមិនបានមកចូលរៀនទេ ស្ថិតនៅស្រុកវើនសៃ ខេត្តរតនគីរី ។ នេះបើតាមរបាយការណ៍របស់មន្ទីរអប់រំ យុវជន និងកីឡាខេត្ត ប្រកាសដល់សិស្សានុសិស្ស និងប្រជាពលរដ្ឋ ។
ជាក់ស្តែង មន្ទីរអប់រំ យុវជន និងកីឡាខេត្តរតនគីរី ជម្រាបជូនបណ្ឌិតសភាចារ្យ មេត្តាជ្រាបថា នៅថ្ងៃទី២-៣ ខែសីហា ឆ្នាំ២០២៣ ស្ថានភាពអាកាសធាតុកំពុងបន្តធ្លាក់ភ្លៀងធ្វើឲ្យមានជំនន់ទឹកភ្លៀងលិចផ្លូវទៅសាលាបឋមសិក្សាចំនួន៣កន្លែងក្នុងស្រុកវើនសៃ ជាមូលហេតុធ្វើឲ្យសិស្សានុសិស្សពិបាកក្នុងការធ្វើដំណើរ និងមិនបានមកសាលារៀន ក្នុងនោះ មានគ្រូបង្រៀនចំនួន១០នាក់ ស្រី៤នាក់ និងសិស្សសរុប២៣៧នាក់ (ស្រី១១៧នាក់) ។
សាលាបឋមសិក្សាចំនួន៣កន្លែងក្នុងស្រុកវើនសៃ គឺទី១-សាលាបឋមសិក្សាទៀមក្រោម គ្រូបង្រៀនចំនួន៣នាក់ ស្រី១ម្នាក់និងសិស្សចំនួន៩៤នាក់ (ស្រី៥០នាក់) ។ ទី២-សាលាបឋមសិក្សាកាលឹម គ្រូបង្រៀនចំនួន៤នាក់ (ស្រី២នាក់) និងសិស្សចំនួន៩២នាក់ ស្រី៤៥នាក់ និងទី៣-សាលាបឋមសិក្សាកាចូនលើ គ្រូបង្រៀនចំនួន៣នាក់ សិស្សចំនួន៥១នាក់ (ស្រី២២នាក់)។
គួររំលឹកផងដែរថា ចាប់ពីចុងខែកក្កដា មកដល់ថ្ងៃទី ១-២-៣-៤ ខែសីហា ឆ្នាំ២០២៣ នេះ មេឃនៅតែបន្តធ្លាក់ភ្លៀងដដែល ប៉ុន្តែទឹកទន្លេស្រែពកក៏បានស្រកបន្តិចខ្លះហើយ បន្ទាប់ពីប៉ុន្មានថ្ងៃមុនហក់ឡើងយ៉ាងខ្លាំងគួរឲ្យព្រួយបារម្ភ ។
បច្ចុប្បន្ន អាជ្ញាធរខេត្តរតនគិរី នៅតែអំពាវនាវដល់បងប្អូនប្រជាពលរដ្ឋ ដែលរស់នៅតាមដងទន្លេស្រែពក និងទន្លេសេសាន ត្រូវមានការប្រុងប្រយ័ត្នឱ្យបានខ្ពស់ ដែលមេឃនៅតែបន្តធ្លាក់ភ្លៀងដដែល ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ