ទីភ្នាក់ងារបរទេសកាលពីថ្ងៃទី៩ ឧសភា បានផ្សាយឱ្យដឹងថា កងកុំម៉ង់ដូពិសេសសហរដ្ឋអាមេរិកប្រទះឃើញថ្នាំប្រភេទឱសថបុរាណសម្រាប់ប្រើជម្រុញសមត្ថភាពផ្លូវភេទ ក្នុងទូថ្នាំ នៅឯផ្ទះក្នុងប្រទេសប៉ាគីស្ថានរបស់លោកអូសាម៉ា ប៊ីនឡាដេន អតីតមេភេរវករអាល់កៃដា ។ ទោះជាយ៉ាងណាក៏ដោយ កងកុំម៉ង់ដូពិសេសខាងលើ គ្មានប្រទះឃើញថ្នាំសម្រាប់ព្យាបាលជំងឺផ្សេងៗទៀតឡើយ បញ្ហានេះបញ្ជាក់យ៉ាងច្បាស់ថា លោកប៊ីនឡាដេននៅមានសុខភាពរឹងមាំល្អ និងគ្មានបញ្ហាផ្នែកសុខភាពដូចដែលទីភ្នាក់ងាររបស់លោកខាងលិចបានចុះផ្សាយក្នុងរយៈពេលជាច្រើនឆ្នាំកន្លងមកទេ។
នៅក្នុងរបាយការណ៍បញ្ជាក់ឱ្យដឹងថា កងកុំម៉ង់ដូពិសេសដែលសម្លាប់លោកប៊ីនឡានដេនប្រទះឃើញថ្នាំទឹក «អាវីណា» (Avena) ជាប្រភេទឱសថបុរាណដែលចម្រាញ់ចេញពីស្រូវសាលីមានគុណប្រយោជន៍ទាក់ទងនឹងការបង្កើនសមត្ថភាពផ្លូវភេទ នៅក្នុងទូថ្នាំក្នុងផ្ទះ របស់លោកប៊ីនឡាដេន ។ ប៉ុន្តែមិនឃើញមានថ្នាំសម្រាប់ព្យាបាលជំងឺរុាំរ៉ៃផ្សេងៗទៀតឡើយ ធ្វើឱ្យដំណឹងចចាមអារ៉ាមទាក់ទងនឹងសុខភាព មិនល្អរបស់លោកប៊ីនឡាដេនអស់រយៈពេលជាច្រើនឆ្នាំ អាចមិនមែនជាការពិត ។
ស្របពេលជាមួយគ្នានេះ កាសែតក្នុងស្រុករបស់ប៉ាគីស្ថានផ្សាយឱ្យដឹងថា លោកស្រីអាម៉ាល ប៊ីនឡាដេន អាយុ២៩ឆ្នាំ ភរិយាអតីតមេភេរវករអាល់កៃដារូបនេះបានគូសបញ្ជាក់ក្នុងអំឡុងពេលធ្វើការសាកសួរដោយមន្ត្រីសន្តិសុខប៉ាគីស្ថានថា លោកប៊ីនឡាដេនមានសុខភាពល្អ ទោះបីជាធ្លាប់មានបញ្ហាធ្ងន់ធ្ងរកាលពីឆ្នាំ១៩៩៩ក៏ដោយ ៕
ចែករំលែកព័តមាននេះ