ខេត្តកំពង់ចាម ៖ មានហេតុការណ៍ភ្ញាក់ផ្អើលទាំងព្រឹកព្រលឹមថ្ងៃទី១០ ឧសភា នៅក្នុងវត្តអណ្តូងក្តី ស្ថិតនៅភូមិសាមគ្គី ឃុំជីគរ ស្រុកត្បូងឃ្មុំ ដោយបុរសអនាថាម្នាក់បានដេកស្លា.ប់នៅលើកុដិឈើមួយ ដែលមានទំហំ៥ម៉ែត្រគុណ៦ម៉ែត្រ។ ភ្លាមនោះគេនឹកស្មានតែជាករណីឃាតកម្ម រហូតដល់កម្លាំងជំនាញព្រហ្មទណ្ឌស្រុក និងប៉ុស្តិ៍ចុះមកពិនិត្យ ទើបដឹងថា
ខេត្តកំពង់ចាម ៖ មានហេតុការណ៍ភ្ញាក់ផ្អើលទាំងព្រឹកព្រលឹមថ្ងៃទី១០ ឧសភា នៅក្នុងវត្តអណ្តូងក្តី ស្ថិតនៅភូមិសាមគ្គី ឃុំជីគរ ស្រុកត្បូងឃ្មុំ ដោយបុរសអនាថាម្នាក់បានដេកស្លាប់នៅលើកុដិឈើមួយ ដែលមានទំហំ៥ម៉ែត្រគុណ៦ម៉ែត្រ។ ភ្លាមនោះគេនឹកស្មានតែជាករណីឃាតកម្ម រហូតដល់កម្លាំងជំនាញព្រហ្មទណ្ឌស្រុក និងប៉ុស្តិ៍ចុះមកពិនិត្យ ទើបដឹងថា ជាករណីស្លាប់ដោយសារខ្យល់គរ ។
តាមព័ត៌មានពីលោកអនុសេនីយ៍ឯកឡុង សារិន អធិការរងនគរបាលស្រុកត្បូងឃ្មុំ បានប្រាប់កោះសន្តិភាពឱ្យដឹងថា បុរសអនាថានោះត្រូវបានប្រជាពលរដ្ឋរស់នៅក្នុងភូមិសាមគ្គី បានឃើញដើរតែម្នាក់ឯងនៅតាមផ្លូវលំក្នុងភូមិ និង បានដេកនៅតាមមុខផ្ទះគេទៀតផង ដោយគ្មានគោលដៅពិតប្រាកដនោះទេ មិនដឹងជាផ្ទះសម្បែងនៅទីណា។
លោកអធិការរងនគរបាលស្រុកត្បូងឃ្មុំ បានបន្តថា បុរសចំណាស់នេះមានរាងកាយស្គមស្គាំងស្លេកស្លាំងដូចជាគ្មានកម្លាំងទេ ហើយក៏មិនបានបង្កឱ្យអ្នកភូមិណាម្នាក់មានបញ្ហាលំបាកនោះដែរ ។ ប៉ុន្តែនៅពេលល្ងាចតែងតែមកសុំព្រះសង្ឃដែលគង់នៅវត្តអណ្តូងក្តី ទទួលទានបាយ ដើម្បីចំអែតក្រពះ។
ដោយហេតុតែមានក្តីអាណិតអាសូរសណ្តោសប្រណីពីព្រះចៅអធិការវត្តនោះ បានអនុញ្ញាតឱ្យបុរសចំណាស់អនាថានេះសម្រាកនៅលើកុដិឈើជារៀងរាល់យប់ផងដែរ ចាប់តាំងពីយប់ថ្ងៃដំបូងរហូតដល់យប់ថ្ងៃទី៥ ។ ចៃដន្យស្រាប់តែនៅវេលាម៉ោង៥និង៣០នាទីព្រឹកថ្ងៃទី១០ ឧសភា នៅពេលដែលលោកសាមណេរមួយអង្គបានក្រោកឡើងនិមន្តទៅយកស្បង់ចីវរ បានឃើញបុរសចំណាស់ជាជនអនាថានោះបានដេកស្លាប់នៅលើកុដិឈើភ្លាមៗនោះក៏មានការភ្ញាក់ផ្អើលពេញវត្ត និងបានរាយការណ៍ទៅនគរបាលប៉ុស្តិ៍រដ្ឋបាលឃុំជីគរ ដើម្បីមកត្រួតពិនិត្យមើលសព។
លោកអនុសេនីយ៍ឯកឡុង សារិន បានបញ្ជាក់ថា នាព្រឹកថ្ងៃទី១០ ឧសភា នោះ លោកវរសេនីយ៍ត្រីហ៊ាង ហ៊ត់ អធិការនគរបាលស្រុកត្បូងឃ្មុំ បានចាត់ឱ្យបង្កើតគណៈកម្មការចម្រុះមួយដើម្បីត្រួតពិនិត្យសព តែមិនឃើញមានស្នាមរបួសណាមួយនៅលើរាងកាយគួរឱ្យសង្ស័យនោះទេ ទើបធ្វើការសន្និដ្ឋានថា បុរសចំណាស់នេះពិតជាបានស្លាប់ដោយសារខ្យល់គរ។ រហូតមកដល់ម៉ោង១០ព្រឹក ទើបគេបានស្គាល់អត្តសញ្ញាណសពឈ្មោះឆែ ញ៉ អាយុ៥១ឆ្នាំ រស់នៅភូមិជ្រោយ សង្កាត់សួង ក្រុងសួង ដែលមានមុខរបរជាកម្មករលីសែង ហើយចូលចិត្តពិសាស្រាច្រើនទៀតផងរហូតដល់ធ្លាក់ខ្លួនឈឺ ហើយត្រូវបានក្រុមគ្រួសារយកមកសម្រាកព្យាបាលនៅមន្ទីរពេទ្យបង្អែកស្រុកត្បូងឃ្មុំ បានរយៈពេល១៥ថ្ងៃក៏បានធូរស្រាលចេញទៅផ្ទះវិញបានតែ១ថ្ងៃប៉ុណ្ណោះ បានរត់ចេញពីផ្ទះមិនឱ្យអ្នកណាដឹងនោះទេ ។ ក្រោយពីបានពិនិត្យសពរួចសមត្ថកិច្ចបានរៀបចំប្រគល់សពទៅឱ្យក្រុមសាច់ញាតិធ្វើបុណ្យតាមប្រពៃណី៕
ចែករំលែកព័តមាននេះ